បណ្តឹងរំលាយបក្សសង្រ្គោះជាតិនឹងបើកសវនាការនៅពាក់កណ្តាលខែក្រោយ
តុលាការកំពូល បានកំណត់ពេលនៅពាក់កណ្តាលខែក្រោយ បើកសវនាការទៅលើបណ្តឹងសុំរំលាយគណបក្សប្រឆាំងធំជាងគេនៅកម្ពុជា ទៅតាមបណ្តឹងរបស់គណបក្សចំនួនពីរដែលមិនបានជាប់ឆ្នោតកន្លងទៅ និងបណ្ដឹងរបស់ក្រសួងមហាផ្ទៃ។ប៉ុន្តែគណបក្សសង្រ្គោះជាតិនៅតែមិនចាប់អារម្មណ៍ទៅនឹងសវនាការនេះទេ ដោយថាទុកឲ្យតុលាការដំណើរការទៅមុខកាន់តែលឿនដើម្បីឆាប់ដឹងលទ្ធផល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
ដោយ អ៊ឹង ប៊ុនថន
តាមលិខិតដែលចុះហត្ថលេខាដោយលោក ឌិត មន្ទី ប្រធានក្រុមប្រឹក្សាជំនុំជម្រៈ និងជាប្រធានតុលាការកំពូល គឺបានអញ្ជើញប្រធានគណបក្សសង្រ្គោះជាតិឲ្យចូលសវនាការនៅថ្ងៃទី១៦ខែវិច្ឆិកាឆ្នាំ២០១៧ វេលាម៉ោង៨ព្រឹក។ ជាសវនាការទៅលើបណ្តឹងសុំរំលាយគណបក្សសង្គ្រោះជាតិ។
ការកំណត់ពេលសវនាការនេះ ធ្វើឡើង ខណៈដែលគណបក្សសង្គ្រោះជាតិ នៅតែអះអាងថា ខ្លួននឹងមិនដាក់ឯកសារអ្វីទាំងអស់ ទៅកាន់តុលាការកំពូលដើម្បីការពារខ្លួន តទល់នឹងពាក្យបណ្តឹងសុំឲ្យរំលាយគណបក្សប្រឆាំងនេះឡើយ។
លោក ម៉ៅ មុនីវណ្ណ ប្រធានស្តីទីគណកម្មាធិការប្រតិបត្តិគណបក្សសង្រ្គោះជាតិ ប្រាប់វិទ្យុបារាំងRFI ថាគណបក្សនឹងមិនដាក់តំណាងឬមេធាវីចូលរួមសវនាការទេដោយរងចាំស្តាប់លទ្ធផលពីខាងក្រៅ។លោកបានប្រៀបធៀបសំណុំរឿងនេះទៅនឹងបូសដែលថាបើបម្រុងនឹងធ្លាយឲ្យវាធ្លាយកាន់តែឆាប់ទៅដើម្បីកុំឲ្យឈឹចាប់យូរ។
គួររំលឹកជូនថា កាលពីថ្ងៃទី ០៦ តុលា ក្រុមមេធាវីក្រសួងមហាផ្ទៃបានដាក់ពាក្យបណ្តឹងសុំរំលាយគណបក្សសង្គ្រោះជាតិនេះ ទៅកាន់តុលាការកំពូល ដោយភ្ជាប់ជាមួយនូវភស្តុតាងចំនួន២១កញ្ចប់ ដែលអះអាងថា ជាសម្រង់សម្ដីរបស់លោក កឹម សុខា រួមជាមួយវីដេអូឃ្លីបចំនួនបីដែលបង្ហាញថា គណបក្សសង្គ្រោះជាតិបានត្រូវរ៉ូវជាមួយបរទេស ដើម្បីប៉ុនប៉ងផ្តួលរំលំរដ្ឋាភិបាលកម្ពុជា។ ប៉ុន្តែនៅក្នុងសេចក្តីថ្លែងការណ៍ចុងក្រោយរបស់គណបក្សសង្គ្រោះជាតិ កាលពីថ្ងៃទី ២៧ តុលា បានគូសបញ្ជាក់ថា គណបក្សសង្គ្រោះជាតិ មិនបានធ្វើអ្វីខុសច្បាប់នោះទេ ហើយគណបក្សប្រឆាំងដ៏ធំមួយនេះបានជំទាស់ដាច់ខាតនូវការប៉ុនប៉ងរំលាយគណបក្សសង្គ្រោះជាតិ។ បន្ថែមលើនេះ សេចក្តីថ្លែងការណ៍នេះយល់ឃើញថា ការរំលាយគណបក្សសង្គ្រោះជាតិនេះ គឺជារឿងនយោបាយសុទ្ធសាធ និងបានទាមទារសុំឲ្យមានការដោះស្រាយតាមផ្លូវនយោបាយវិញ។
សូមបញ្ជាក់ថា ពាក្យបណ្តឹងសុំឲ្យរំលាយគណបក្សសង្គ្រោះជាតិដែលកំពុងស្ថិតនៅក្នុងដៃរបស់តុលាការកំពូលនេះ គឺធ្វើឡើងខណៈដែលវិសោធនកម្មច្បាប់ចំនួនបួន ដែលបើកផ្លូវឲ្យមានការយកអាសនៈគណបក្សដែលត្រូវរំលាយទៅបែងចែកឲ្យគណបក្សដទៃនោះ ទើបតែត្រូវបានព្រះមហាក្សត្រឡាយព្រះហត្ថលេខាដាក់ឲ្យប្រើប្រាស់កាលពីថ្ងៃទី២៥ តុលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ