បន្ទប់ស្ថានការណ៍វាយតម្លៃថា ដំណើរការបោះឆ្នោតរលូននិងសន្តិវិធី
ដំណើរការបោះឆ្នោតនៅថ្ងៃនេះ ប្រព្រឹត្តទៅដោយរលូន និងដោយសន្តិវិធី។ នេះគឺជាការវាយតម្លៃបឋមរបស់បន្ទប់ស្ថានការរៀបចំការបោះឆ្នោតនៅ ល្ងាចថ្ងៃអាទិត្យនេះ។ ត្បិតតែដំណើរការដោយរលូនក៏ពិតមែន បន្ទប់ស្ថានការណ៍នៅតែរកឃើញភាពមិនប្រក្រតីមួយចំនួនទៀតកើតឡើង ក្នុងថ្ងៃបោះឆ្នោត។
ចុះផ្សាយនៅថ្ងៃ៖
ស្តាប់ - ០១:៤១
ភាពមិនប្រក្រតីទាំងនោះរួមមានៈ ខ្វះសម្ភារៈបោះឆ្នោតនៅការិយាល័យដែលមានទឹកលិច។ វត្តមានរបស់អាជ្ញាធរគ្មានភារកិច្ចក្នុងបរិវេណការិយាល័យបោះឆ្នោត។ ការហាមឃាត់អ្នកសង្កេតការណ៍ ឬភ្នាក់ងារគណបក្សនយោបាយចូលក្នុងការិយាល័យបោះឆ្នោត។ ជាក់ស្ដែងអ្នកអង្កេតការណ៍បោះឆ្នោតនៅស្រុកលើកដែក ខេត្តកណ្ដាល បានរងការគំរាមកំហែងពីអាជ្ញាធររហូតដល់បោះបង់ការចូលរួមអង្កេតការណ៍។
បន្ទប់ស្ថានការណ៍ការបានកត់សម្គាល់ថា អាជ្ញាធរបានហាមឃាត់ប្រជាពលរដ្ឋមិនឲ្យចូលរួមសង្កេតការរាប់សន្លឹកឆ្នោតនៅស្ទើរគ្រប់ការិយាល័យបោះឆ្នោតទូទាំងប្រទេស។
សូមបញ្ជាក់ថា បន្ទប់ស្ថានការណ៍បានដាក់អ្នកសង្កេតការណ៍នាក់ ដែលចំនួនគ្រប់ដណ្ដប់ស្ទើរតែគ្រប់ការិយាល័យបោះឆ្នោតនៅទូទាំងប្រទេស។
ចំណែកអង្គការតម្លាភាពកម្ពុជាដែលដាក់អ្នកសង្កេតការណ៍ជិត១ពាន់នាក់ និងមានបច្ចេកទេសសង្កេតបែបទំនើបផងនោះមើលឃើញថា ស្រដៀងនឹងបន្ទប់ស្ថានការណ៍រៀបចំការបោះឆ្នោតដែរ។
ហើយចំពោះការិយាល័យបោះឆ្នោតស្ថិតក្នុងសាលាបឋមសិក្សាស្ទឹងមានជ័យពីរ ដែលធ្លាប់កើតមានអំពើហិង្សាកាលពីឆ្នាំ២០១៣ ក៏កើតមានភាពមិនប្រក្រតីមួយចំនួនផងដែរ។ នោះគឺប្រជាពលរដ្ឋដែលមកបោះឆ្នោតគ្មានអត្តសញ្ញាណបណ្ណមិនត្រូវបានអនុញ្ញត្តឲ្យចូលទៅបោះឆ្នោតឡើយ។ ដោយសារតែបញ្ហានេះ ហើយទើបគ.ជ.ប បញ្ជាឲ្យចេញឯកសារបញ្ជាក់អត្តសញ្ញាណបម្រើឲ្យការបោះឆ្នោតជូនពលរដ្ឋនៅថ្ងៃបោះឆ្នោតនេះតែម្ដង។
ទោះមានបញ្ហាប្រឈមខ្លះៗដែលបានកើតឡើងក៏ដោយ បន្ទប់ស្ថានការណ៍បានចូលរួមអបអរសាទរចំពោះការចេញទៅបោះឆ្នោតរបស់ប្រជាពលរដ្ឋច្រើនជាង៨០ភាគរយនៃចំនួនប្រជាពលរដ្ឋមានឈ្មោះក្នុងបញ្ជីបោះឆ្នោតនាថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ