អង្គការតម្លាភាពប្រកាសធ្វើការងារសង្កេតការណ៍បោះឆ្នោតខុសប្លែកពីគេ
អង្គការតម្លាភាពកម្ពុជានៅថ្ងៃចន្ទនេះ បានប្រកាសដាក់អ្នកចូលរួមសង្កេតការណ៍បោះឆ្នោតចំនួន ៨២០នាក់។ ប្រធានអង្គការតម្លាភាពលោក ព្រាប កុល បានអះអាងថា ការងារអង្កេតរបស់ខ្លួនធ្វើឡើងតាមលក្ខណៈទំនើបវិទ្យាសាស្ត្រដែលស្ថាប័នដទៃមិនធ្លាប់ធ្វើ។ ហើយលទ្ធផលដែលទទួលពីការសង្កេតនេះ គឺផ្ដល់ភាពសុក្រឹត្យជាង ការសង្កេតលក្ខណៈបុរាណទៅទៀត។
ចុះផ្សាយនៅថ្ងៃ៖
ស្តាប់ - ០២:០៩
---សំឡេង---
បន្ថែមពីលើនេះទៀតអ្នកអង្កេតការណ៍របស់ អង្គការតម្លាភាពកម្ពុជានឹងប្រមូលព័ត៌មានជុំវិញសកម្មភាពមិនប្រក្រតីណាមួយនៅថ្ងៃបើកនិងបិទការិយាល័យបោះឆ្នោត រួមទាំងថ្ងៃរាប់សន្លឹកឆ្នោត នៅតាមការិយាល័យបោះឆ្នោត ៤១០កន្លែង ដែលតម្លាភាព បានបញ្ជូនអ្នកសង្កេតការណ៍របស់ខ្លួនទៅដល់ទីនោះគ្រប់២៥រាជធានី ខេត្ត។ បន្ថែមពីលើនេះទៀតតម្លាភាពក៏នឹងពិនិត្យទៅលើស្ថានភាពនៃការជួយសម្រួលដល់ជនពិការផងដែរ។
ត្បិតតែចំនួនអ្នកសង្កេតការណ៍មានចំនួន ៤១០នាក់ តិចជាងការិយាល័យបោះឆ្នោត ២ម៉ឺនការិយាល័យក៏ពិតមែន លោក ព្រាប កុល ប្រធានអង្គការតម្លាភាពកម្ពុជា គូសបញ្ជាក់ថា លទ្ធផលដែលទទួលបាននឹងមានភាពសុក្រឹត្យ ដែលអាចជួយបញ្ចៀសជម្លោះនយោបាយក្រោយបានការបោះឆ្នោតបាន។
បេសកម្មនៃដំណើរការសង្កេតការណ៍បោះឆ្នោត តាមបែបទំនើបវិទ្យាសាស្ត្រនេះគឺមិនបានជូនដំណឹងទៅបណ្ដាលឃុំសង្កាត់ ដែលអង្គការតម្លាភាពគ្រោងបញ្ជូនអ្នកសង្កេតការណ៍ទៅនោះទេ។ មិនបានជូនដំណឹងព្រោះបារម្ភខ្លាចពីការរៀបចំទុកជាមុននៅបរិយាកាសល្អ។ សូមបញ្ជាក់ថា ការងារសង្កេតការណ៍បោះឆ្នោត តាមលក្ខណៈទំនើបវិទ្យាសាស្ត្រដែលជាដំណើរការមួយខុសប្លែកពីគេនេះ អង្គការតម្លាភាពធ្លាប់ធ្វើម្ដងរួចមកហើយក្នុងការបោះឆ្នោតឆ្នាំ ២០១៣។ បើតាមតម្លាភាពការសង្កេតការណ៍នេះធ្លាប់ធ្វើនៅប្រទេសនានារួចហើយដូចជាហ្វីលីពីនជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ