កម្ពុជា-វៀតណាម សន្យាពន្លឿនការបោះបង្គោលព្រំដែនគោក និងធានាសិទ្ធស្របច្បាប់អនិកជនវៀតណាមនៅកម្ពុជា
ប្រធានាធិបតីថ្មីនៃសាធារណរដ្ឋសង្គមនិយមវៀតណាមលោក ត្រាន់ ដាយក្វាង បានបញ្ចប់ដំណើរទស្សនកិច្ចជាផ្លូវរដ្ឋរយៈពេល២ថ្ងៃនៅកម្ពុជាហើយ នៅល្ងាចថ្ងៃទី១៦មិថុនា ឆ្នាំ២០១៦នេះ។ ក្រោយបញ្ចប់ដំណើរទស្សនកិច្ចនេះ ភាគីទាំងពីរ បានចេញសេចក្តីថ្លែងការណ៍រួមមួយ ដោយមានខ្លឹមសារចំនួន១៣ចំណុច ក្នុងនោះភាគីទាំងពីរក៏បានសន្យារួមគ្នា ដោះស្រាយលើបញ្ហាព្រំដែនដែលនៅសេសសល់ និងពន្លឿនការបោះបង្គោលព្រំដែនរវាងប្រទេសទាំងពីរឲ្យបានឆាប់ចប់ផងដែរ។
ចុះផ្សាយនៅថ្ងៃ៖
ស្តាប់ - ០២:៥៤
នៅក្នុងសេចក្តីថ្លែងការណ៍រួមដែលមានកម្រាស់៤ទំព័រនិងមានខ្លឹមសារចំនួន១៣ចំណុចនេះ ភាគីទាំងពីរ បានសន្យាអនុវត្តឲ្យបានពេញលេញនូវគោលការណ៍ដែលមានចែងក្នុងសេចក្តីថ្លែងការណ៍រួមកម្ពុជា-វៀតណាម ឆ្នាំ១៩៩៩,ឆ្នាំ២០០៥, ឆ្នាំ២០០៩,ឆ្នាំ២០១១និងឆ្នាំ២០១៤ដើម្បីគោរពទៅវិញទៅមកនូវឯករាជ្យភាព អធិបតេយ្យភាព បូរណភាពទឹកដី ការមិនជ្រៀតជ្រែកកិច្ចការផ្ទៃក្នុងគ្នា រួមទាំងការមិនអនុញ្ញាតឲ្យមានកម្លាំងអមិត្តណាមួយ ប្រើប្រាស់ទឹកដីរបស់ខ្លួន ដើម្បីគំរាមកំហែងសន្តិសុខប្រទេសមួយទៀត រួមទាំងការសន្យាដោះស្រាយរាល់បញ្ហាដោយការចរចារនិងសន្តិវិធីផងដែរ។
គួរជំរាបជូនថា លោក ត្រាន់ ដាយក្វាង ប្រធានាធិបតីវៀតណាមបានមកបំពេញទស្សនកិច្ចរយៈពេលពីរថ្ងៃនៅកម្ពុជា ចាប់ពីថ្ងៃទី១៥-១៦ ខែមិថុនាឆ្នាំ២០១៦ ដោយបានជួបជាមួយមន្ត្រីសំខាន់ៗរបស់កម្ពុជា ដូចជា ប្រធានព្រឹទ្ធសភាលោក សាយ ឈុំ,ប្រធានរដ្ឋសភាលោក ហេងសំរិន,នាយករដ្ឋមន្ត្រីកម្ពុជាលោក ហ៊ុន សែន និងក៏បានចូលបង្គំគាល់ព្រះមហាក្សត្រកម្ពុជា នៅក្នុងព្រះបរមរាជវាំងផងដែរ។ ក្រៅពីនេះ ប្រធានរដ្ឋវៀតណាម លោក ត្រាន់ ដាយក្វាង និងភរិយាលោកស្រី ង្វៀន ធីហៀន ក៏បានទៅថ្វាយបង្គំសម្តេចសង្ឃរាជ្យទាំងពីរគណៈ និងទៅគោរពវិញ្ញាណក្ខន្ធយុទ្ធជនកម្ពុជានៅវិមានឯករាជ្យ, គោរពវិញ្ញាណក្ខន្ធព្រះបរមរតនកោដ្ឋ និងស្តូបមិត្តភាពកម្ពុជា-វៀតណាម ដែលស្ថិតនៅលើសួនច្បារមុខវត្តបុទុមវត្តីផងដែរ។
នៅក្នុងសេចក្តីថ្លែងការណ៍រួមក្រោយបញ្ចប់ដំណើរទស្សនកិច្ចជាលើកទី១នៅកម្ពុជានេះ ភាគីទាំងពីរ ក៏បានបញ្ជាក់សាជាថ្មីថា និងបន្តអនុវត្តឲ្យបានពេញលេញនូវបណ្តាសន្ធិសញ្ញា កិច្ចព្រមព្រៀង និងអនុស្សារណៈ នៃការយោគយល់គ្នាស្តីពីបញ្ហាព្រំដែនរវាងប្រទេសទាំងពីរ និងបានប្តេជ្ញាចិត្តក្នុងការស្វែងរកដំណោះស្រាយជាស្ថាពរ នូវចំណុចព្រំដែនសេសសល់នៅតាមបណ្តោយព្រំដែនកម្ពុជា-វៀតណាម ដើម្បីបញ្ចប់ការងារខណ្ឌសីមា និងការបោះបង្គោលព្រំដែនគោកឲ្យបានឆាប់តាមដែលអាចធ្វើទៅបាន ក្នុងគោលបំណងកសាងខ្សែបន្ទាត់ព្រំដែន នៃសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍ ប្រកបដោយចីរភាពរវាងកម្ពុជា និងវៀតណាម។ សូមបញ្ជាក់ថា ការបោះបង្គោលព្រំដែន កម្ពុជា-វៀតណាម បច្ចុប្បន្នសម្រេចបានប្រមាណជា៨០%ហើយក្នុងចំណោមខ្សែបន្ទាត់ព្រំដែនគោកប្រមាណ១២៧០គីឡូម៉ែត្រ។
លើបញ្ហាពានិជ្ជកម្មភាគីទ្វេភាគីវិញ ភាគីទាំងពីរក៏បានសន្យាពិនិត្យឡើងវិញ នូវគោលនយោបាយទាំងឡាយ ដើម្បីសម្រេចឲ្យបាននូវទំហំពានិជ្ជកម្មទ្វេភាគីប្រមាណជា ៥ពាន់លានដុល្លាអាមេរិកនាបណ្តាឆ្នាំខាងមុខ។ លើបញ្ហាជនអន្តោប្រវេសន៍វៀតណាមវិញ លោកប្រមុខរដ្ឋ វៀតណាម ត្រាន់ ដាយក្វាង ក៏បានបង្ហាញក្តីសង្ឃឹមថា ភាគីកម្ពុជានឹងចាត់វិធានការក្នុងការធានាសិទ្ធិស្របច្បាប់របស់អនិកជនវៀតណាមដែលកំពុងរស់នៅកម្ពុជា ដូចអនិកជនបរទេសដទៃទៀតដែរ នៅក្នុងស្មារតីជាអ្នកជិតខាងល្អ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ