GMACនិងសហជីពនៅតែទទូចឲ្យរដ្ឋសភាពិចារណាលើសំណើរៀងៗខ្លួនមុនសិក្ខាសាលាពិគ្រោះយោបល់ចាប់ផ្ដើម
តាមការគ្រោងទុកនៅថ្ងៃពុធស្អែកនេះ គឺជាថ្ងៃចុងក្រោយដែល ភាគីពាក់ព័ន្ធដឹកនាំដោយគណៈកម្មការជំនាញរដ្ឋសភា រៀបចំសិក្ខាសាលាពិគ្រោះយោបល់លើសេចក្ដីព្រាងច្បាប់ស្ដីពីសហជីព។ មួយថ្ងៃមុនកិច្ចពិគ្រោះយោបល់ចាប់ផ្ដើមសមាគមរោងចក្រកាត់ដេរនៅកម្ពុជា GMAC ជំរុញជាថ្មីទៀតឲ្យ រដ្ឋសភា ពិចារណាកែសម្រួលទៅលើមាត្រាមួយចំនួន ដែល GMAC យល់ថា ផ្ដល់ភាពងាយស្រួលទៅក្រុមសហជីព។ ដោយឡែកកាលពី ពីរថ្ងៃមុន ក្រុមសហជីពនិងអង្គការសង្គមស៊ីវិលជាង២០ ក៏បានជំរុញជាថ្មីឲ្យរដ្ឋសភាទទួលយកសំណើរបស់ពួកគេដាក់បញ្ជូលទៅក្នុងសេចក្ដីព្រាងច្បាប់នេះ។
ចុះផ្សាយនៅថ្ងៃ៖
ស្តាប់ - ០១:៤៦
ទាំងGMACនិងសហជីពនៅតែបន្តអះអាងពីភាពមិនអាចខ្វះបានចំពោះអ្វីដែលពួកគេទាម ទារដោយហេតុផលថា ធ្វើដើម្បីប្រយោជន៍និយោជិតនៅក្នុងវិស័យឧស្សាហកម្មដ៏ធំបំផុតរបស់កម្ពុជា។ ក្នុងនោះGMAC ចង់ឲ្យមានការកែសម្រួលទៅលើបីមាត្រា ដោយមានមាត្រា១០ ១៩ ២០ដែល GMAC យល់ថា ផ្ដល់ភាពងាយស្រួលទៅក្រុមសហជីព។
លោក ខេន លូ ប្រធានGMAC បានសង្កត់ធ្ងន់ថា សមាគមនិយោជក រាប់បញ្ជូលទាំងGMAC ត្រូវមានការប្រយ័ត្នអំឡុងពេលពិគ្រោះយោបល់ ដើម្បីធានាថា ច្បាប់នេះនៅពេលអនុម័តរួចនឹងផ្ដល់ប្រយោជន៍គ្រប់ភាគីពាក់ព័ន្ធទាំងអស់នៅគ្រប់វិស័យ ជាពិសេសឧស្សាហកម្មកាត់ដេរ ពីព្រោះមានប្រជាជនរាប់លាននាក់ ដែលកំពុងរស់នៅពឹងផ្អែកលើវិស័យនេះ។
ក្រុមសហជីពចាត់ទុកសិក្ខាសាលាពិគ្រោះយោបល់នេះ ធ្វើឡើងគ្រាន់តែបង្គ្រប់កិច្ចប៉ុណ្ណោះ នឹងបាន ចោទប្រកាន់ថា គណៈកម្មការចំពោះកិច្ចនៃគណបក្សទាំងពីរ ដែលធ្លាប់បានពិភាក្សាជាច្រើនដងមកហើយ លើសេចក្ដីព្រាងច្បាប់នេះគ្មានឃើញកែប្រែអ្វីជាដុំកំភួននោះទេ។ ពួកគេបានរិះគន់សិក្ខាសាលាធ្វើឡើងតែមួយព្រឹក ដោយគ្មានពេលវេលាគ្រប់គ្រាន់សម្រាប់សហជីពផ្ដល់យោបល់ឲ្យបានគ្រប់ជ្រុងជ្រោយ។
តែយ៉ាងណាក៏ដោយមន្ត្រីជំនាញអះអាងថា សេចក្ដីព្រាងច្បាប់នេះមិនអាចពន្យាពេលបានទៀតទេហើយការពិគ្រោះយោបល់នៅស្អែកនេះ នឹងប្រមូលមតិយោបល់បន្ថែមពីភាគីពាក់ព័ន្ធដាក់បញ្ជូលទៅក្នុងសេចក្ដីព្រាងច្បាប់នេះ។ សេក្ដីព្រាងច្បាប់សហជីពដែលត្រូវបានពន្យាពេលរយៈពេលបីឆ្នាំមកហើយ។ តាមគម្រោងក្រោយសិក្ខាសាលាបញ្ចប់គណៈកម្មការចំពោះកិច្ចនៃគណបក្សទាំងពីរជួបគ្នាបន្តទៀតជាមួយភាគីរដ្ឋាភិបាលដើម្បីពិភាក្សាទៅលើសេចក្ដីច្បាប់មួយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ