លោក ធន សារាយ៖ អ្នកនយោបាយគួរកាត់បន្ថយការប្រឈមមុខដាក់គ្នាដើម្បីប្រយោជន៍ជាតិ
លោក ធន សារាយ ប្រធានសមាគមអាដហុកដែលកំពុងរស់នៅក្រៅប្រទេសបានចេញមុខជាសាធារណៈកាលពីប៉ុន្មានថ្ងៃមុននេះ ដោយបានផ្ដល់អនុសាសន៍ឲ្យអ្នកនយោបាយនៃគណបក្សកាន់អំណាច និងអតីតគណបក្សប្រឆាំង កាត់បន្ថយការប្រឈមមុខដាក់គ្នាដើម្បីប្រយោជន៍ជាតិ។ ការលើកឡើងរបស់លោក ធន សារ៉ាយ បែបនេះគឺបន្ទាប់ពីមានការចេញសេចក្ដីថ្លែងការណ៍នានា របស់ប្រទេសលោកសេរីចំពោះការបោះឆ្នោតនៅកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងវិដេអូឃ្លីបប្រមាណជាង១០នាទីចេញផ្សាយនៅថ្ងៃទី៣ខែកក្កដា លោក ធន សារាយ បានអះអាងថា ដើម្បីបញ្ចៀសការខាតបង់ផលប្រយោជន៍ជាតិពីការដាក់ទណ្ឌកម្មសេដ្ឋកិច្ច និងយោបាយដ៏ច្រើន នាពេលអនាគត ពីប្រទេសលោកសេរី អ្នកដឹកនាំនយោបាយទាំងពីរគណបក្សគួរកាត់បន្ថយការប្រឈមមុខដាក់គ្នា ហើយខិតខំស្វែងរកដំណោះស្រាយ ដើម្បីធ្វើឲ្យប្រសើរឡើង ខាងលទ្ធិប្រជាធិបតេយ្យ។
ប្រធានសមាគមអាដហុករូបនេះបានអះអាងថា កម្ពុជាប្រឈមនឹងការបាត់បង់ច្រើនទាក់ទងជំនួយ និងទំនាក់ទងសេដ្ឋកិច្ចជាមួយប្រទេសសេរី ប្រសិនបើបន្តនយោបាយដូចរាល់ថ្ងៃនេះ។ នយោបាយដូចសព្វថ្ងៃដែលលោក ធន សារាយ សំដៅការផាត់ចេញនៃអតីតគណបក្សសង្គ្រោះជាតិដែលជាដៃគូរប្រកួតប្រជែងនយោបាយដ៏សំខាន់ជាមួយគណបក្សកាន់អំណាច។
សមាគមការពារសិទ្ធិមនុស្សដែលមានលោកធន សារាយ ជាប្រធាន ហាក់មានភាពល្បីល្បាញមួយរយៈពេលចុងក្រោយ បន្ទាប់ពីករណីចាប់ខ្លួនមន្រ្តីអាដហុក៤នាក់ និងអតីតបុគ្គលិករបស់ខ្លួនម្នាក់ ក្នុងសំណុំរឿងសូកប៉ាន់សាក្សី គឺកញ្ញា ខុមចាន់តារាទី ហៅ ស្រីមុំ កាលពីខែមេសា ឆ្នាំ ២០១៦ ទាក់ទងនឹងលោក កឹម សុខា។ លោក ធន សារាយ ដែលជាប្រធានសមាគមការពារសិទ្ធិមនុស្សអាដហុក ដែលបានចាកចេញពីប្រទេសកម្ពុជា តាំងពីពេលនោះមក នៅមិនទាន់វិលចូលប្រទេសកម្ពុជាវិញនៅឡើយទេ។
ជាការកត់សម្គាល់ការចេញមុខរបស់លោក ធន សារាយ នៅពេលនេះ ធ្វើឡើងបន្ទាប់ពីប្រទេសលោកខាងលិចបានចេញសេចក្ដីថ្លែងការណ៍រិះគន់ដំណើការបោះឆ្នោតនៅកម្ពុជាកាលពីសប្ដាហ៍មុន ថា គ្មានភាពសេរី និងយុត្តិធម៌ ហើយមិនបានតំណាងអោយឆន្ទៈរបស់ប្រជាជនកម្ពុជាទេ ព្រោះមិនមានវត្តមានអតីតគណបក្សសង្រ្គោះជាតិចូលរួមប្រកួត។
បើតាមលោក ធន សារាយ ក្នុងចំណោមគណបក្ស១៩ដែលចូលរួមបោះឆ្នោតពុំមានគណបក្សណាទទួលបានអាសនៈឡើយ។ នេះមានន័យថា មានតែអតីតបក្សសង្គ្រោះជាតិមួយទេដែលជាគូរប្រកួតជាមួយគណបក្សកាន់អំណាច ដែលអាចធ្វើឲ្យការបោះឆ្នោតមួយបង្ហាញពីឆន្ទៈពិតប្រាកដរបស់ពលរដ្ឋនៅទូទាំងប្រទេសបាន។ ហើយការលុបបំបាត់គ្នាដោយវិធីផ្សេងក្រៅពីការបោះឆ្នោតមិនអាចទទួលបានការគាំទ្រពីពលរដ្ឋ និងប្រទេសកាន់លិទ្ធប្រជាធិបតេយ្យបានទេ។ នេះបើតាមលោក ធន សារាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ