ថៃកំណត់អត្តសញ្ញាណជនសង្ស័យបំផ្ទុះគ្រាប់បែក
អាជ្ញាធរថៃ នៅថ្ងៃអង្គារនេះ កំពុងតែតាមប្រមាញ់ជនសង្ស័យម្នាក់ ដែលមានវត្តមាននៅជិតកន្លែងបំផ្ទុះគ្រាប់បែក នៅកណ្ដាលក្រុងបាងកក កាលពីយប់មិញ។ បុរសសង្ស័យនេះ ត្រូវរបបយោធាថៃសន្និដ្ឋានថា ជាក្រុមអាវក្រហមប្រឆាំងរដ្ឋាភិបាល។ នាយករដ្ឋមន្ដ្រីថៃ លោក ប្រាយុទ្ធ ចាន់អូចា បានដាក់បញ្ជាឲ្យក្រុមស៊ើបអង្កេត បាញ់មុខព្រួញទៅរកក្រុមប្រឆាំងរដ្ឋាភិបាល ដែលមានភក្ដីភាពស្មោះស្ម័គ្រចំពោះគ្រួសារលោកថាក់ស៊ីន ស៊ីណាវ៉ាត្រា ជាជាងពួកជនជាតិអ៊ុយហ្គួរ និងក្រុមអ៊ីស្លាមជ្រុលនិយមនៅភាគខាងត្បូងប្រទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
បុរសជាជនសង្ស័យដែលសមត្ថកិច្ចថៃកំពុងស្វែងរកដើម្បីកំណត់អត្តសញ្ញាណនេះ ត្រូវគេប្រទះឃើញមានវត្តមាននៅជិតកន្លែងកើតហេតុបំផ្ទុះគ្រាប់បែក មុខទីព្រះភូមិអេរ៉ាវ៉ាន់ កណ្ដាលក្រុងបាងកក កាលពីយប់ថ្ងៃចន្ទ។ ប្រមុខរដ្ឋាភិបាលយោធាថៃ លោក ប្រាយុទ្ធ ចាន់អូចា គូសបញ្ជាក់ថា រូបភាពជនសង្ស័យបង្ហាញនៅក្នុងវីដេអូ CCTV ប៉ុន្តែវាមិនច្បាស់ទេ ត្រូវស្វែងរកការបញ្ជាក់អត្តសញ្ញាណជាមុនសិន។
រហូតមកទល់រសៀលថ្ងៃអង្គារនេះ ពុំទាន់មានក្រុម ឬជនណាប្រកាសទទួលស្គាល់អំពើភេរវកម្មបំផ្ទុះគ្រាប់បែកទេ។ ប៉ុន្តែរបបយោធាថៃដាក់ការសង្ស័យថា វាជាស្នាដៃរបស់ក្រុមប្រឆាំងរដ្ឋាភិបាល ដែលមានមូលដ្ឋាននៅភាគឦសានប្រទេសថៃ។ ភាគឦសានប្រទេសថៃ ដែលជាបេះដូងនៃចលនាអាវក្រហមប្រឆាំងរដ្ឋាភិបាល និងដែលមានភក្ដីភាពស្មោះស្ម័គ្រចំពោះគ្រួសារលោកថាក់ស៊ីន ស៊ីណាវ៉ាត្រា។
គួរជម្រាបជូនថា នេះមិនមែនជាលើកទីមួយទេ ដែលអាជ្ញាធរដាក់ការទទួលខុសត្រូវលើក្រុមអាវក្រហម ចំពោះការវាយប្រហារដោយហឹង្សានៅប្រទេសថៃ។ កាលពីខែកុម្ភៈដើមឆ្នាំ២០១៥នេះ របបសឹកថៃបានចោទប្រកាន់ទៅលើក្រុមអាវក្រហម ចំពោះការបំផ្ទុះគ្រាប់បែកចំនួនពីរ នៅក្បែរហាងទំនិញដ៏ពេញនិយមមួយ បណ្ដាលឲ្យមនុស្សម្នាក់រងរបួស។
ចំពោះហេតុការណ៍បំផ្ទុះគ្រាប់បែកថ្មីនេះ ក្រៅតែពីក្រុមអាវក្រហមប្រឆាំងរបបយោធា សមត្ថកិច្ចបានដាក់ការសង្ស័យទៅលើក្រុមអ៊ីស្លាមជ្រុលនិយម បះបោរចង់ផ្ដាច់ទឹកដីកំរិតមធ្យមនៅភាគខាងត្បូងបំផុតនៃប្រទេស និងពួកជនជាតិអ៊ុយហ្គួរ ដែលត្រូវបានថៃបញ្ជូនទៅប្រទេសចិនកាលពីដើមខែកក្កដា។ ប៉ុន្តែចុងក្រោយនេះ នាយករដ្ឋមន្ដ្រី ប្រាយុទ្ធ ចាន់អូចា បានដាក់បញ្ជាឲ្យក្រុមស៊ើបអង្កេត បាញ់មុខព្រួញទៅរកក្រុមអាវក្រហមប្រឆាំងរដ្ឋាភិបាលនេះ ជាជាងពួកជនជាតិអ៊ុយហ្គួរ ឬក្រុមអ៊ីស្លាមជ្រុលនិយមនៅភាគខាងត្បូងប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ