ភ្ញៀវទេសចរណ៍ម្នាក់ស្លាប់ និងមួយចំនួនជួយសង្គ្រោះទាន់ពេល ពីរលកសមុទ្រនៅខេត្តព្រះសីហនុ
ភ្ញៀវទេសចរណ៍ជាតិម្នាក់បានស្លាប់បាត់បង់ជីវិត និងមួយចំនួនទៀតត្រូវបានជួយសង្គ្រោះទាន់ពេលវេលា ខណៈដែលពួកគេបានងូតទឹកសមុទ្រលេងកំសាន្ត នៅតំបន់ឆ្នេរអូរឈើទាល កាលពីល្ងាចថ្ងៃទី១៩សីហា។ ពួកគេត្រូវបានទឹកសមុទ្រគួចយកទៅ ខណៈដែលមានរលកធំៗ។ ក្រសួងធនធានទឹកកាលពីថ្ងៃទី១៨សីហា បានចេញសេចក្តីអំពាវនាវឲ្យប្រជាពលរដ្ឋប្រុងប្រយ័ត្ន ពិសេសប្រជាពលរដ្ឋនៅតំបន់មាត់សមុទ្រ ខណៈដែលកម្ពុជាកំពុងទទួលរងឥទ្ធិពលព្យុះ “ដៀនមុ” (Dianmu) ចាប់ពីថ្ងៃទី១៨ដល់ថ្ងៃទី២៦សីហា។
ចុះផ្សាយនៅថ្ងៃ៖
ស្តាប់ - ០១:៣២
បុរសដែលស្លាប់បាត់បង់ជីវិតដោយសារលង់ទឹកសមុទ្រកាលពីថ្ងៃទី១៩សីហា ត្រូវបានគេដឹងថា មានឈ្មោះ តាំង ពុយហ៊ាង ភេទប្រុសអាយុ៥៥ជាភ្ញៀវទេសចរណ៍ក្នុងស្រុក មកពីខេត្តកំពង់ចាម។ បុរសរូបនេះ ត្រូវបានគេដឹងថា បានស្លាប់ នៅពេលដែលចូលងូតទឹកសមុទ្រ នៅតំបន់ឆ្នេរអូរឈើទាល ស្ថិតក្នុងសង្កាត់លេខ៤ ក្រុងខេត្តព្រះសីហនុ ហើយត្រូវបានខ្យល់បោកបក់ និងគួចខ្លាំង លាយឡំជាមួយភ្លៀង បង្កជារលកសមុទ្រធំៗនាំយកទៅជាមួយនឹងភ្ញៀវទេសចរណ៍ផ្សេងទៀត។ ក្រៅពីនេះនៅមានជនរងគ្រោះ២រូបទៀត ដែលលង់ទឹកជាមួយគ្នា ប៉ុន្តែត្រូវបានគេជួយសង្គ្រោះទាន់ពេលវេលា។
គួរជំរាបជូនថា កាលពីថ្ងៃទី១៨សីហា ក្រសួងធនធានទឹក និងឧត្តុនិយមនៃប្រទេសកម្ពុជាបានជូនដំណឹងពីស្ថានភាពអាកាសធាតុនៅក្នុងប្រទេសកម្ពុជាថា ព្យុះទី៧ដែលមានឈ្មោះថា “ដៀនមុ” (Dianmu) កំពុងមានឥទ្ធិពលមកលើអាងទន្លេមេគង្គ និងតំបន់មាត់សមុទ្រនៃប្រទេសកម្ពុជា ចាប់ពីថ្ងៃទី១៨ ដល់ថ្ងៃទី២៦សីហាឆ្នាំ២០១។ ក្រសួងនេះ បានអំពាវនាវឲ្យប្រជាពលរដ្ឋមានការប្រុងប្រយ័ត្នខ្ពស់ ពិសេសប្រជាពលរដ្ឋ និងអ្នកនេសាទ នៅតំបន់មាត់សមុទ្រ ដែលអាចប្រឈមនឹងខ្យល់បក់បោកខ្លាំង និងរលកសមុទ្រខ្ពស់។
ប៉ុន្តែ ទន្ទឹមគ្នានេះ ប្រជាពលរដ្ឋជាភ្ញៀវទេសចរណ៍ជាតិនិងអន្តរជាតិ ក៏បានរិះគន់ទៅលើអាជ្ញាធរខេត្តព្រះសីហនុ ដែលមិនបានផ្សព្វផ្សាយដំណឹងបន្ថែម ជូនដល់ភ្ញៀវទេសចរណ៍ដែលទៅកំសាន្តនៅតំបន់មាត់សមុទ្រ ខណៈមធ្យោបាយជួយសង្គ្រោះ គឺពឹងផ្អែកលើខ្លួនឯងទាំងស្រុង។ គេបានមើលឃើញថា នៅពេលកើតហេតុ គឺមានតែក្រុមម៉ូតូទឹកដឹកភ្ញៀវទេសចរណ៍កំសាន្តតាមមាត់សមុទ្រប៉ុណ្ណោះ ដែលបានចេញជួយអន្តរាគមន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ