៤មិថុនា២០១៦៖៦៧ឆ្នាំហើយដែលខ្មែរកម្ពុជាក្រោមរងការធ្វើទុក្ខពីវៀតណាម
ក្រោយពីបានការអនុញ្ញាតពីសាលារាជធានីភ្នំពេញ នៅថ្ងៃទី ៤មិថុនានេះ សហគមន៍ខ្មែរកម្ពុជាក្រោម បានប្រារព្ធខួប ៦៧ឆ្នាំ នៃការបាត់បង់ទឹកខ្មែរកម្ពុជាក្រោម ក្នុងវត្តពោធិយារាម ហៅវត្តចាស់ ស្ថិតនៅរាជធានីភ្នំពេញ។ ពិធីដែលមានទាំងការរាប់បាត្រព្រះសង្ឃចំនួន ១ពាន់៩៤៩អង្គនេះ ទទួលបានការចូលរួមពីព្រះរាជតំណាងព្រះមហាក្សត្រ តំណាងរាស្ត្រគណបក្សសង្គ្រោះជាតិ និងប្រជាពលរដ្ឋខ្មែរកម្ពុជាក្រោម ជាច្រើនពាន់នាក់។ ថ្លែងក្នុងពិធីនោះ ប្រធានសហគមន៍ខ្មែរកម្ពុជាក្រោម បានរៀបរាប់ពីទុក្ខវេទនារបស់ពលរដ្ឋ និងព្រះសង្ឃខ្មែរកម្ពុជាក្រោម ដែលត្រូវអាជ្ញាធរវៀតណាមធ្វើទុក្ខបុកម្នេញជាប្រចាំ អស់រយៈពេល ៦៧ឆ្នាំមកហើយ និងបានអំពាវនាវឲ្យមានការរួមគ្នា ទារយកទឹកដីខ្មែរកម្ពុជាក្រោមមកវិញ។
ចុះផ្សាយនៅថ្ងៃ៖
ស្តាប់ - ០៣:២០
៤មិថុនា ១៩៤៩ - ៤មិថុនា ២០១៦ គឺជាខួប ៦៧ឆ្នាំដែលអាណានិគមបារាំង បានកាត់ផ្ទេរទឹកដីខ្មែរកម្ពុជាក្រោម ទៅឲ្យវៀតណាម។ សហគមន៍ខ្មែរកម្ពុជាក្រោម រួមនឹងសមាគមមួយចំនួន ព្រមទាំងព្រះសង្ឃ និងប្រជាពលរដ្ឋផ្សេងទៀត បានចូលរួមក្នុងពិធីនេះយ៉ាងឱឡារិក និងមិនមានការរារាំងអ្វីឡើយ។ ក្នុងនោះ ព្រះមហាក្សត្រនៃព្រះរាជាណាចក្រកម្ពុជា ទ្រង់ក៏បានប្រោសព្រះរាជទាន សម្តេច ស៊ីសុវត្តិ ពង្សនារី មុនីពង្ស ដើម្បីយាងជាព្រះរាជតំណាងដ៏ខ្ពង់ខ្ពស់ជំនួសព្រះអង្គផងដែរ។
ក្រៅពីនោះ ពីធីរំលឹកខួប ដែលបានប្រារព្ធឡើង នៅវត្តពោធិយារាម ហៅវត្តចាស់ ស្ថិតក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ក៏មានវត្តមានរបស់អ្នកតំណាងរាស្ត្រនៃគណបក្សសង្គ្រោះជាតិមួយចំនួនដែរ ប៉ុន្តែមិនមានវត្តមានរបស់តំណាងរាស្ត្របក្សប្រជាជនកម្ពុជានោះឡើយ ទោះបីជាសហគមន៍ខ្មែរកម្ពុជាក្រោម អះអាងថា គេបានអញ្ចើញបក្សកាន់អំណាចជារៀងរាល់ឆ្នាំក៏ដោយ។
ថ្លែងក្នុងទិវារំលឹកខួបនោះ ប្រធានសហគមន៍ខ្មែរកម្ពុជាក្រោម លោកថាច់ សេដ្ឋា បានរៀបរាប់ពីទុក្ខវេទនារបស់ពលរដ្ឋខ្មែរកម្ពុជាក្រោម បន្ទាប់ពីវៀតណាមចូលទៅគ្រប់គ្រងទឹកដីនេះ។ ក្នុងនោះ លោកថាច់ សេដ្ឋា ដែលហៅវៀតណាម ថា«យួន» ពេញៗមាត់ ក៏បានលើកឡើងថា ចលនាប្រារព្ធទិវានេះ ជារៀងរាល់ឆ្នាំ គឺជាការបង្ហាញពីភាពឈឺចាប់របស់ខ្មែរ ឲ្យវៀតណាមបានដឹងថា ខ្មែរមានសាមគ្គីភាពគ្នា។
គួររម្លឹកជូនថា កត្តាសាមគ្គីជាតិរបស់ពលរដ្ឋខ្មែរ និងខ្មែរកម្ពុជាក្រោមកន្លងមក បានធ្វើឲ្យភាគីវៀតណាម មិនសប្បាយចិត្ត ហើយប្រើសកម្មភាពទប់ស្កាត់ផ្សេងៗ។ ប៉ុន្តែមកដល់ពេលនេះ សហគមន៍ខ្មែរកម្ពុជាក្រោម បានអះអាងថា ខ្លួនបានទទួលជោគជ័យ ក្នុងការទាមទារនេះ ដោយសារភាគីបារាំង បានយល់ព្រមជួយផ្តល់ឯកសារទាំងឡាយ ដែលពាក់ព័ន្ធនឹងការកាត់ផ្ទេរទឹកដីខ្មែរកម្ពុជាក្រោម ដែលបារាំងហៅថា កូសាំងស៊ីន ទៅឲ្យអាណានិគមវៀតណាម ត្រួតត្រាបន្ត នៅថ្ងៃទី ៤មិថុនា ១៩៤៩។ ហើយជាលទ្ធផល គឺសហគមន៍ខ្មែរកម្ពុជាក្រោម និងសម្ព័ន្ធយុវជនខ្មែរដើម្បីប្រជាធិបតេយ្យ បានទៅស្រាវជ្រាវ និងរកឃើញឯកសារថតចម្លងជិត ៤ពាន់ទំព័រ និងផែនទីចំនួន ២៤៨ផ្ទាំង ដែលក្នុងនោះមានផែនទីកម្ពុជា ចំនួន ១៥៦ផ្ទាំង និងកម្ពុជាក្រោម ៩២ផ្ទាំង។ បច្ចុប្បន្ន សហគមន៍នេះ បាននិងកំពុងបកប្រែឯកសារដែលគេរកឃើញនោះ ជាភាសាខ្មែរ រួចនឹងរៀបចំបោះពុម្ព ចែកជូនពលរដ្ឋខ្មែរ។
សូមបញ្ជាក់ថា បើតាមឯកសាររបស់សហគមន៍នេះ ទឹកដីកម្ពុជាក្រោមមានផ្ទៃដី ៦៨,៩៦៥គីឡូម៉ែត្រក្រឡា ហើយបច្ចុប្បន្នមានប្រជាជនរស់នៅជាង ១៤លាននាក់ មានវត្តអារាមពុទ្ធសាសនា ៥៦៧វត្ត និងមានព្រះសង្ឃខ្មែរជាង ២ម៉ឺនអង្គគង់នៅ។ ទឹកដីកម្ពុជាក្រោម ពីសម័យដើម មានឈ្មោះថា ហ្វូណន ឬចេនឡាក្រោម ហើយក្រោយមកក៏មានការរួបរួមទៅជាទឹកដីនៃព្រះរាជាណាចក្រកម្ពុជា។ បើតាមប្រវត្តិសាស្ត្រ ទឹកដីនេះ ពីមុនមកមិនដែលមានជាតិសាសន៍ដទៃរស់នៅនោះទេ ប៉ុន្តែក្រោយពីមានការរៀបអភិសេក រវាងព្រះរាជាខ្មែរ ព្រះបាទជ័យជេដ្ឋាទី២ និងបុត្រីនៃរាជវង្សយួន ក្នុងឆ្នាំ ១៦២៣ គេឃើញវត្តមានជនជាតិយួន ចាប់ផ្តើមមករស់នៅលើទឹកដីនេះ។
ក្រោយមកយូរឆ្នាំទៀត គឺនៅឆ្នាំ ១៩៤៩ ពេលចប់សង្គ្រាមលោកលើកទី២ បារាំង បានកាត់ទឹកដីនេះទៅឲ្យវៀតណាម។ ហើយពលរដ្ឋ និងព្រះសង្ឃខ្មែរកម្ពុជាក្រោម នៅទីនោះ អះអាងថា រដ្ឋអាជ្ញាវៀតណាម បានប្រើអំពើហិង្សាយ៉ាងព្រៃផ្សៃ ប្រើទណ្ឌកម្ម បង្ខិតបង្ខំ កាត់ទោសប្រហារជីវិត និងចាប់ដាក់គុក ពលរដ្ឋ ឬព្រះសង្ឃខ្មែរណា ដែលហ៊ានប្រើសកម្មភាពទាមទារទឹកដីកម្ពុជាក្រោម មកជារបស់ខ្មែរវិញ។ ក្នុងនោះ វៀតណាម ថែមទាំងព្យាយាមបំបាត់ទំនៀមទម្លាប់ ប្រពៃណី និងសាសនារបស់ជនជាតិដើមខ្មែរ លើទឹកដីខ្មែរកម្ពុជាក្រោមទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ