កម្ពុជាបញ្ជូន៤វិញ្ញាសារកីឡា ទៅអូឡាំពិកប្រេស៊ីល តែសង្ឃឹមតិចតួច
ចុះផ្សាយនៅថ្ងៃ៖
ស្តាប់ - ០៤:៣៤
កម្រិតអូឡាំពិក កម្ពុជាមានជំនឿតិចតួចថានឹងអាចឈ្នះមេដាយ ខណៈដែលការរំពឹងទុក តែទៅលើកីឡាតេក្វាន់ដូរ តែមួយមុខ និងមានកីឡាការិនីស៊ន សៀវម៉ី ដែលមានសក្តានុពលគួរសម ។ ក៏ប៉ុន្តែបើអាចឈ្នះមេដាយណាមួយនោះ វាពិតជាការបំបែកប្រវត្តិសាស្ត្រកីឡាថ្មីមួយទៀតរបស់កម្ពុជាចាប់តាំងពីជាង៥០ឆ្នាំនៃប្រវត្តិកីឡាអូឡាំពិកកម្ពុជា។
អត្តពលិកកម្ពុជាចំនួន៦រូប ពេលនេះកំពុងមានវត្តមាន និងហ្វឹកហាត់ត្រៀមនៅទីក្រុង Rio de Janeiro ប្រទេសប្រេស៊ីល។ ក្នុងចំណោម ២០៦ជាតិសាសន៍ លើពិភពលោក ដែលរួមមានអត្តពលិកជាង១ម៉ឺននាក់នោះ កម្ពុជាបានបញ្ជូនកីឡាករ កីឡាការិនីរបស់ខ្លួន ទៅចូលរួមប្រកួតកីឡាអូឡាំពិកលើកទី៣១នេះ មានតែ៤ប្រភេទកីឡាប៉ុណ្ណោះ ដែលមានកីឡាករ ២រូប និងកីឡាការិនី៤រូប។ ដំណើរការប្រកួតកីឡាអូឡាំពិក ដែលចាប់ផ្តើមជាផ្លូវការនៅថ្ងៃទី៥សីហា និងបញ្ចប់នៅថ្ងៃទី២១សីហាឆ្នាំ២០១៦ខាងមុខ ប្រទេសប្រេស៊ីល ដែលជាម្ចាស់ផ្ទះបានរៀបចំ ចំនួន៤២ប្រភេទ រួមមាន ៣០៦វិញ្ញាសារកីឡា។
ដោយឡែក វិញ្ញាសារដែលអត្តពលិកប្រទេសនៅអន់ថយលើវិស័យកីឡាដូចជាកម្ពុជាចូលរួម មានម៉ារ៉ាតុង ហែលទឹក ចំបាប់ និងតេក្វាន់ដូ។ ក្នុងចំណោមកីឡាករ កីឡាការិនីខ្មែរ ទាំង៦រូប ដែលត្រូវចូលរួមប្រកួតនោះ មានតែកីឡាការិនីស៊ន សៀវម៉ី ម្នាក់ប៉ុណ្ណោះ ដែលមានសិទ្ធិពេញលេញចូលរួម ដោយឆ្លងកាត់វគ្គប្រកួតជម្រុះមុនការប្រកួតអូឡាំពិកឈានចូលមកដល់ លើវិញ្ញាសារតេក្វាន់ដូ។ ក្រៅពីនេះសុទ្ធសឹងជាកីឡាករ និងកីឡាការិនី ដែលចូលរួមដោយមានការអនុគ្រោះពីគណៈកម្មាធិការអូឡាំពិកអន្តរជាតិ។
តាមប្រវត្តិនៃការចូលរួមប្រកួតកីឡាលំដាប់ពិភពលោករបស់កម្ពុជា ជាពិសេសកីឡាអូឡាំពិក នេះតែម្តង រយៈពេលកន្លះសតវត្សមកហើយ កម្ពុជាចូលរួមប្រកួតបានប្រមាណជា៩លើកប៉ុណ្ណោះ ក្រៅពីនេះ កម្ពុជាមានការខកខានដោយហេតុផលផ្សេងៗ ដូចជាសង្គ្រាមរ៉ាំរ៉ៃ និងមិនមានលក្ខណៈសម្បត្តិគ្រប់គ្រាន់ក្នុងការចូលរួមប្រកួតកីឡានេះ ដែលគេចាត់ទុកថាជាGames លំដាប់ខ្ពស់។
ជាមួយគ្នានេះ គ្មានអត្តពលិកកម្ពុជាណាម្នាក់ បានឈ្នះមេដាយពីកីឡាអូឡាំពិកនេះទេ សូម្បីតែមេដាយសំរិតក៏ដោយ។ កាលពីឆ្នាំ២០១៤ កម្ពុជាបានផ្លាស់ប្តូរប្រវត្តិសាស្ត្រនៅអាស៊ីលើ វិស័យកីឡានេះ ដោយកីឡាការិនីវ័យក្មេង កំពស់ត្នោត ទំងន់ធ្ងន់ ស៊ន សៀវម៉ី ជំនាញលើវិញ្ញាសារតេក្វាន់ដូ បាននាំមកជូន មាតុភូមិនូវមេដាយមាសកីឡាអាស៊ី ជាលើកដំបូងនៅកូរ៉េខាងត្បូង បន្ទាប់ពីជាង៤០ឆ្នាំ។
ធនធានអត្តពលិកដ៏កម្ររកបាន និងសក្តានុពលរបស់សៀវម៉ី លើវិស័យកីឡាតេក្វាន់ដូ ក៏ត្រូវគេរំពឹងថា ជាក្តីសង្ឃឹមតែមួយគត់របស់ប្រទេសកម្ពុជាក្នុងការចូលរួមកីឡាអូឡាំពិក នៅទីក្រុងរីយ៉ូ ប្រទេសប្រេស៊ីលនៅឆ្នាំនេះ។ តាមការសង្កេត ស៊ន សៀវម៉ី បង្កើតភាពល្បីល្បាញហើយ ទើបមានការគាំទ្រគគ្រឹកគគ្រេងជាក្រោយ។ សំណួរសួរថា ចុះបើអស់ពីកីឡាការិនីរូបនេះ តើអ្វីទៅជាភាពនឹងនសម្រាប់វិស័យកីឡាខ្មែរ? ហើយបើគ្មានអ្វីជំនួសទេនោះមិនខុសអីពីពាក្យថា«កីឡាខ្មែរម្តងលិចម្តងអណ្តែត» ខណៈដែលប្រទេសដទៃ «អណ្តែតហើយអណ្តែតទៀត»។
ដូច្នេះ ដើម្បីរក្សាឲ្យបានធនធានកីឡាករ កីឡាការិនី ជាពិសេសដើម្បីត្រៀមខ្លួនធ្វើជាម្ចាស់ផ្ទះកីឡាតំបន់ Sea Games នៅឆ្នាំ២០២៣ គេគួរតែផ្តោតការយកចិត្តទុកដាក់ គាំទ្រដល់វិស័យ កីឡា ចាប់តាំងពីការចាប់ផ្តើម។ មិនថាប្រភេទកីឡាណាជាកីឡាណាទេ គួរតែលើកទឹកចិត្តទាំងស្មារតីនិងសម្ភារៈ រួមទាំងបច្ចេកទេសក្នុងការហ្វឹកហាត់ មិនចាំសម្លឹងមើលកីឡាណា លេចធ្លោ ទើបមានការគាំទ្រ វាយធុង ដំប៉ោតនោះទេ។
ជាបទពិសោធន៍នៅបរទេស ការអភិវឌ្ឍន៍កីឡាត្រូវតែមានការជ្រោមជ្រែងដើរទន្ទឹមគ្នារវាងរដ្ឋនិងវិស័យឯកជន។ ហិរញ្ញវត្ថុ ដើរតួនាទីសំខាន់បំផុតក្នុងការធានាឲ្យមានការរៀបចំកីឡាបានល្អ និងទាក់ទាញបានឆន្ទៈកីឡាករ ឲ្យលេងកីឡាពិតប្រាកដ។ ការគាំទ្ររបស់មហាជនជាផ្នែកមួយផងដែរ ក្នុងការជួយជម្រុញឲ្យដណ្តើមបានជ័យជំនះ តែមហាជនអាចជួយបានតែពេលណាមានការប្រកួតប៉ុណ្ណោះ។
ទោះយ៉ាងនេះក្តី ភាពរីកចម្រើនរបស់កីឡាខ្មែរនៅលើឆាកអន្តរជាតិ ដូចជាលំដាប់កីឡាអូឡាំពិកជាដើម ចាំបាច់ទាមទារពេលវេលា និងសមត្ថភាពជាច្រើនទៀត និងចាំបាច់ត្រូវបង្ហាញពីភាពជោគជ័យក្នុងតំបន់ជាមុនសិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ