រថយន្តដឹកកម្មករនៅតែបន្តគ្រោះថ្នាក់លើផ្លូវថ្នល់
ក្រសួងការងារ និងបណ្តុះបណ្តាលវិជ្ជាជីវៈ នៅព្រឹកថ្ងៃទី០៣ សីហា នេះ បានចូលរួមសម្តែងការសោកស្តាយ ចំពោះឧបទ្ទវហេតុគ្រោះថ្នាក់ក្រឡាប់រថយន្តដឹកកម្មករមួយ នៅឃុំភ្នំតូច ស្រុកឧត្តុង្គ ខេត្តកំពង់ស្ពឺ ដែលបណ្តាលអោយកម្មករ រងរបួសធ្ងន់ និងស្រាល សរុប ៣៣នាក់។ បើតាមសេចក្តីប្រកាសព័ត៌មាន របស់ក្រសួង ជនរងគ្រោះកំពុងទទួលការព្យាបាលនៅតាមគ្លីនិកថ្នល់ទទឹង គ្លីនិកបែកចាន មន្ទីរពេទ្យកាល់ម៉ែត្រ និងមន្ទីរពេទ្យព្រះកុសុមៈ ក្រោមបន្ទុករបស់ បេឡាជាតិសន្តិសុខសង្គម។
ចុះផ្សាយនៅថ្ងៃ៖
ស្តាប់ - ០២:៤៤
រថយន្តដឹកកម្មករកាត់ដេរមួយគ្រឿង បានក្រឡាប់ បន្ទាប់ពីគេចឡានដឹកដី តែទៅជល់នឹងរបាំងទ្រូងផ្លូវ នៅតាមផ្លូវជាតិលេខ៥១ ក្នុងភូមិស្ដុកស្លាត ឃុំភ្នំតូច ស្រុកឧត្តុង្គ កាលព្រឹកថ្ងៃទី៣ ខែសីហា។ បើតាម អ្នកស្រី រស់ កាន មន្រ្តីកម្មវិធីមជ្ឈមណ្ឌលអាមេរិកកាំងសម្រាប់សាមគ្គីភាពការងារអន្តរជាតិ ឧបទ្ទវហេតុនេះ បានបណ្តាលឲ្យកម្មកររងរបួសចំនួន ៣៨នាក់ និងទំនងជាមានកម្មករស្លាប់ ២នាក់។ មន្រ្តីអង្គការសង្គមស៊ីវិល ដែលកំពុងប្រមូលរបាយការណ៍នៅកន្លែងកើតហេតុ បន្ថែមថា ទោះបីជាអ្នកបើកបររថយន្ត មិនបានបើកលឿនក៏ដោយ តែរថយន្តដឹកកម្មករនេះ មានសភាពចាស់ ហើយផ្ទុកលើសចំណុះ ទើបងាយបណ្តាលអោយគ្រោះថ្នាក់ដូចនេះ។
នេះមិនមែនជាលើកទីមួយដែលរថយន្តដឹកកម្មករ កម្មការនី បានជួបគ្រោះថ្នាក់ចរាចរណ៍ ឬក្រឡាប់ក្នុងពេលធ្វើដំណើរលើដងផ្លូវ។ នៅព្រឹកថ្ងៃទី១៩ ខែឧសភា ឆ្នាំ២០១៥ គ្រោះថ្នាក់ចរាចរណ៍មួយ កើតឡើងរវាងរថយន្តក្រុង បុករថយន្តដឹកកម្មករ នៅខេត្តស្វាយរៀង បណ្តាលឲ្យកម្មករស្លាប់កើនឡើង ១៧នាក់ និងរងរបួសចំនួន ២២នាក់។ កាលពីល្ងាចថ្ងៃទី១៦ កញ្ញា ២០១៥ មានករណីគ្រោះថ្នាក់ចរាចរណ៍ មួយកើតឡើង នៅភូមិព្រៃផ្តៅ សង្កាត់ច្រកម្ទេស ក្រុងបាវិត ខេត្តស្វាយរៀង រវាងរថយន្តដឹកកម្មករ និងរថយន្តដឹកកម្មករ បើកបរទិសដៅស្របគ្នា បានបណ្តាលអោយ កម្មករ របួសធ្ងន់ និងស្រាល ចំនួន ៧០នាក់ (ស្រី ៦០នាក់)។
ទោះបីជាយ៉ាងណា បើតាម លោកឧត្តមសេនីយ៍ឯក រុន រ័ត្នវាសនា ប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ នៃអគ្គស្នងការនគរបាលជាតិ ចំនួនគ្រោះថ្នាក់ចរាចរណ៍ ទូទាំងប្រទេស គិតត្រឹមឆមាសទីមួយ ដើមឆ្នាំ២០១៦ មានការថយចុះ បើធៀបនឹងដើមឆ្នាំ២០១៥។ នៅពាក់កណ្តាលឆ្នាំ ២០១៦ នេះ មានមនុស្សចំនួន ៩១៩ បានបាត់បង់ជីវិតដោយសារគ្រោះថ្នាក់ចរាចរណ៍ ដែលតួលេខនេះមានការថយចុះជាង ១០០ នាក់ ធៀបនឹងឆ្នាំមុន។ ហើយ មនុស្សរបួសមានចំនួន ៣,៩០៩ នាក់ ថយចុះចំនួន ៤៥១ នាក់។ លោកបានបន្ថែមថា គ្រោះថ្នាក់ចរាចរណ៍ ភាគច្រើន បណ្តាលមកពី ការបើកបរហួសល្បឿនកំណត់ ទទួលទានគ្រឿងស្រវឹង ហើយតួលេខចុងក្រោយ នេះ គ្រាន់តែគ្រោះថ្នាក់ចរាចរណ៍ ដែលសម្លាប់មនុស្សជាង ៩០០នាក់ ក្នុងនោះជនរងគ្រោះជាង ៦០០នាក់ មិនពាក់មួកសុវត្ថិភាព។
គណៈកម្មាធិការជាតិសុវត្ថិភាពចរាចរណ៍ផ្លូវគោក កាលពីខែមិថុនា បានអំពាវបានអោយ អ្នកបើកបរដឹកកម្មករកម្មការនី ត្រូវគោរពច្បាប់ចរាចរណ៍ មិនផ្ទុកមនុស្សលើកកំណត់ និងត្រួតពិនិត្យបច្ចេកទេសរថយន្តដើម្បីបង្ការគ្រោះថ្នាក់ចរាចរណ៍។ ជាវិធានការណ៍ជាក់ស្តែង គណៈកម្មាធិការជាតិ ក៏បានចុះផ្សព្វផ្សាយច្បាប់ចរាចរណ៍ដល់កម្មករកម្មការនី និងអ្នកបើកបររថយន្តដឹកកម្មករ ត្រួតពិនិត្យបណ្ណបើកបរ និងហាមឃាត់មិនអោយដាក់លើសចំណុះផងដែរ។ បើតាម ប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ លោក រុន រ័ត្នវាសនា គណៈកម្មាធិការជាតិសុវត្ថិភាពចរាចរណ៍ផ្លូវគោក បានចុះផ្សព្វផ្សាយទៅដល់រោងចក្រ បានចំនួនជាង ៦០០រោងចក្រ និងរថយន្តក្រុង ២៧ក្រុមហ៊ុន ដើម្បីបង្ការ និងទប់ស្កាត់គ្រោះថ្នាក់ចរាចរណ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ