ក្រសួងការបរទេស ប្រកាសថាមិនមានពលរដ្ឋខ្មែរ ក្នុងគ្រោះថ្នាក់ផ្ទុះគ្រាប់បែកនៅថៃ តែស្នើឲ្យប្រុងប្រយ័ត្ន
ក្រសួងការបទេសកម្ពុជា បានស្នើឲ្យពលរដ្ឋខ្មែរ ដែលធ្វើដំណើរកម្សាន្ត ទៅធ្វើជំនួញ និងពិនិត្យសុខភាព នៅក្នុងប្រទេសថៃជាដើម ត្រូវមានការប្រុងប្រយ័ត្នខ្ពស់។ ការប្រកាសនេះ ធ្វើឡើងបន្ទាប់ពីមានការបំផ្ទុះគ្រាប់បែក នៅកណ្តាលទីក្រុងបាងកក កាលពីយប់មិញ ដែលបានបណ្តាលឲ្យមានមនុស្សស្លាប់ និងរបួសជាច្រើននាក់។ យ៉ាងណាក៏ដោយ មកដល់ព្រឹកថ្ងៃអង្គារនេះ អ្នកនាំពាក្យក្រសួងការបរទេសកម្ពុជា បានប្រាប់ថា នៅមិនទាន់រកឃើញថា មានជនរងគ្រោះខ្មែរ នៅក្នុងគ្រោះថ្នាក់បំផ្ទុះគ្រាប់បែកនោះនៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
ស្ថានទូតខ្មែរប្រចាំទីក្រុងបាងកក ប្រទេសថៃ កំពុងតែធ្វើការស្វែងរកព័ត៌មានបន្ថែមទៀត ថាតើមានពលរដ្ឋខ្មែររងគ្រោះ នៅក្នុងគ្រោះថ្នាក់ ផ្ទុះគ្រាប់បែកមួយ នាទីប្រជុំជន កណ្តាលទីក្រុងបាងកក ឬអត់។ យ៉ាងណាក៏ដោយ មកដល់ព្រឹកថ្ងៃអង្គារនេះ មិនទាន់មានការបញ្ជាក់ថា មានពលរដ្ឋខ្មែរ ស្ថិតនៅក្នុងចំណោមជនរងគ្រោះជាច្រើននាក់នោះទេ។ នេះបើតាមការបញ្ជាក់ប្រាប់វិទ្យុបារាំងអន្តរជាតិ ពីអ្នកនាំពាក្យក្រសួងការបរទេសកម្ពុជា លោកជុំ សន្ទរី។
អ្នកនាំពាក្យរូបនេះ បានបន្ថែមថា ស្ថានទូតកម្ពុជានៅប្រទេសថៃ ក៏បានផ្តល់ព័ត៌មាន និងស្នើឲ្យពលរដ្ឋខ្មែរ ដែលនៅទីនោះ ជាពិសេសគឺពលរដ្ឋ ដែលធ្វើដំណើរកម្សាន្ត ទៅធ្វើជំនួញ ឬទៅពិនិត្យសុខភាពជាដើម ត្រូវមានការប្រុងប្រយ័ត្នខ្ពស់ ដោយខ្លួនឯង។ ប្រុងប្រយ័ត្ន ដោយមិនត្រូវទៅទីប្រជុំជន ដែលមានមនុស្សច្រើនកកកុញ ព្រោះថាភេរវជន ចូលចិត្តបង្កមុខសញ្ញាគ្រោះថ្នាក់នៅកន្លែងប្រភេទនេះ។
លោកជុំ សន្ទរី បានឲ្យដឹងថា ទោះជាមានហេតុការណ៍យ៉ាងនេះក្តី ក៏កម្ពុជា មិនទាន់ចេញជាការហាមប្រាមពលរដ្ឋខ្មែរ មិនឲ្យធ្វើដំណើរទៅប្រទេសថៃនោះដែរ។ ក្រសួង និងស្ថានទូត ត្រូវការប្រមូលព័ត៌មានពីស្ថានការណ៍ជាក់លាក់ ឲ្យបានជាមុនសិន។ ហើយកម្ពុជា នឹងបន្តស៊ើបពីមូលហេតុនៃរឿងនេះ ជាមួយនឹងព្រះរាជាណាចក្រថៃ ព្រោះមានពលរដ្ឋខ្មែរជាច្រើន ក៏បាននឹងកំពុងរស់នៅ និងស្នាក់នៅក្នុងប្រទេសថៃផងដែរ។
គួរជម្រាបជូនថា កាលពីវេលាម៉ោងប្រមាណជិត ៧យប់ ថ្ងៃចន្ទម្សិលមិញ ម៉ោងក្នុងស្រុក មានករណីផ្ទុះគ្រាប់បែកមួយ បានកើតឡើង នៅមុខទីព្រះភូមិ អេរ៉ាវ៉ាន់ កណ្តាលក្រុងបាងកក និងជាទីដែលមានព័ទ្ធជុំវិញ ដោយមជ្ឈមណ្ឌលពាណិជ្ជកម្មធំៗ។ មនុស្សជាច្រើននាក់ បានស្លាប់ និងរងរបួស នៅក្នុងហេតុការណ៍នោះ។ អាជ្ញាធរថៃ បានបញ្ជាក់ថា ការបំផ្ទុះនេះ គឺមានចេតនាសំដៅទៅលើក្រុមជនបរទេស ព្រោះក្នុងចំនោមអ្នកស្លាប់សរុប ក៏មានជនបរទេសជិតពាក់កណ្តាលផងដែរ។ ជនបរទេសទាំងនោះ ភាគច្រើន គឺជាជនជាតិអាស៊ី មកពីចិន ហុងកុង ម៉ាឡេស៊ី និង សិង្ហបុរី ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ