ឯកសារពីខ្មែរក្រហមចំនួន១លានឯកសារ នឹងត្រូវចែកជាសាធារណៈនាសប្ដាហ៍ក្រោយ!
នៅថ្ងៃ៧មករាខាងមុខនេះ មជ្ឈមណ្ឌលឯកសារកម្ពុជា នឹងដាក់ឲ្យដំណើរការគេហទំព័រថ្មីមួយបន្ថែមទៀត ស្តីពី ប្រវត្តិសាស្ត្រខ្មែរក្រហម The Khmer Rouge History។ លោក ឆាំង យុ ប្រធានមជ្ឈមណ្ឌលឯកសារកម្ពុជា បានប្រាប់វិទ្យុបារាំងថា គេហទំព័រថ្មីនេះ មានគោលបំណងសំខាន់បំផុត គឺសម្រាប់ចែកឯកសារដល់សិស្សនិស្សិត ពិសេសយុវជនខ្មែរជាទូទៅ ចំនួនជាង៧០ភាគរយ ដែលកើតក្រោយរបបខ្មែរក្រហម ឲ្យបានសិក្សាឈ្វេងយល់ពីប្រវត្តិពិតរបស់ប្រទេសខ្លួន។
ចុះផ្សាយនៅថ្ងៃ៖
គេហទំព័រថ្មី ដែលមានអាស័យដ្ឋាន www.thekhmerrougehistory.org នឹងដំណើរការនៅថ្ងៃទី៧មករាខាងមុខនេះ គឺជាថ្ងៃដែលរំលំរលាយទៅនៃរបបខ្មែរក្រហម។ ប្រធានមជ្ឈមណ្ឌលឯកសារកម្ពុជា លោក ឆាំង យុ សង្កត់ធ្ងន់ថា ការដាក់ឲ្យដំណើរការគេហទំព័រថ្មី ចំថ្ងៃ៧មករានោះ គឺជាការបង្ហាញពីភាពមិនចុះចាញ់ ឬមិនចុះញ៉មដាច់ខាតចំពោះមុខរបបវាលពិឃាដ។
វត្ថុបំណងសំខាន់ទៀតនោះ គឺដើម្បីប្រមូលផ្តុំឯកសារគ្រប់ប្រភេទ មានបទសម្ភាសន៍ជាសំឡេងនិងជាវីដេអូ រូបភាពដ៏កម្រ ខ្សែភាពយន្តប្រវត្តិសាស្ត្រ សៀវភៅ និងសំណៅឯកសារផ្សេងទៀត សរុបជាង១លានឯកសារ ដាក់ឲ្យអ្នកប្រើអ៊ិនធឺណិត ពិសេសសិស្សនិស្សិតខ្មែរ ប្រមាណ៧០ភាគរយ ដែលចាប់កំណើតក្រោយរបបយង់ខ្នងខ្មែរក្រហម ឲ្យបានសិក្សារៀនសូត្រ។
ទន្ទឹមនេះ រដ្ឋមន្ត្រីក្រសួងអប់រំ បណ្ឌិត ហង់ ជួនណារ៉ុន បានយល់ស្របពីភាពចាំបាច់នៃការសិក្សាប្រវត្តិសាស្ត្រនេះ។ លោកគូសបញ្ជាក់ថា ការសិក្សារពីខ្មែរក្រហម គឺមិនត្រឹមតែមានសារៈសំខាន់ដល់យុវជន ដើម្បីឲ្យយុវជនបានយល់ដឹងអំពីប្រវត្តិសាស្ត្រកម្ពុជាសម័យទំនើបប៉ុណ្ណោះទេ ប៉ុន្តែថែមទាំងអាចយល់ដឹងអំពីដើមហេតុនិងផលវិបាកនៃសោកនាដកម្មក្នុងប្រទេសកម្ពុជា ហើយទប់ស្កាត់កុំឲ្យប្រវត្តិសាស្ត្របែបនេះ កើតឡើងជាថ្មីទៀតនៅថ្ងៃខាងមុខ។
គួរបញ្ជាក់ថា ការរៀបចំគេហទំព័រថ្មីនេះ បានផ្តួចផ្តើមអស់ពេលជាង៣ឆ្នាំមកហើយ ដោយគម្រោងស្តីពីការសិក្សាអំពើប្រល័យពូជាសាសន៍នៅកម្ពុជា ជាគម្រោងរបស់មជ្ឈមណ្ឌលឯកសារកម្ពុជា ក្រោមជំនួយរបស់ភ្នាក់ងារអភិវឌ្ឍអន្តរជាតិរបស់អាមេរិក USAID និង អង្គការអភិវឌ្ឍប្រព័ន្ធផ្សព្វផ្សាយអាល្លឺម៉ង់ DW Akademie ។
ទីប្រឹក្សាគម្រោង DW Akademie លោក Kyle James សង្ឃឹមថា គេហទំព័រអន្តរកម្មថ្មីនេះ នឹងដើរតួជាយានផ្តល់ព័ត៌មានលើប្រធានបទសំខាន់ៗដល់យុវជនកម្ពុជា។ ព្រោះគេហទំព័រនេះ អាចប្រើប្រាស់ងាយស្រួលតាមរយៈ smartphone ដោយមាន Application តាមទូរសព្ទដៃទៀតផង។
តាមការបញ្ជាក់របស់ប្រធានមជ្ឈមណ្ឌលឯកសារកម្ពុជា គឺទាល់តែនៅថ្ងៃទី៧មករាឆ្នាំ២០១៧ខាងមុខ ទើបគេហទំព័រ www.thekhmerrougehistory.org អាចដំណើរការបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ