អ្នកនយោបាយ និងអ្នកស្រាវជ្រាវកំពុងខ្វែងគំនិតគ្នាលើបញ្ហាព្រំដែន
លោក សួន សេរីរដ្ឋា ប្រធានគណបក្សអំណាចពលរដ្ឋខ្មែរ និង លោក សុខ ទូច ប្រធានក្រុមស្រាវជ្រាវបញ្ហាព្រំដែននៃរាជបណ្ឌិត្យសភាកម្ពុជាកំពុងខ្វែងគំនិតគ្នាចំពោះការស្នើឲ្យធ្វើវិសោធនកម្មមាត្រា២នៃរដ្ឋធម្មនុញ្ញបន្ទាប់ពីការស្នើសុំរបស់លោក សុខ ទូច ។ លោក សួន សេរីរដ្ឋា ចាត់ទុកការស្នើសុំនេះលឿនហួស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
ភាពចម្រូងចម្រាសរវាងការកំណត់ខ្សែបន្ទាត់ព្រំដែនបានកើតមានជាថ្មី តាមរយៈលិខិតឆ្លើយឆ្លងគ្នារវាងលោក សួន សេរីរដ្ឋានិង លោក សុខ ទូច។ ការឆ្លើយឆ្លងលិខិតនេះ ធ្វើឡើងបន្ទាប់ពីលោក សុខ ទូច ស្នើឲ្យមានការធ្វើវិសោធនកម្មមាត្រា២នៃរដ្ឋធម្មនុញ្ញ នៅក្នុងអំឡុងពេលធ្វើសន្និសីទកាសែត នៅថ្ងៃទី២២កក្កដាកន្លងមក។
ឆ្លើយតបនឹងអនុសាសន៍របស់ លោក សុខ ទូច លោក សួន សេរីរដ្ឋា ប្រធានគណបក្សអំណាចខ្មែរ តាមរយៈលិខិតចុះថ្ងៃទី០៧សីហាយល់ថា ការស្នើធ្វើវិសោធកម្មច្បាប់រដ្ឋធម្មនុញ្ញមាត្រា២នាពេលនេះហាក់ដូចជាលឿនហួស។ លឿនហួសព្រោះ បើតាមលោក សួន សេរីរដ្ឋា ការសិក្សាស្រាវជ្រាវបញ្ហាព្រំដែនដឹកនាំដោយ សុខ ទូច មិនទាន់ទទួលបានផែនទីពីគ្រប់ជ្រុងជ្រោយយកមកផ្ទៀងផ្ទាត់ឲ្យបានត្រឹមត្រូវ។ និងថា ការសិក្សាស្រាវជ្រាវដឹកនាំដោយលោក សុខ ទូច នោះ នៅមិនទាន់ទទួលបានទំនុកចិត្តពេញលេញពីសំណាក់ពលរដ្ឋខ្មែរទូទៅផងដែរ។ ចំពោះប្រមុខបក្សអំណាចខ្មែរ បញ្ហាព្រំដែនជាមួយប្រទេសជិតខាង គឺជាបញ្ហាអធិបតេយ្យភាព និងបូរណភាពទឹកដីខ្មែរ ដែលមានពលរដ្ឋខ្មែរទាំងអស់គ្នាជាម្ចាស់ មិនមែនជាកម្មសិទ្ធិផ្ដាច់មុខរបស់គណបក្សប្រជាជនកម្ពុជា និងគណបក្សសង្គ្រោះជាតិ តែពីរគណបក្សនោះឡើយ។
ចុងក្រោយនេះ លោក សុខ ទូច បានបញ្ជាក់នៅក្នុងលិខិតចុះថ្ងៃទី០៨សីហាថា ក្រុមអ្នកស្រាវជ្រាវបានស្នើថា «ប្រសិនបើមានការរាំងស្ទះណាមួយពាក់ព័ន្ធនឹងការប្រើប្រាស់ផែនទីដែលមិនឆ្លើយតបទៅនិងរដ្ឋធម្មនុញ្ញ គប្បីធ្វើវិសោធនកម្មមាត្រា២នៃរដ្ឋធម្មនុញ្ញឆ្នាំ១៩៩៣ ជាការបើកផ្លូវឲ្យកម្ពុជាអាចប្រើប្រាស់ផែនទីផ្សេងទៀត ដែលផ្ដល់អត្ថប្រយោជន៍ប្រសើរជាងក្នុងការចរចា និងដោះស្រាយបញ្ហាព្រំដែនជាមួយប្រទេសជិតខាង»។ បើតាមលោក សុខ ទូច ក្រុមស្រាវជ្រាវមិនបានស្នើឲ្យបដិសេធផែនទីណាមួយ ឬជ្រើសរើសផែនទីដាច់ដោយឡែកណាមួយនោះទេ ប៉ុន្តែគប្បីបើកផ្លូវឲ្យកម្ពុជាអាចប្រើប្រាស់ផែនទីផ្សេងទៀតដែលផ្ដល់អត្ថប្រយោជន៍ប្រសើរជាង មកប្រើប្រាស់ផងដែរ ព្រោះថា ផែនទីដែលកម្ពុជាប្រើប្រាស់ជាមួយប្រទេសជិតខាង មានមាត្រដ្ឋានខុសៗគ្នា ហើយផែនទីដែលកម្ពុជាអះអាងថា បានតម្កល់នៅអង្គការសហប្រជាជាតិ មកដល់ពេលនេះ ក៏នៅមិនទាន់រកឃើញនៅឡើយ។ នេះបើតាមលោក សុខ ទូច។
ក្រៅពីបកស្រាយអំពីអនុសាសន៍របស់ខ្លួន តាមរយៈលិខិតចុះថ្ងៃទី៨ខែសីហា លោកសុខ ទូច ក៏បានធានាពីក្រមសីលធម៌វិជ្ជាជីវៈ និងគោលការណ៍វិទ្យាសាស្ត្រក្នុងការស្រាវជ្រាវបញ្ហាព្រំដែនដោយឯករាជ្យ និងការទទួលខុសត្រូវ។ ប្រធានក្រុមស្រាវជ្រាវបញ្ហាព្រំដែននៃរាជបណ្ឌិត្យសភាកម្ពុជា ក៏បានអំពាវនាវឲ្យភាគីពាក់ព័ន្ធចូលរួមក្នុងការស្រាវជ្រាវរបស់ខ្លួន។ និងជាពិសេស កុំកេងចំណេញនយោបាយ ពីបញ្ហាព្រំដែន ព្រោះថា បញ្ហាព្រំដែនគឺជាអាយុជីវិតរបស់ជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ