អំពើហិង្សាមិនទាន់ទៅណាឆ្ងាយពីសង្គមកម្ពុជានៅឡើយ!
ចុះផ្សាយនៅថ្ងៃ៖
ស្តាប់ - ០៥:០៩
អំពើហិង្សាគឺជាវិបត្តិដ៏រីងរៃមួយ ដែលបាននិងកំពុងតែញាំញីសង្គមខ្មែរឲ្យប្រេះស្រាំជារៀងរាល់ថ្ងៃ។ តាមរយៈកាសែត គេតែងតែឃើញមានព័ត៌មានស្ដីពីអំពើហិង្សា ដែលកើតឡើងក្នុងសណ្ឋានផ្សេងៗគ្នា នៅគ្រប់ទីកន្លែងទូទាំងប្រទេស។ ទាំងនេះសរបង្ហាញឲ្យឃើញថា អំពើហិង្សាមិនធ្លាប់ឃ្លាតឆ្ងាយពីសង្គមកម្ពុជាទេ។ ហេតុអ្វីបានជាដូច្នេះ?
អំពើហិង្សានៅតែជាបញ្ហាចាក់ស្រេះនៅក្នុងសង្គមខ្មែរ ដែលកើតមានឡើងជារៀងរាល់ថ្ងៃ។ អំពើហិង្សាមាននៅគ្រប់ទីកន្លែង រាប់តាំងពីគ្រួសារ សាលារៀន កន្លែងធ្វើការ រហូតទៅដល់សង្គមជាតិ។
នៅក្នុងគ្រួសារ អំពើហិង្សាចាប់ផ្ដើមពីការវាយប្រដៅជាការដាក់ទោសកូនតូចៗ រហូតដល់អំពើហិង្សារវាងគូស្វាមីភរិយា ទាំងផ្លូវកាយនិងផ្លូវភេទ។ បញ្ហានេះបានធ្វើឲ្យគ្រួសារជាច្រើនជួបភាពប្រេះស្រាំ បែកបាក់ បន្សល់ទុកនូវជនរងគ្រោះរាប់មិនអស់ ដែលភាគច្រើនជាស្ដ្រីនិងកុមារ។ ចំណែកនៅសាលារៀន ក៏មានកើតអំពើហិង្សាច្រើនយ៉ាងផងដែរ ទាំងពីសំណាក់គ្រូទៅសិស្ស និងរវាងសិស្សគ្នាឯង។ យូរៗម្ដង វីដេអូឃ្លីបស្ដីពីការប្រវាយប្រតប់គ្នារវាងសិស្សស្រីៗ និងការវាយកាប់ចាក់គ្នារវាងសិស្សប្រុសៗ ត្រូវគេបង្ហោះនៅក្នុងបណ្ដាញសង្គម បង្កើតជារលកប្រតិកម្មរិះគន់បានមួយសន្ទុះ មុននឹងស្ងប់ស្ងាត់ទៅវិញ។
ចំណែកនៅកន្លែងធ្វើការ អំពើហិង្សាផ្លូវកាយអាចគ្មាន ក៏ប៉ុន្តែអំពើហិង្សាផ្លូវចិត្ត ការជេរប្រមាថ ដៀលត្មិះ ដៀមដាម អាចកើតមានឡើងគ្រប់ពេលវេលាទាំងអស់។ នៅកន្លែងការងារខ្លះ អំពើហិង្សាអាចកើតមានតាមរយៈផ្លូវសេដ្ឋកិច្ចផងដែរ។
អំពើហិង្សាក្នុងរូបភាពតូចតាចទាំងអស់នេះ បានជះឥទ្ធិពល និងបានរួមចំណែកឲ្យមានអំពើហិង្សានៅក្នុងសង្គម។ អំពើកាប់ចាក់ បាញ់ប្រហារ វាយតប់នៅតាមផ្លូវ ឬនៅតាមផ្សារតែងតែកើតឡើងជារៀងរាល់ថ្ងៃ ដូចដែលមានចុះផ្សាយនៅតាមទំព័រកាសែតជាហូរហែ។ ក្រៅពីនេះ ការប៉ះទង្គិចដោយហិង្សារវាងកងកម្លាំងសន្តិសុខនិងបាតុករនៅរាជធានីភ្នំពេញនាពេលកន្លងមក ក៏ជាភស្តុតាងដែលសរបង្ហាញឲ្យឃើញយ៉ាងច្បាស់ថា អំពើហិង្សាមិនធ្លាប់ឃ្លាតឆ្ងាយពីសង្គមកម្ពុជាទេ។ តើមានមូលហេតុចម្បងៗអ្វីខ្លះ ដែលធ្វើឲ្យកម្ពុជាក្លាយជាសង្គមមួយ ពោរពេញដោយហិង្សាយ៉ាងដូច្នេះ?
មូលហេតុសំខាន់បំផុតគឺទំនៀមទម្លាប់ចាស់គំរឹល ការអប់រំដែលមានកម្រិតទាប និងការមិនយោគយល់អធ្យាស្រ័យឲ្យគ្នាទៅវិញទៅមក។ ក្រៅពីនោះក៏មានផងដែរ ភាពក្រីក្រ ល្បែងស៊ីសង និងគ្រឿងស្រវឹង ដែលបានរួមចំណែកបង្កឲ្យមានអំពើហិង្សាទាំងនៅក្នុងគ្រួសារ សាលារៀន កន្លែងធ្វើការ និងសង្គមជាតិ។
សម្រាប់ប្រទេសកម្ពុជា អំពើហិង្សា គឺជាបន្ទុកដ៏ធំសម្រាប់សង្គមទាំងមូល។ អំពើហិង្សានៅក្នុងសង្គម គឺជាជំងឺរ៉ាំរ៉ៃ ដែលមានសភាពកាន់តែធ្ងន់ធ្ងរឡើងគួរឲ្យបារម្ភ។ តើមានឱសថអ្វីខ្លះ ដែលអាចជួយព្យាបាលជំងឺហិង្សានៅក្នុងសង្គមខ្មែរប្រកបដោយប្រសិទ្ធភាព?
មែនទែនទៅ កន្លងមករាជរដ្ឋាភិបាល និងអង្គការសង្គមស៊ីវិលជាដៃគូ បានធ្វើការងារច្រើនណាស់ ក្នុងបំណងលុបបំបាត់អំពើហិង្សានៅក្នុងសង្គមខ្មែរ ជាពិសេសអំពើហិង្សានៅក្នុងគ្រួសារ។ ជាក់ស្ដែង ច្បាប់ប្រឆាំងនឹងអំពើហិង្សាក្នុងគ្រួសារនិងកិច្ចការពារជនរងគ្រោះ ត្រូវបានអនុម័តដោយរដ្ឋសភាជាតិកាលពីឆ្នាំ២០០៥។ ក្រសួងកិច្ចការនារី កាលពីពេលថ្មីៗនេះ ក៏បានដាក់ចេញនូវផែនការសកម្មភាពជាតិ ស្ដីពីការទប់ស្កាត់អំពើហិង្សាលើស្ដ្រី ឆ្នាំ២០១៤-២០១៨ ផងដែរ។ ចំណែកអង្គការនានា ដែលធ្វើការងារពាក់ព័ន្ធនឹងអំពើហិង្សាក្នុងគ្រួសារ បានសហការជាមួយរាជរដ្ឋាភិបាល ក៏ធ្លាប់បង្កើតឲ្យមានយុទ្ធនាការបំពាក់បូណ៌ពណ៌សដល់បុរសនៅទូទាំងប្រទេស ក្នុងន័យលុបបំបាត់អំពើហិង្សាលើស្ដ្រីទៀតផង។
ដោយឡែក អំពើហិង្សាផ្សេងៗ ដែលមិនមែនកើតឡើងនៅក្នុងក្រុមគ្រួសារ ជនល្មើសនឹងត្រូវផ្ដន្ទាទោសដោយផ្អែកលើក្រមព្រហ្មទណ្ឌដែលកម្ពុជាមានជាធរមាន។ យ៉ាងណាក៏ដោយ ច្បាប់ ផែនការ និងយុទ្ធនាការទាំងនេះ មិនអាចទប់ស្កាត់អំពើហិង្សានៅក្នុងសង្គមខ្មែរប្រកបដោយប្រសិទ្ធភាពនោះទេ។
សម្រាប់សង្គមកម្ពុជា វប្បធម៌ហិង្សាបានចាក់ឫសយ៉ាងជ្រៅ ហើយវាមិនមែនជារឿងងាយឡើយ ក្នុងការដោះស្រាយបញ្ហានេះ។ មានការងារជាច្រើនដែលត្រូវធ្វើ ដោយមានការចូលរួមពីពលរដ្ឋខ្មែរគ្រប់ៗគ្នា។ ក្នុងនោះ បុគ្គលម្នាក់ៗត្រូវតែជម្រុះចោលនូវទម្លាប់ហិង្សាចាស់គំរឹលមួយចំនួន ជំនួសមកវិញនូវការយោគយល់អធ្យាស្រ័យ ការអត់ធ្មត់ និងគោរពសិទ្ធិគ្នាទៅវិញទៅមក។
ការផ្សព្វផ្សាយ និងការពង្រឹងការអនុវត្តច្បាប់ ក៏ជាការងារចាំបាច់ណាស់ដែរ។ ស្ថាប័នពាក់ព័ន្ធទាំងអស់ត្រូវចាប់ដៃគ្នា ធ្វើយ៉ាងណាផ្សព្វផ្សាយច្បាប់ឲ្យបានទូលំទូលាយដល់មូលដ្ឋាន ដើម្បីបង្កើនការយល់ដឹងថា អំពើហិង្សាណាក៏ដោយ គឺជារឿងខុសច្បាប់។ ហើយអ្នកប្រព្រឹត្តអំពើហិង្សា នឹងត្រូវផ្ដន្ទាទោសដោយគ្មានការលើកលែង។ មានតែមធ្យោបាយទាំងនេះទេ ដែលអាចកាត់បន្ថយ និងឈានទៅលុបបំបាត់អំពើហិង្សានៅក្នុងសង្គមខ្មែរប្រកបដោយប្រសិទ្ធភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ