រយៈពេល២០ថ្ងៃ៖ រថយន្តជាង១០០គ្រឿងត្រូវបានកម្ទេច ហើយមនុស្ស១៧នាក់ត្រូវបានឃាត់ខ្លួនក្នុងបទល្មើសព្រៃឈើ
គិតចាប់ពីថ្ងៃទី ០៩ ដល់ថ្ងៃទី ២៨ កក្កដា ឆ្នាំ២០១៩នេះ យ៉ាងហោចណាស់មនុស្ស១៧នាក់ត្រូវបានចាប់ខ្លួននិងបញ្ជូនទៅកាន់តុលាការពីបទល្មើសព្រៃឈើនៅក្នុងប្រទេសកម្ពុជា។ ក្រៅពីនោះ យុទ្ធនាការបង្ក្រាបបទល្មើសព្រៃឈើរយៈពេលជាង២០ថ្ងៃមកនេះ រថយន្តជិត២០០គ្រឿងត្រូវបានរឹបអូសហើយឈើជាង២៦០០ម៉ែត្រគូបត្រូវបានរឹបអូស។ បើតាមអ្នកនាំពាក្យគណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ យុទ្ធនាការបង្ក្រាបបទល្មើសព្រៃឈើ កំពុងត្រូវបានធ្វើយ៉ាងក្តៅគគុកនៅទូទាំងប្រទេស។
ចុះផ្សាយនៅថ្ងៃ៖
ស្តាប់ - ០២:៣៥
ក្នុងចំណោមជនល្មើសទាំង១៧នាក់ ដែលត្រូវបានឃាត់ខ្លួនក្នុងបទល្មើសព្រៃឈើក្នុងរយៈពេលជិតមួយខែកក្កដានេះ រួមមានទាំងជនជាតិចិន និងជនជាតិវៀតណាមផងដែរ។ ហើយជនសង្ស័យទាំងអស់នេះ ត្រូវបានកសាងសំណុំរឿងបញ្ជូនទៅកាន់តុលាការសាលាដំបូងរួចហើយ ដើម្បីចាត់ការតាមនីតិវិធីច្បាប់។ នេះបើតាមការបញ្ជាក់ពីលោកឧត្តមសេនីយ៍ត្រី អេង ហ៊ី អ្នកនាំពាក្យគណៈកម្មាធិការជាតិ ដើម្បីទប់ស្កាត់និងបង្ក្រាបបទល្មើសធនធានធម្មជាតិនៃកងរាជអាវុធហត្ថលើផ្ទៃប្រទេស។ ក្រៅពីជនជាតិចិន និងជនជាតិវៀតណាម នៅមាន ឧកញ៉ា និងរួមទាំងមន្ត្រីអនុវត្តច្បាប់មួយចំនួនផង ក៏ត្រូវបានឃាត់ខ្លួននៅក្នុងបទល្មើសព្រៃឈើនេះដែរ។
ក្រៅពីនេះ ក្នុងរយៈពេល២០ថ្ងៃនៃយុទ្ធនាការបង្ក្រាបបទល្មើសព្រៃឈើនៅភូមិភាគឥសាននេះ គណៈកម្មាធិការជាតិ ដើម្បីទប់ស្កាត់និងបង្ក្រាបបទល្មើសធនធានធម្មជាតិ ដែលដឹកនាំដោយលោកនាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស បានរឹបអូសឈើ បានប្រមាណជា២៦០០ម៉ែត្រគូប ឈើដុំប្រមាណជា៣ពាន់ដុំ និងដុតកម្ទេចរថយន្ត ម៉ូតូកែច្នៃសម្រាប់ដឹកឈើបានប្រមាណជាង១០០គ្រឿង និងរក្សាទុករថយន្តដែលអាចប្រើការបានជាង៧០គ្រឿង។
គួររំលឹកជូនថា នៅចំថ្ងៃដែលប្រជាពលរដ្ឋកម្ពុជាកំពុងប្រារព្ធទិវាជាតិដាំដើមឈើ ឬ រុក្ខទិវាជាតិ នៅឯខេត្តក្រចេះ កាលពីថ្ងៃទី ០៩ កក្កដា គណៈកម្មាធិការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ នេះក៏បានបើកយុទ្ធនាការបង្ក្រាបបទល្មើសព្រៃឈើជាទ្រង់ទ្រាយធំនៅក្នុងខេត្តមណ្ឌលគីរី ដោយបានឃាត់ខ្លួនឧកញ៉ាម្នាក់ឈ្មោះ ស៊ឹង សំអុល ប្រធានក្រុមហ៊ុនម៉ាស្ទ័រខេសាន់ រួមជាមួយមេការក្រុមហ៊ុន២នាក់ និងអ្នកបើករថយន្តម្នាក់ និងបានដកហូតរថយន្ដដឹកឈើបានចំនួនជាង៤០គ្រឿង។ បន្ថែមលើនេះ កាលពីថ្ងៃទី ២៧ កក្កដា គណៈកម្មាធិការជាតិ ដើម្បីទប់ស្កាត់ និង បង្ក្រាប បទល្មើសធនធានធម្មជាតិ ដែលបង្កើតឡើងដោយរដ្ឋាភិបាលកម្ពុជានេះ បានឃាត់ខ្លួនមន្ដ្រី៣នាក់ទៀតបញ្ជូនទៅកាន់តុលាការ ពាក់ព័ន្ធទៅនឹងបទល្មើសព្រៃឈើ។ ក្នុងនោះ ២នាក់ជាមន្ដ្រីរដ្ឋបាលព្រៃឈើ និងម្នាក់ជាមន្ដ្រីបរិស្ថាននៅខេត្ដមណ្ឌលគិរី ខណៈដែលតុលាការខេត្តមណ្ឌលគីរីដដែលនេះ កាលពីថ្ងៃទី ១៧ កក្កដា ក៏បានចេញដីការបង្គាប់ឲ្យអតីតមេបញ្ជាការកងរាជអាវុធហត្ថស្រុកកែវសីមា និងបច្ចុប្បន្នជាមេបញ្ជាការរងកងរាជអាវុធហត្ថខេត្តក្រចេះ លោក សាក់ សារុន ចូលខ្លួនទៅឆ្លើយបំភ្លឺនៅក្នុងតុលាការនៅថ្ងៃទី ២០ សីហា ខាងមុខ ក្នុងសំណុំរឿងប្រមូល និងដឹកជញ្ជូនផល អនុផលព្រៃឈើដោយគ្មានលិខិតអនុញ្ញាតពីរដ្ឋបាលព្រៃឈើ កាលពី ខែកក្កដា ឆ្នាំ២០១៥។
បើតាមលោកឧត្តមសេនីយ៍ត្រី អេង ហ៊ី យុទ្ធនាការបង្ក្រាបបទល្មើសព្រៃឈើដ៏ក្តៅគគុកនេះ នឹងបន្តធ្វើនៅក្នុងក្របខណ្ឌទូទាំងប្រទេស ដោយម៉ឺងម៉ាត់បំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ