កម្មករអូសរទេះនៅប៉ោយប៉ែត នាំគ្នាធ្វើបាតុកម្មរឿងមន្ត្រីគយគាបឲ្យបង់ពន្ធ
កម្មករអូសរទេះ ប្រមាណជា ១០០នាក់ នៅព្រឹកថ្ងៃចន្ទ ទី២៥ឧសភានេះ បានប្រមូលផ្តុំគ្នាធ្វើបាតុកម្មតវ៉ា នៅមុខការិយាល័យគយ ក្រុងប៉ោយប៉ែត។ នេះគឺជាការតវ៉ាលើកទី៤ហើយ របស់កម្មករអូសរទេះទាំងនោះ ក្នុងគោលដៅ សុំឲ្យមន្ត្រីគយបន្ធូរបន្ថយ ឬអនុគ្រោះការបង់ពន្ធគយរបស់គេ។ ប៉ុន្តែមន្ត្រីគយ បានអះអាងថា ការបង់ពន្ធនោះ គឺធ្វើតាមច្បាប់ និងមិនអាចអនុគ្រោះក្រៅច្បាប់បាននោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
កម្មករអូសរទេះនៅក្រុងប៉ោយប៉ែត ទាំងនោះ បាននាំគ្នាលើកបដា បិទផ្លូវ នៅមុខការិយាល័យពន្ធគយ ក្រុងប៉ោយប៉ែត នៅព្រឹកថ្ងៃចន្ទនេះ ដើម្បីសំណូមពរឲ្យមន្ត្រីគយ នៅច្រកទ្វាយប៉ោយប៉ែត បន្ធូរបន្ថយ ឬអនុគ្រោះការបង់ពន្ធគយ។ បដាទាំងនោះ មានសរសេរថា «ប្រឆាំងដាច់ខាតរាល់ទង្វើរ ដែលស្ថាប័នជំនាញគាបសង្គត់ក្នុងការបង់ពន្ធ លើកម្មករអូសរទេះ»។
លោកសឿង ប្រុស កម្មករអូសរទេះម្នាក់ ដែលបានទៅចូលរួមក្នុងការតវ៉ានោះ បានប្រាប់វិទ្យុបារាំងថា ពួកគេមិនមានលទ្ធភាពបង់ពន្ធដល់គយនោះទេ ព្រោះទំនិញដែលពួកគាត់អូសនោះ គឺមានចំនួនតិចតួច។ លោកសឿង ប្រុស បានបន្តថា មន្ត្រីគយ បានគាបសង្គត់ពីពួកគាត់ដែលដឹកទំនិញតិចតួច តែបែរជាបន្ថយពន្ធ ទៅលើឈ្មួញ ដែលដឹកទំនិញច្រើនទៅវិញ។ លោកសឿង ប្រុស បានបញ្ជាក់ថា ការរឹតត្បិត គាបសង្គត់នេះ គឺតាំងពីមានការតែងតាំងប្រធានគយថ្មី ប្រហែលជាជិត ២ឆ្នាំមកហើយ។
យ៉ាងណាមិញ លោកឈួន ហៃ ប្រធានការិយាល័យគយ និងរដ្ឋាករប៉ោយប៉ែត បានបញ្ជាក់ប្រាប់វិទ្យុបារាំងថា កម្មករអូសរទេះ ដែលទាមទារនៅពេលនេះ គឺមានប្រមាណជា ១០ភាគរយ នៃចំនួនកម្មករសរុបដែលអូសរទេះ នៅក្នុងក្រុងប៉ោយប៉ែតប៉ុណ្ណោះ។ លោកថា ការទាមទារ មិនបង់ពន្ធគយ នូវរាល់ទំនិញនាំចូលពីថៃមកកម្ពុជា គឺគ្មានច្បាប់ណាអនុញ្ញាតអោយធ្វើទេ។ ហើយមន្ត្រីគយ និងសមត្ថកិច្ចនានា នៅច្រកព្រំដែនមិនហ៊ានធ្វើខុសច្បាប់ បែបនេះឡើយ។
សូមបញ្ជាក់ថា នេះគឺជាលើកទី៤ហើយ ដែលមានការតវ៉ាពីសំណាក់កម្មករអូសរទេះ នៅក្រុងប៉ោយប៉ែតនេះ។ កម្មករអូសរទេះ បានឲ្យដឹងថា ពួកគេមិនដែលទទួលបានការសម្របសម្រួលជាក់លាក់ណាមួយពីខាងមន្ត្រីគយនោះទេ ដូច្នេះទើបពួកគាត់នៅតែបន្តសកម្មភាពតវ៉ាបែបនេះតទៅទៀត។ យ៉ាងណាក៏ដោយ នៅព្រឹកថ្ងៃចន្ទនេះ កម្មករអូសរទេះ មិនបានធ្វើតាមសំណើររបស់មន្ត្រីគយ ដែលតម្រូវឲ្យមានតំណាងកម្មករម្នាក់ ចូលទៅចរចារ ក្នុងការិយាល័យមន្ត្រីគយនោះទេ។ កម្មករអូសរទេះ អះអាងថា ការមិនធ្វើតាមនេះ ព្រោះគេយល់ថា ខាងគយ មានចេតនាបំបែកសម្លេងរបស់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ