ប្រធាន ADB ប្រចាំកម្ពុជា៖ ប្រទេសកម្ពុជានឹងរក្សាបាននូវកំណើនសេដ្ឋកិច្ចយ៉ាងរឹងមាំក្នុងរយៈពេលពីរឆ្នាំទៅមុខ
ធនាគារអភិវឌ្ឍន៍អាស៊ី ADB កាលពីថ្ងៃទី៣មេសា បានព្យាករណ៍ថាកំណើនសេដ្ឋកិច្ចកម្ពុជានឹងកើនឡើងប្រមាណ៧% នៅឆ្នាំ២០១៩នេះ និង៦,៨%នៅឆ្នាំក្រោយ។ ទន្ទឹមនឹងមានភាពរឹងមាំ ២ឆ្នាំជាប់គ្នាខាងមុខ កម្ពុជាក៏មានការប្រឈមនឹងបញ្ហាសំខាន់ៗមួយចំនួនផងដែរ។
ចុះផ្សាយនៅថ្ងៃ៖
ស្តាប់ - ០២:៥៦
នាយិការធនាគាអភិវឌ្ឍន៍អាស៊ី ADB ប្រចាំប្រទេសកម្ពុជា លោកស្រី Sunniya Durrani-Jamal ថ្លែងថា ប្រទេសកម្ពុជានឹងរក្សាបាននូវកំណើនសេដ្ឋកិច្ចយ៉ាងរឹងមាំក្នុងរយៈពេលពីរឆ្នាំទៅមុខបើទោះជាកំណើនសេដ្ឋកិច្ច របស់ប្រទេសឧស្សាហកម្មធំៗចុះខ្សោយក៏ដោយ។ កត្តាសំខាន់មួយដែលអាចទាក់ទាញ និងរក្សាឱ្យបាននូវកំណើនក្នុងរយៈពេលវែង គឺកត្តាគុណភាពធនធានមនុស្សរបស់កម្ពុជា ដែលរួមបញ្ជូលទាំង ជំនាញបច្ចេកទេស និងជំនាញ វិជ្ជាជីវៈដែលអាចឆ្លើយតបទៅនឹងតម្រូវការរបស់វិស័យឯកជន។ នេះបើតាមលោកស្រី Sunniya Durrani-Jamal។
របាយការណ៍សេដ្ឋកិច្ចប្រចាំឆ្នាំពិសេសរបស់ធនាគារអភិវឌ្ឍន៍អាស៊ី ADB បង្ហាញថា ដោយសារកំណើនសេដ្ឋកិច្ចរបស់ប្រទេសជឿនលឿន និងរបស់ប្រទេសចិន ដែលជាទីផ្សារនាំចេញដ៏សំខាន់របស់កម្ពុជា ត្រូវបានព្យាករណ៍ថានឹងមានការថយចុះនោះ ធ្វើឲ្យកំណើននៃការនាំចេញ និងវិស័យទេសចរណ៍កម្ពុជា ទំនងជានឹងថមថយបន្តិច បើធៀបទៅនឹងឆ្នាំមុន។
របាយការណ៍ស្តីពីទស្សនវិស័យអភិវឌ្ឍន៍អាស៊ី (ADO) ឆ្នាំ២០១៩ របស់ADB បញ្ជាក់ថាកំណើនទិន្នផលឧស្សាហកម្ម ទំនងជាថយចុះពីប្រមាណ១០,៨% ក្នុងឆ្នាំ២០១៨ មកនៅត្រឹម ១០,១% ក្នុងឆ្នាំ២០១៩។ កំណើននៃវិស័យសេវាកម្ម នឹងថមថយបន្តិចពី៦,៩% កាលពីឆ្នាំមុន មក៦,៨%ក្នុងឆ្នាំ២០១៩។ វិស័យកសិកម្ម ត្រូវបានព្យាករណ៍ថា មានកំណើនប្រមាណ ១,៧%ពោលគឺថយចុះបន្តិចពី១,៨%កាលពីឆ្នាំមុន។ ឱនភាពសារពើពន្ធ ត្រូវបានគ្រោងទុកក្នុងកម្រិត ៤,៥% នៃផលិតផលក្នុងស្រុកសរុប(ផ.ស.ស) នៅឆ្នាំនេះ បើធៀបនឹង៥,១% នៃ ផ.ស.ស ដែលបានគ្រោងទុកកាលពីឆ្នាំមុន។
ជាមួយគ្នានេះ ADB ក៏បានលើកឡើងពីបញ្ហាប្រឈមផងដែរ ដោយរួមមាន ទី១. ការចុះខ្សោយនៃកំណើនសេដ្ឋកិច្ចក្នុងសកលលោក ដែលអាចមានល្បឿន លឿនជាងការរំពឹងទុក។ ទី២. សហភាពអឺរ៉ុបបន្តអនុវត្តផែនការ ព្យួរការផ្តល់ភាពអនុគ្រោះផ្នែកពាណិជ្ជកម្មដល់ប្រទេសកម្ពុជា EBAនិងទី៣. កំណើនឥណទានក្នុងកម្រិតខ្ពស់ និងការប្រមូលផ្តុំឥណទានក្នុងវិស័យអចលនទ្រព្យ បង្កហានិភ័យដល់ស្ថិរភាពវិស័យហិរញ្ញវត្ថុ។ ហានិភ័យដ៏សំខាន់មួយទៀត គឺគ្រោះរាំងស្ងួត នៅឆ្នាំនេះ។
តាមរបាយការណ៍ ADO ឆ្នាំ ២០១៩ ADB ក៏បង្ហាញពីបញ្ហាប្រឈមដ៏សំខាន់មួយ អំពីគម្លាតជំនាញដែលកើតឡើងដោយសារភាពមិនស៊ីគ្នា រវាងជំនាញដែលកម្លាំងពលកម្មមាន និងជំនាញដែលនិយោជកត្រូវការ។ កម្ពុជាត្រូវការគ្រូបង្រៀនដែលមានគុណភាពបង្រៀនខ្ពស់ច្រើននាក់ថែមទៀត និងត្រូវផ្តល់ការគាំទ្រផ្នែកហិរញ្ញវត្ថុដល់សិស្សក្រីក្រ ដែលរៀនពូកែ ដើម្បីជួយឱ្យពួកគេបន្តការសិក្សា និងរៀនជំនាញដែលត្រូវការ ក្នុងយុគសម័យឌីជីថល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ