កម្ពុជាច្រានចោលការអះអាងរបស់រដ្ឋមន្ត្រីការពារជាតិថៃ
ក្រសួងការពារជាតិកម្ពុជាបានច្រានចោលប្រសាសន៍របស់រដ្ឋមន្ត្រីការពារ ជាតិថៃដែលអះអាងភាគីទាំងពីរ កម្ពុជាថៃបានពិភាក្សាគ្នាលើ៥ចំនុច ដែលក្នុងនោះក៏មានការដកកងទ័ពដែរនោះ។ អ្នកនាំពាក្យក្រសួងការពារជាតិកម្ពុជា លោកឧត្តមសេនីយ៍ឯកឈុំ សុជាតិថ្លែងថា កម្ពុជានៅតែប្រកាន់ជំហរអនុវត្តសាលក្រមតុលាការឡាអេ ថ្ងៃទី១៨កក្កដា។
ចុះផ្សាយនៅថ្ងៃ៖
ស្តាប់ - ០១:៤៣
រដ្ឋមន្ត្រីការពារជាតិថៃលោកឧត្តមសេនីយ៍ យុត្ថាសាក់ សាស៊ីប្រាផាបានប្រាប់កាសែតថៃ លោកបានជជែកមិនផ្លូវការជាមួយសមភាគីកម្ពុជា គឺលោកទៀ បាញ់កាលពីពេលថ្មីៗនេះ លើបញ្ហាចំនួន៥ដែលក្នុងនោះគឺមានការដកកងទ័ពចេញពីតំបន់ដែលត្រូវកងទ័ពបណ្តោះអាសន្នដែរ។ ការដកកងទ័ពដែលបើតាមការអះអាងរបស់រដ្ឋមន្ត្រីការពារជាតិថៃនោះ គឺនឹងអាចប្រព្រឹត្តទៅ នៅក្នុងខែធ្នូក្រោយនេះ ក្រោយមានការជួបគ្នានៃគណៈកម្មាធិការព្រំដែនទូទៅ។
ផ្ទុយទៅវិញ ព័ត៌មានទាំងនេះត្រូវបានបដិសេធចោលទាំងស្រុងដោយទីក្រុងភ្នំពេញ។ អ្នកនាំពាក្យក្រសួងការពារជាតិកម្ពុជា លោកឧត្តមសេនីយឯកឈុំ សុជាតិបានបញ្ជាក់នៅថ្ងៃសុក្រនេះថា មិនមានជំនួបណាមួយរវាងរដ្ឋមន្ត្រីការពារជាតិទាំងពីរដូចការចុះផ្សាយរបស់កាសែតនោះឡើយ ហើយក៏មិនមានការជជែកគ្នាលើ៥ចំនុចដូចរដ្ឋមន្ត្រីការពារជាតិថៃអះអាងនោះដែរ។
អ្នកនាំពាក្យក្រសួងការពារជាតិកម្ពុជាដដែលបញ្ជាក់ថា កម្ពុជានៅរក្សាជំហរដូចដើម ជំហរអនុវត្តសាលក្រមតុលាការឡាអេ ថ្ងៃទី១៨កក្កដា២០១១ ជំហររង់ចាំអ្នកសង្កេតការណ៍ឥណ្ឌូរនេស៊ី និងជំហររង់ចាំការបកស្រាយសាលក្រមឆ្នាំ១៩៦២។ ព័ត៌មានក្រៅពីនេះ គឺគ្រាន់តែជាការបកស្រាយរបស់ភាគីថៃតែប៉ុណ្ណោះដែលកម្ពុជាមិនដឹងឮឡើយ។
គួររម្លឹកថា ក្រោយពីមានបណ្តឹងរបស់កម្ពុជាកាលពីចុងខែមេសា ដើម្បីស្នើអោយមានការថែរក្សាបេតិកភណ្ឌពិភពលោក ប្រាសាទព្រះវិហារ តុលាការយុត្តិធម៌អន្តរជាតិក្រុងឡាអេបានសម្រេច កាលពីខែកក្កដាអោយកម្ពុជា និងថៃដកកងទ័ពចេញពីតំបន់ដែលតុលាការនេះកំណត់ទំហំ១៧គីឡូម៉ែត្រការ៉េ ដែលមិនត្រូវមានកងទ័ពបណ្តោះអាសន្ន។ ប៉ុន្តែតាំងពីពេលនោះមក ប្រទេសទាំងពីរមិនទាន់រកថ្ងៃអនុវត្តសាលក្រមនេះបាននៅឡើយ ដោយកម្ពុជានៅរង់ចាំភាគីថៃរហូត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ