គណៈកម្មការចម្រុះព្រំដែននឹងស្វែងរកបង្គោលព្រំដែនក្រៅតំបន់ប្រាសាទព្រះវិហារ
គណៈកម្មការចម្រុះខណ្ឌសីមាព្រំដែនគោកកម្ពុជាថៃនឹងបើកកិច្ចប្រជុំនៅថ្ងៃទី១៣និង១៤កុម្ភៈ។ កិច្ចប្រជុំនេះនឹងត្រូវប្រព្រឹត្តទៅនៅក្នុងប្រទេសថៃ។ ប្រតិភូកម្ពុជាដែលចូលរួមក្នុងកិច្ចប្រជុំដ៏សំខាន់នេះនឹងត្រូវដឹកនាំដោយលោក វ៉ា គឹមហុងទេសរដ្ឋមន្ត្រីទទួលបន្ទុកព្រំដែន។ ភាគីជំនាញព្រំដែនកម្ពុជាថៃនឹងជជែកអំពីការវាស់វែងព្រំដែននិងការស្វែងរកបង្គោលព្រំដែនចាស់នៅក្រៅតំបន់ប្រាសាទព្រះវិហារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
កម្ពុជានឹងបញ្ជូនប្រតិភូជំនាញព្រំដែនរបស់ខ្លួន ដើម្បីចូលរួមក្នុងកិច្ចប្រជុំគណៈកម្មការចម្រុះខណ្ឌសីមាព្រំដែនគោករយៈពេល២ថ្ងៃនៅក្នុងប្រទេសថៃ។ កិច្ចប្រជុំនេះត្រូវបានភាគីថៃកំណត់រួចហើយសម្រាប់ថ្ងៃទី១៣ និង១៤ខែកុម្ភៈ។
ក្រសួងការបរទេសកម្ពុជាបានចេញផ្សាយសេចក្តីប្រកាសព័ត៌មានមួយនៅព្រឹកថ្ងៃពុធទី១៨មករា ប្រកាសថាកម្ពុជាយល់ព្រមចូលរួមប្រជុំគណៈកម្មការចម្រុះខណ្ឌសីមាព្រំដែនគោកនេះ តាមការអញ្ជើញរបស់ភាគីថៃ។ ហើយថា ប្រតិភូកម្ពុជានឹងត្រូវដឹកនាំដោយលោក វ៉ា គីមហុង ប្រធានគណៈកម្មការព្រំដែនចម្រុះនេះ និងលោក ឡុង វីសាឡូ រដ្ឋលេខាធិការក្រសួងការបរទេស។
យោងតាមសេចក្តីប្រកាសព័ត៌មានរបស់ក្រសួងការបរទេសខ្មែរ កិច្ចប្រជុំ២ថ្ងៃនេះ នឹងនិយាយអំពីការវាស់វែងព្រំដែន ការស្វែងរកបង្គោលព្រំដែនដែលនៅសល់ នៅតំបន់ក្រៅពីតំបន់ប្រាសាទព្រះវិហារ។
ក្រុមគណៈកម្មការចម្រុះខណ្ឌសីមាព្រំដែនគោកកម្ពុជាថៃទំនងជាបានព្រមព្រៀងគ្នាបន្តការងារវាស់វែង និងស្វែងរកបង្គោលព្រំដែនចាស់សល់ពីសម័យបារាំង ដោយមិនប៉ះពាល់តំបន់ប្រាសាទព្រះវិហារ ដោយសារតែកម្ពុជា និងថៃត្រូវនៅរង់ចាំការបកស្រាយរបស់តុលាការយុត្តិធម៌អន្តរជាតិទីក្រុងឡាអេ លើសាលក្រមឆ្នាំ១៩៦២ដែលកម្ពុជាបានស្នើ។
គួររម្លឹកថា ដោយសារបញ្ហាផ្ទៃក្នុងរបស់ប្រទេសថៃ គណៈកម្មការចម្រុះខណ្ឌសីមាព្រំដែនគោកកម្ពុជាថៃ បានខកខានមិនបានជួបគ្នាជាង២ឆ្នាំមកហើយដើម្បីនិយាយអំពីការវាស់វែងព្រំដែននេះ។ មុននេះ គណៈកម្មការចម្រុះមួយបានរកឃើញបង្គោលព្រំដែនចាស់សម័យបារាំងបាន៤៣បង្គោលហើយ ក្នុងចំណោមបង្គោលចាស់ទាំងអស់ដែលមាន៧៣បង្គោល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ