តុលាការខ្មែរក្រហមនឹងប្រកាសសាលក្រមសំណុំរឿង០០២/០២ ប្រឆាំងនួន ជា និង ខៀវ សំផន នៅចុងឆ្នាំ២០១៨នេះ
អង្គជំនុំជម្រះសាលាដំបូងនៃសាលាក្តីខ្មែរក្រហម កាលពីរសៀលថ្ងៃពុធម្សិលមិញ បានចេញផ្សាយថា តុលាការកូនកាត់នេះ នឹងធ្វើការប្រកាសសាលក្រម លើសំណុំរឿង ០០២/០២ ពាក់ព័ន្ធនឹងជនជាប់ចោទ នួន ជា និងខៀវ សំផន ដោយកំណត់យកថ្ងៃទី១៦ ខែវិច្ឆិកា ឆ្នាំ២០១៨។ ការប្រកាសសាលក្រមនេះ ធ្វើឡើងបន្ទាប់ពីតុលាការ បើកសវនាការសួរដេញដោល រួមទាំងធ្វើសេចក្តីសន្និដ្ឋានផងនោះ អស់រយៈពេលជាង២ឆ្នាំ។
ចុះផ្សាយនៅថ្ងៃ៖
ស្តាប់ - ០២:៣០
អនុលោមតាមវិធានផ្ទៃក្នុង អង្គជំនុំជម្រះសាលាដំបូងតុលាការខ្មែរក្រហម បានកំណត់ពេលវេលារួចហើយថា នឹងប្រកាសសាលក្រមជុំវិញសំណុំរឿង ០០២/០២ លើជនជាប់ចោទ នួន ជា និងខៀវ សំផននៅព្រឹកថ្ងៃសុក្រទី១៦ ខែវិច្ឆិកាឆ្នាំ២០១៨ នេះ។ តាមការប្រកាសរបស់តុលាការកាលពីម្សិលមិញ សវនាការដេញដោលពិនិត្យភស្តុតាងសំណុំរឿង ០០២/០២ បានចាប់ផ្តើមដោយការធ្វើសេចក្តីសន្និដ្ឋានចោទប្រកាន់នៅថ្ងៃទី១៧ ខែ តុលា ឆ្នាំ ២០១៤ និងបានបញ្ចប់នៅថ្ងៃទី១១ ខែមករា ឆ្នាំ២០១៧។
ការជំនុំជម្រះ រួមទាំងការស្តាប់សេចក្តីសន្និដ្ឋានបិទបញ្ចប់កិច្ចពិភាក្សាដេញដោលផង មានរយៈពេលសរុបចំនួន ២៨៣ថ្ងៃ។ ក្នុងអំឡុងពេលសវនាការនេះ អង្គជំនុំជម្រះសាលាដំបូងបានស្តាប់សក្ខីកម្មពីបុគ្គលសរុបចំនួន ១៨៥នាក់ ក្នុងនោះមានសាក្សីបញ្ជាក់អង្គហេតុចំនួន ១១៤នាក់ ដើមបណ្តឹងរដ្ឋប្បវេណីចំនួន ៦៣នាក់ និងអ្នកជំនាញចំនួន ៨នាក់។ សវនាការនេះមានការចាប់អារម្មណ៍យ៉ាងខ្លាំងពីសាធារណជន ដោយមានអ្នកចូលរួមស្តាប់ និងតាមដានសវនាការ ដោយផ្ទាល់ជាង៨ម៉ឺននាក់ផងដែរ។
សូមបញ្ជាក់ថា នៅក្នុងសំណុំរឿង ០០២/០២នេះ នួន ជា ដែលជាអនុលេខាបក្សកុម្មុយនីស្តកម្ពុជា និង ខៀវ សំផន ជាប្រមុខរដ្ឋនៃរបបកម្ពុជាប្រជាធិបតេយ្យ អ្នកទាំងពីរ បានរងបទចោទឧក្រិដ្ឋកម្មប្រឆាំងនឹងមនុស្សជាតិ អំពើប្រល័យពូជសាសន៍ និងការបំពារបំពានយ៉ាងធ្ងន់ធ្ងរទៅលើអនុសញ្ញាទីក្រុងហ្សឺណែវ ពាក់ព័ន្ធទៅនឹងទីតាំងឧក្រិដ្ឋកម្ម និងការចោទប្រកាន់លើអង្គហេតុមួយចំនួន រួមមានការដ្ឋានការងារ និងសហករណ៍ មន្ទីរសន្តិសុខ និងទីតាំងសម្លាប់មនុស្សជាច្រើន ក្នុងនោះមានមន្ទីរសន្តិសុខ ស-២១ ឬគុកទួលស្លែងផងដែរ។ ក្រៅពីនេះ នួន ជា និង ខៀវ សំផន ក៏រងបទចោទ អំពើប្រល័យពូជសាសន៍ទៅលើប្រជាជនចាម និងវៀតណាម ការប្រព្រឹត្តចំពោះពុទ្ធសាសនិកជន និងអតីតមន្ត្រីរដ្ឋការ នៃរបបសាធារណរដ្ឋខ្មែរ និងការរៀបអាពាហ៍ពិពាហ៍នៅទូទាំងប្រទេស ជាដើម។
សូមរំលឹកដែរថា អង្គជំនុំជម្រះសាលាដំបូងនៃសាលាក្ដីខ្មែរក្រហម កាលពីថ្ងៃទី៧ ខែសីហា ឆ្នាំ២០១៤ កន្លងទៅ បានសម្រេចចេញសាលក្រមផ្ដន្ទាទោសអតីតមេដឹកនាំជាន់ខ្ពស់ខ្មែរក្រហម ទាំងពីររូប គឺ នួន ជា និង ខៀវ សំផន ម្តងហើយក្នុងសំណុំរឿង០០២/០១ ឱ្យជាប់ពន្ធនាគារអស់មួយជីវិត ជុំវិញឧក្រិដ្ឋកម្ម ដែលបានកើតឡើងក្នុងរបបកម្ពុជាប្រជាធិបតេយ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ