ក្រសួងដែនដី គ្រោងជំរឿនពលរដ្ឋអគារប៊ូឌីញស ដើម្បីឈានដល់ការអភិវឌ្ឍនៅនឹងកន្លែង
ប្រសិនបើគ្មានអ្វីប្រែប្រួលទេ នៅសប្តាហ៍ក្រោយ ក្រុមការងារក្រសួងរៀបចំដែនដី នគរូបនីយកម្ម និងសំណង់ នឹងចុះទៅដល់ អគារប៊ូឌីញស ដើម្បីធ្វើជំរឿនប្រជាពលរដ្ឋ ដែលកំពុងរស់នៅជាក់ស្តែង មុនពេលចាប់ផ្តើមការសាងសង់អគារប៊ូលឌិញថ្មី ឬអភិវឌ្ឍន៍នៅនឹងកន្លែង។ បើតាមរដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ នេះជាគម្រោងសាកល្បងរៀបចំគោលនយោបាយលំនៅដ្ឋាន និងសាងសង់លំនៅដ្ឋានតម្លៃសមរម្យ ដែលលោក ជា សុផារ៉ា កាន់កាប់ដោយផ្ទាល់ ដើម្បីអាចជួយពលរដ្ឋដែលកំពុងរស់នៅខ្វះសុវត្ថិភាពក្នុងអគារវ័យចំណាស់កណ្តាលទីក្រុងនេះ។
ចុះផ្សាយនៅថ្ងៃ៖
ស្តាប់ - ០២:២៣
ក្រសួងរៀបចំដែនដី កំពុងសិក្សា និងចរចាជាមួយក្រុមហ៊ុនជប៉ុនមួយ លើគម្រោងអភិវឌ្ឍអគារប៊ូឌីញសនៅនឹងកន្លែង ក្នុងទំហំទឹកប្រាក់វិនិយោគ ប្រមាណ ៣០លានដុល្លារ។
ទេសរដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា បានបញ្ជាក់ ប្រាប់វិទ្យុបារាំង នៅថ្ងៃទី៣០ សីហា នេះថា នៅសប្តាហ៍ក្រោយ ក្រសួងនឹងចាប់ផ្តើមធ្វើជំរឿន នៅអគារប៊ូឌីញស ដើម្បីអោយដឹងថា មានប៉ុន្មានគ្រួសារកំពុងស្នាក់នៅ ជាក់ស្តែង និងគ្រួសារនីមួយៗកាន់កាប់ទំហំប៉ុន្មានម៉ែត្រការ៉េ ? នេះជា ជំហានមួយឆ្ពោះទៅរកការសាកល្បងអនុវត្តគម្រោងសាងសង់លំនៅដ្ឋានមានតម្លៃសមរម្យសម្រាប់ពលរដ្ឋ ក្នុងរាជធានីភ្នំពេញ។
លោក ជា សុផារ៉ា បានបញ្ជាក់ថា ក្រសួងនឹងស្នើជម្រើសពីរ ជូនពលរដ្ឋ ក្នុងនោះ ជម្រើសទីមួយ ក្រសួងនឹង ធ្វើឯកសារធានាជាក់លាក់ ដើម្បីបញ្ជាក់ពីសិទ្ធិទទួលលំនៅដ្ឋានទំហំដដែល ក្រោយពីត្រឡប់មកពីកន្លែងស្នាក់នៅបណ្តោះអាសន្នវិញ។ អំឡុងពេលសាងសង់អគារប៊ូឌីញ ពលរដ្ឋនឹងស្នាក់នៅលើអគារមួយ មានទីតាំងក្រោយមន្ទីរពេទ្យរ៉ូយ៉ាល់រតនៈ ក្នុងសង្កាត់ទឹកថ្លា រាជធានីភ្នំពេញ ដោយមិនគិតថ្លៃ។ ចំណែក ជម្រើសទីពីរ ក្រសួង ឬក្រុមហ៊ុន នឹងទទួលទិញ លំនៅដ្ឋានណា ដែលពលរដ្ឋមានបំណងលក់។
រដ្ឋមន្រ្តីក្រសួងដែនដី បានបន្ថែមថា ក្រុមហ៊ុនឯកជន ទទួលខុសត្រូវសាងសង់អគារប៊ូឌីញឡើងវិញ និងរៀបចំទីកន្លែងស្នាក់នៅបណ្តោះអាសន្នក្នុងទីក្រុងភ្នំពេញ ដោយមិនគិតថ្លៃជូនពលរដ្ឋ ខណៈក្រសួង នឹងសហការណ៍ជាមួយ អង្គការក្រៅរដ្ឋាភិបាល ដូចជា UN Habitat ដើម្បីសម្របសម្រួលជាមួយពលរដ្ឋ មុនពេលដំណើរគម្រោងសាងសង់រយៈពេលយូរ ដែលមានក្រុមហ៊ុនជាច្រើន កំពុងចាប់អារម្មណ៍ដេញថ្លៃនេះ។
នាយកលេខាធិការដ្ឋាន អង្គការក្រុមការងារពិសេសសិទ្ធិលំនៅឋាន លោក សៀរ ភារម្យ បានសាទរចំពោះគម្រោងអភិវឌ្ឍន៍នេះ តែលោកបារម្ភថា ត្រឹមកេរ្តិ៍ឈ្មោះលោក ជា សុផារ៉ា មានសន្តានចិត្ត ចង់ជួយពលរដ្ឋ នៅតែពិបាកអោយពលរដ្ឋទុកចិត្ត ដោយសារកន្លងមកមន្រ្តីរដ្ឋាភិបាលខ្លះ ធ្លាប់សាងគំរូអាក្រក់ និងធ្វើបាបពលរដ្ឋក្រោមលេសអភិវឌ្ឍន៍។ លោកបានបន្ថែមថា ពលរដ្ឋត្រូវការកិច្ចធានាអះអាងពីក្រុមហ៊ុនជប៉ុន ឬអាមេរិក ឬអង្គការ អន្តរជាតិ ដែលអះអាងថា ពលរដ្ឋអាចវិលត្រឡប់មកវិញ ក្រោយបញ្ចប់ការសាងសង់ ហើយវាអាចត្រូវការ ពេលវេលាច្រើនដើម្បីស្តារជំនឿចិត្តលើរដ្ឋាភិបាលឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ