អ្នកភូមិបោះបង្គោលយកដីពីក្រុមហ៊ុនសម្បទាន ដោយមិនរង់ចាំដំណោះស្រាយ
ជនជាតិចារ៉ាយ និងទំពួន ប្រហែល១០០នាក់ នាព្រឹកថ្ងៃអាទិត្យនេះ បានធ្វើសកម្មភាពបោះបង្គោលលើដីសម្បទានសេដ្ឋកិច្ចរបស់ក្រុមហ៊ុនឯកជនមួយក្នុងខេត្តរតនគីរី ពេលដែលអាជ្ញាធរមិនទាន់បានដោះស្រាយបណ្ដឹងទាមទាដីព្រៃសហគមន៍របស់ពួកគាត់នៅឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៦
ជនជាតិដើមភាគតិចប្រហែល១០០នាក់ នៅព្រឹកថ្ងៃអាទិត្យ បានបោះបង្គោលលើដីសម្បទានសេដ្ឋកិច្ចរបស់ក្រុមហ៊ុនឯកជនមួយក្នុងខេត្តរតនគីរី ដើម្បីទុកធ្វើជាដីព្រៃសហគមន៍របស់ខ្លួន ដោយមិនមានសេចក្តីសម្រេចជាផ្លូវការពីអាជ្ញាធរមានសមត្ថកិច្ច។
អ្នកតំណាងម្នាក់របស់ជនជាតិចារ៉ាយ និងទំពួនចំនួន១៩៨គ្រួសារ បានអះអាងថា«បានដាក់ពាក្យបណ្ដឹង»ទៅអាជ្ញាធរមានសមត្ថកិច្ចតាំងពីឆ្នាំ២០១៣ ប៉ុន្តែ«មិនទាន់មានដំណោះស្រាយ»។ លោក សល់ យ៉ុន ដែលជាជនជាតិទំពួន បានបន្តទៀតថា សកម្មភាពបោះបង្គោលជាឯកតោភាគីនោះ«ពុំមានការរារាំងឡើយ»។
អ្នកសម្របសម្រួលនៅសមាគមអាដហុកការពារសិទ្ធិមនុស្ស និងអភិវឌ្ឍន៍នៅកម្ពុជា ក្នុងខេត្តរតនគិរី បានឱ្យដឹងថា អង្គការរបស់លោកបានទទួលពាក្យបណ្ដឹងពីអ្នកភូមិកាហល់ ឃុំម៉ាលិក ស្រុកអណ្តូងមាសនោះដែរ។ លោក ឆាយ ធី បានបញ្ជាក់ថា ពួកគេទាមទារដីព្រៃ«ទំហំ៣៦០ហិកតាពីក្រុមហ៊ុនជាំងលី» ដើម្បី«ទុកធ្វើជាព្រៃសហគមន៍»។
ក្រុមហ៊ុនវៀតណាមមួយនេះ ដាំកៅស៊ូលើដីសម្បទានសេដ្ឋកិច្ច ដែលទទួលបានអាជ្ញាប័ណ្ណពីររដ្ឋាភិបាលកម្ពុជានៅឆ្នាំ២០១០។ នេះបើយោងតាមមន្ត្រីសិទ្ធិមនុស្សនៅសមាគមអាដហុក ដែលបានអះអាងថា សកម្មភាពឯកតោភាគីរបស់អ្នកភូមិកើតឡើង«ដោយសារតែអស់ជំនឿលើអាជ្ញាធរ»។
ជនជាតិដើមភាគតិចចំនួន៣ភូមិទៀតនៅក្នុងស្រុកអណ្ដូងមាសនោះ ក៏ធ្វើការអាស្រ័យផលក្នុងព្រៃដែលអ្នកភូមិកាហល់កំពុងតែបោះបង្គោលកំណត់ព្រំដោយគ្មានសេចក្តីសម្រេចតាមផ្លូវច្បាប់ នៅចំពោះមុខអាជាធរឃុំម៉ាលិកនោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ