គណៈកម្មការចម្រុះខណ្ឌសីមាព្រំដែនគោកកម្ពុជាចេញទៅប្រជុំនៅថៃ
ប្រតិភូគណៈកម្មការចម្រុះខណ្ឌសីមាព្រំដែនគោកកម្ពុជាដឹកនាំដោយលោកវ៉ា គឹមហុងបានចេញដំណើរពីភ្នំពេញ នៅល្ងាចថ្ងៃអាទិត្យនេះឆ្ពោះទៅកាន់ប្រទេសថៃដើម្បីចូលរួមកិច្ចប្រជុំនៅថ្ងៃទី១៣និង១៤កុម្ភៈ។ អ្នកជំនាញការព្រំដែនខ្មែរនិងថៃនឹងជជែកអំពីការវាស់វែងព្រំដែននិងការស្វែងរកបង្គោលព្រំដែនចាស់នៅក្រៅតំបន់ប្រាសាទព្រះវិហារ។ កិច្ចប្រជុំនេះប្រព្រឹត្តទៅស្របពេលដែលកម្ពុជាបានសម្តែងការព្រួយបារម្ភអំពីសកម្មភាពយោធាថៃនៅតំបន់ភ្នំទ្រព្យដែលជាតំបន់ជម្លោះរវាងប្រទេសជិតខាងទាំងពីរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
ដូចការគ្រោងទុកកម្ពុជាបានបញ្ជូនប្រតិភូជំនាញព្រំដែនរបស់ខ្លួន នៅល្ងាចថ្ងៃអាទិត្យនេះ ដើម្បីទៅចូលរួមក្នុងកិច្ចប្រជុំគណៈកម្មការចម្រុះខណ្ឌសីមាព្រំដែនគោក រយៈពេល២ថ្ងៃ នៅក្នុងប្រទេសថៃ។ គណៈប្រតិភូកម្ពុជាដែលមានគ្នាសរុបជាង២០នាក់ដឹក នាំដោយលោក វ៉ា គឹមហុង ទេសរដ្ឋមន្ត្រីទទួលបន្ទុកកិច្ចការព្រំដែន។ កិច្ចប្រជុំពីរថ្ងៃដែលនឹងប្រព្រឹត្តទៅ នៅថ្ងៃទី១៣ និង១៤កុម្ភៈ ធ្វើឡើងតបតាមការអញ្ជើញរបស់ភាគីថៃ។
នៅមិនទាន់មានសេចក្តីរាយការណ៍លម្អិត អំពីរបៀបវារៈនៃកិច្ចប្រជុំនេះនៅឡើយទេ ប៉ុន្តែ យោងតាមសេចក្តីប្រកាសព័ត៌មានរបស់ក្រសួងការបរទេស កិច្ចប្រជុំ២ថ្ងៃនេះនឹងនិយាយអំពីការវាស់វែងព្រំដែន និងការស្វែងរកបង្គោលព្រំដែន ដែលនៅសល់នៅក្រៅតំបន់ប្រាសាទព្រះវិហារ។ កិច្ចការរបស់គណៈកម្មការចម្រុះខណ្ឌសីមាព្រំដែនគោកកម្ពុជា-ថៃ គឺការវាស់វែង និងស្វែងរកបង្គោលព្រំដែនចាស់សល់ពីសម័យបារាំង ដោយមិនប៉ះពាល់តំបន់ប្រាសាទព្រះវិហារទេ ដោយសារតែបញ្ហាព្រះវិហារត្រូវនៅរង់ចាំការបកស្រាយសាលក្រមឆ្នាំ១៩៦២ របស់តុលាការយុត្តិធម៌អន្តរជាតិ ទីក្រុងឡាអេ ដែលកម្ពុជាបានស្នើឡើង។
ភាគីកម្ពុជាទៅប្រជុំ (JBC) នេះ គឺទៅប្រកបដោយសុទិដ្ឋិនិយម និងសុឆន្ទៈក្នុងការរកដំណោះស្រាយបញ្ហារវាងប្រទេសទាំងពីរ (កម្ពុជា និងថៃ)។
បទសម្ភាសន៍រវាងលាង ដឺលុច និងលោកវ៉ា គឹមហុង
គួររម្លឹកថា គណៈកម្មការចម្រុះខណ្ឌសីមាព្រំដែនគោកកម្ពុជា-ថៃ ហៅកាត់ថា JBC បានខកខានមិនបានជួបគ្នា ជាង២ឆ្នាំមកហើយ ដោយសារតែបញ្ហាផ្ទៃក្នុងរបស់ប្រទេសថៃ។ មុនពេលមានទំនាស់តានតឹងនៅឯព្រះវិហារ និងតំបន់មួយចំនួនទៀតរហូតដល់ផ្ទុះសង្គ្រាម កាលពីឆ្នាំ២០១១ គណៈកម្មការចម្រុះនេះបានរកឃើញបង្គោលព្រំដែនចាស់សម័យបារាំងចំនួន៤៣ បង្គោលហើយ ក្នុងចំណោមបង្គោលចាស់ទាំងអស់ ដែលមាន៧៣បង្គោល នៅតាមបណ្តោយព្រំដែនកម្ពុជា-ថៃ។ ការផ្លាស់ប្តូររដ្ឋាភិបាលថៃ ដែលបានធ្វើឲ្យស្ថានការណ៍តាមព្រំដែនធូរស្រាលមួយរយៈ ក៏មិនបានដោះស្រាយបញ្ហាអ្វីបាននៅឡើយ។ ប៉ុន្មានថ្ងៃចុងក្រោយនេះ ស្ថានការណ៍បានចាប់តានតឹងឡើងវិញនៅឯតំបន់ភ្នំទ្រព្យ។ នៅថ្ងៃសៅរ៍ម្សិលមិញ អាជ្ញាធរជាតិព្រះវិហារ និងគណៈកម្មការជាតិបេតិកភណ្ឌពិភពលោកបានចេញសេចក្តីថ្លែងការណ៍រួមគ្នាមួយ ដោយសម្តែងក្តីបារម្ភចំពោះសកម្មភាពទាហានថៃនៅតំបន់ភ្នំទ្រព្យ។
កាលពីថ្ងៃពុធទី៨កុម្ភៈ កម្ពុជាបានធ្វើកំណត់ទូតផ្ញើទៅរដ្ឋាភិបាលថៃម្តងហើយ ដើម្បីតវ៉ាប្រឆាំងនឹងសកម្មភាពរបស់យោធាថៃ ដែលដឹកជញ្ជូនគ្រឿងសំណង់ ដើម្បីសាងសង់ព្រះវិហារ នៅលើកំពូលភ្នំទ្រព្យនេះ។ យ៉ាងណាក៏ដោយ កិច្ចប្រជុំ JBC នៅដើមសប្តាហ៍ក្រោយទំនងជាគ្មានអ្វីប្រែប្រួលទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ