ក្រសួងសុខាភិបាល៖ ជំងឺហ្ស៊ីកាធ្លាប់មាននៅកម្ពុជា
ក្រសួងសុខាភិបាល នៅថ្ងៃទី២៩ មករានេះបានចេញសេចក្តីប្រកាសព័ត៌មានមួយស្តីពីជំងឺហ្ស៊ីកា (Zika )ដែលកំពុងផ្ទុះដូចលាជ។ សម្រាប់កម្ពុជា ជំងឺហ្ស៊ីកានេះធ្លាប់បានផ្ទុះមួយករណីផងដែរ ប៉ុន្តែនៅពេលនេះ ក្រសួងសុខាភិបាលនៅមិនទាន់រកឃើញនៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
នៅប្រទេសកម្ពុជា ជំងឺហ្ស៊ីកានេះធ្លាប់បានកើតឡើងម្តងហើយកាលពីឆ្នាំ២០១០កន្លងទៅ ប៉ុន្តែអ្នកជំងឺដែលចម្លងដោយសារសត្វមូសនេះ ត្រូវបានព្យាបាលជាស្បះស្បើយហើយ។ នេះគឺជាការអះអាងរបស់ក្រសួងសុខាភិបាល។ សូមបញ្ជាក់ថា ជំងឺហ្ស៊ីកាដែលឆ្លងដោយសារសត្វមូសនេះ កំពុងរាតត្បាត និងគំរាមកំហែងសុខភាពពិភពលោកនាពេលបច្ចុប្បន្ន។ ដោយឡែកកម្ពុជាវិញ នៅពំទាន់មានករណីនេះនៅឡើយទេ។
ក្រសួងបានបញ្ជាក់ថា ហានិភ័យ បណ្តាលមកពីជំងឺហ្ស៊ីកានេះនៅកម្ពុជា នៅមានកម្រិតទាបបំផុត។ បើទោះបីជាបែបណាក៏ដោយ ក្រសួងសុខាភិបាលបានអំពាវនាវឱ្យប្រជាពលរដ្ឋត្រូវប្រុងប្រយ័ត្នខ្ពស់ ក្នុងការធ្វើដំណើរទៅកាន់ទ្វីប អាហ្វ្រិក អាមេរិក និងអាស៊ីប៉ាស៊ីហ្វិក។ ក្រៅពីនេះ ត្រូវទប់ស្កាត់ និងបង្ការការចម្លងជំងឺហ្ស៊ីកានេះដូចជាការពារជំងឺគ្រុនឈាមដែរ។ ជាការពារកុំឱ្យមូសខ្លាខាំ ហើយនឹងបំបាត់ជម្រកមូសខ្លា ដូចជាកុំឱ្យមានទឹកដក់នៅជុំវិញផ្ទះ លុបបំបាត់សំបកកំប៉ុង សំបកកង់ឡាន ត្រឡោកដូងជាដើម។
អាការជំងឺហ្ស៊ីកានេះ គឺគ្រុនក្តៅ ឈឺក្បាល កន្ទួលក្រហមលើស្បែក ក្រហមភ្នែក និងឈឺសន្លាក់ជាដើម។ ផលវិបាកនៃជំងឺនេះ គឺអាចធ្វើទារកក្នុងផ្ទៃស្លាប់ ឬកើតមកក្នុងទម្រង់មិនត្រឹមត្រូវ។ បច្ចុប្បន្ននេះ ហ្ស៊ីកា ដែលទើបចេញមុខជាថ្មី នៅប្រេស៊ីល កំពុងបន្តការរាតត្បាតយ៉ាងលឿនស្លេវ ឆ្លងទ្វីប កម្រិតពិភពលោក។ មានប្រទេសចំនួន២៣នៅក្នុងទ្វីបអាមេរិក និងនៅក្នុងតំបន់ កំពុងរងការរាតត្បាតខ្លាំង រហូតទាញសញ្ញាអាសន្នកម្រិតខ្ពស់បំផុត។ គិតតឹ្រមពីខែធ្នូមក នៅប្រទេសហុងឌុយរ៉ាស មានករណីកើតហ្ស៊ីកា ១ពាន់នាក់។ ចំណែកប្រេស៊ីល រងគ្រោះខ្លាំងគេ ដោយមានអ្នកឆ្លងហ្ស៊ីកា ប្រមាណ១លាន ៥សែននាក់។ អង្គការសុខភាពពិភពលោក បានព្យាករថា ករណីហ្ស៊ីកាឡើងដល់បី-បួននាក់នៅលើទ្វីបអាមេរិក នាពេលឆាប់ៗនេះ។
បើទោះបីជាកម្ពុជាពុំទាន់មានករណីជំងឺហ្ស៊ីកានេះកើតឡើងនាពេលបច្ចុប្បន្នក៏ដោយ ក៏រដ្ឋាភិបាល បានអំពាវនាវឱ្យប្រជាពលរដ្ឋត្រូវប្រយ័ត្នប្រយែងដែលធ្វើដំណើរទៅកាន់តំបន់ដែលកំពុងកើតមានជំងឺនេះព្រោះថានាពេលបច្ចុប្បន្ននៅពុំទាន់មានវ៉ាក់សាំងព្យបាលនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ