ក្រសួងការបរទេសកម្ពុជាមិនទាន់មានប្រតិកម្មរឿងទាហានថៃបាញ់ពលរដ្ឋខ្មែរជាថ្មី
ក្រសួងការបរទេសកម្ពុជា នៅមិនទាន់មានប្រតិកម្មណាមួយនៅឡើយទេជុំវិញរឿងទាហានថៃបាញ់ប្រហារមកលើពលរដ្ឋខ្មែរដែលបានលួចឆ្លងដែនខុសច្បាប់ចូលទៅកាប់ឈើនៅក្នុងទឹកដីថៃកាលពីថ្ងៃទី០៩ តុលា។ នេះបើតាមលោកកុយ គួង អ្នកនាំពាក្យក្រសួងការបរទេសកម្ពុជាដែលបានថ្លែងប្រាប់វិទ្យុបារាំងអន្តរជាតិនៅព្រឹកថ្ងៃអាទិត្យនេះ។
ចុះផ្សាយនៅថ្ងៃ៖
ស្តាប់ - ០២:០១
នៅពេលនេះក្រសួងការបរទេសកម្ពុជា កំពុងធ្វើការស្រាវស្រាវស្វែងរកព័ត៌មានបន្ថែមទៀតជុំវិញករណីទាហានថៃបាញ់មកលើពលរដ្ឋខ្មែរដែលបានឆ្លងដែនខុសច្បាប់ចូលទៅកាប់ឈើនៅក្នុងទឹកដីថៃនេះ។
លោក កុយ គួង អ្នកនាំពាក្យក្រសួងការបរទេសកម្ពុជា បានប្រាប់វិទ្យុបារាំងអន្តរជាតិថា ក្រសួងការបរទេសកម្ពុជាបានទាក់ទងទៅកាន់អគ្គកុងស៊ុលកម្ពុជាប្រចាំនៅខេត្តស្រះកែវ ប្រទេសថៃហើយ ដើម្បីធ្វើការប្រមូលព័ត៌មានបន្ថែមអំពីរឿងរ៉ាវបាញ់ប្រហារនេះ។
សូមបញ្ជាក់ថា កាលពីថ្ងៃទី០៩ តុលា កន្លងទៅ មានករណីបាញ់ប្រហារមកលើពលរដ្ឋខ្មែរជាថ្មីពីសំណាក់ទាហានថៃនៅក្នុងខេត្តស៊ីសាកេត ប្រទេសថៃ នៅពេលពលរដ្ឋខ្មែរព្យាយាមឆ្លងដែនខុសច្បាប់ចូលទៅកាប់ឈើនៅចំណុចនោះ។ ករណីបាញ់ប្រហារនេះ បានបណ្តាលឲ្យពលរដ្ឋខ្មែរ៤ នាក់រងរបួស និង ២ នាក់ផ្សេងទៀតបានបាត់ខ្លួន។
ការបាញ់ប្រហារមកលើពលរដ្ឋខ្មែរពីសំណាក់ទាហានថៃរឿងឆ្លងដែនខុសច្បាប់នៅពេលនេះ មិនមែនជារឿងមួយដែលថ្មីនោះឡើយសម្រាប់មជ្ឈដ្ឋានទូទៅ។ មិនមែនជារឿងថ្មី ព្រោះថា កន្លងមកទាហានថៃតែងតែបាញ់ប្រហារ ឫចាប់ពលរដ្ឋខ្មែរក្រីក្រដាក់គុកច្រវ៉ាក់ជាបន្តបន្ទាប់ដោយសារបានលួចឆ្លងដែនខុសច្បាប់ចូលទៅរកការងារធ្វើ ឫកាប់ឈើនៅក្នុងទឹកដីថៃជាដើម។ ទោះជាបែបនេះក្តី ក្រោមហេតុផលចិញ្ចឹមក្រពះ ប្រជាពលរដ្ឋខ្មែរក្រីក្រមួយចំនួននៅតែសម្រុកលួចឆ្លងដែនខុសច្បាប់ចូលក្នុងទឹកដីថៃដដែល បើទោះបីដឹងថាត្រូវប្រឈមនឹងចុងកាណុងកាំភ្លើងឫគុកច្រវ៉ាក់របស់ទាហានថៃក៏ដោយ ។
កន្លងមកក្រសួងកាបរទេសកម្ពុជា ក៏ធ្លាប់បានបញ្ចេញប្រតិកម្មនឹងការបាញ់ប្រហារពលរដ្ឋខ្មែរពីសំណាក់កងទាហានថៃផងដែរ ហើយជាងនេះទៅទៀត អង្គការសង្គមស៊ីវិលមួយចំនួនក៏ធ្លាប់ផ្ញើលិខិតស្នើសុំឲ្យទាហានថៃបញ្ឈប់ការបាញ់បោះមកលើពលរដ្ឋខ្មែរដែលលួចឆ្លងដែនខុសច្បាប់ទៅកាន់ប្រទេសថៃ។ ក៏ប៉ុន្តែរាល់ប្រតិកម្ម និង ការស្នើសុំទាំងនោះហាក់គ្មានឥទ្ធិពលណាមួយក្នុងការបញ្ឈប់សកម្មភាពរបស់ទាហានថៃនោះទេ។
យ៉ាងណាក៏ដោយ ការបាញ់ប្រហាររបស់ទាហានថៃមកលើពលរដ្ឋខ្មែរជាថ្មីនៅពេលនេះ នៅមិនទាន់មានប្រតិកម្មណាមួយចេញពីក្រសួងការបរទេសកម្ពុជានៅឡើយទេ។ មិនទាន់មានព្រោះថា ក្រសួងការបរទេសរង់ចាំទទួលបានព័ត៌មានជាក់លាក់ពីរឿងបាញ់ប្រហារនេះជាមុនសិន មុនធ្វើការសម្រេចបែបណាមួយនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ