អ្នកមានជម្លោះដីធ្លីបន្តតវ៉ានៅមុខពន្ធនាគារព្រៃស ឯអ្នកជាប់ឃុំធ្វើកូដកម្មបង្អត់អាហារ
នៅព្រឹកថ្ងៃអាទិត្យនេះ ប្រជាពលរដ្ឋមានជម្លោះដីធ្លី ព្រះសង្ឈ រួមទាំងយុវជនមួយចំនួនផងបានបន្តទៅប្រមូលផ្តុំគ្នានៅពីមុខពន្ធនាគារព្រៃសដូចការគ្រោងទុក។ ជាការប្រមូលផ្តុំតវ៉ាទាមទារឲ្យមានការដោះលែងអ្នកកំពុងជាប់ឃុំនៅទីនោះ។ ស្របពេលជាមួយនេះ អ្នកកំពុងជាប់ឃុំ ក៏បានប្រកាសធ្វើការបង្អត់អាហារពេញមួយថ្ងៃផងដែរ។
ចុះផ្សាយនៅថ្ងៃ៖
ស្តាប់ - ០២:១០
នេះគឺជាលើកទីបីហើយដែលក្រុមប្រជាពលរដ្ឋមានជម្លោះដីធ្លី ព្រះសង្ឈ និងយុវជនមួយចំនួនទៀតបានទៅប្រមូលផ្តុំគ្នានៅមុខពន្ធនាគារព្រៃស ដើម្បីតវ៉ាទាមទារឲ្យមានការដោះលែងអ្នកកំពុងជាប់ឃុំនៅទីនោះ។ ក៏មិនខុសពីសហ្តហ៍មុនដែរ ប្រជាពលរដ្ឋទាំងនោះបានទៅប្រមូលផ្តុំគ្នាតាំងពីម៉ោងប្រមាណជាង៨ព្រឹក។
អ្នកស្រីប៉ូវ សោភា តំណាងអ្នកភូមិបឹងកក់ដែលដឹកនាំការប្រមូលផ្តុំគ្នានេះ បានឲ្យដឹងថា មកដល់ពេលនេះក្រុមប្រជាពលរដ្ឋ មិនទាន់ទទួលបានការឆ្លើយបែបណាមួយពីសំណាក់អាជ្ញាធរពាក់ព័ន្ធនៅឡើយទេ។ ប្រជាពលរដ្ឋដែលមកតវ៉ាទាំងនោះ ក៏មានទាំងកុមារា កុមារី ដែលជាកូនៗ ស្ត្រីកំពុងជាប់ឃុំផងដែរ។ ពួកគេខ្លះពាក់ស រំលេចដោយប្រយោគមួយឃ្លាថា “ដោះលែងអ្នកទាំង១៧នាក់ជាបន្ទាន់” រីឯខ្លះទៀតកាន់រូបថតអ្នកកំពុងជាប់ឃុំ ដើម្បីទាមទារឲ្យមានដោះលែង។
ក្រៅតែពីប្រជាពលរដ្ឋមានជម្លោះដីធ្លី ក៏មានសង្គមស៊ីវិលមួយចំនួនចូលរួមឃ្លាំមើលយន្តនាការតវ៉ាប្រចាំសហ្តហ៍ ដើម្បីទាមទារឲ្យមានការដោះលែងអ្នកជាប់ឃុំទាំងនោះផងដែរ។ លោកអំ សំអាត ប្រធានផ្នែកបច្ចេកទេសស៊ើបអង្កេតរបស់អង្គការលីកាដូដែលបានឃ្លាំមើលការប្រមូលផ្តុំគ្នានេះពីរសហ្តហ៍មកហើយនោះ បានលើកឡើងថា អ្នកកំពុងជាប់ឃុំទាំងនោះមិនត្រឹមតែរងគ្រោះព្រោះរឿងជម្លោះដីធ្លីប៉ុណ្ណោះទេ តែពេលនេះពួកគេបានមករងគ្រោះត្រូវជាប់ពន្ធនាគារទាំងអយុត្តិធម៌ថែមទៀត។
យ៉ាងណាក៏ដោយ ស្របពេលដែលប្រជាពលរដ្ឋកំពុងប្រមូលផ្តុំគ្នានៅពីមុខពន្ធនាគារ អ្នកកំពុងជាប់ឃុំខាងក្នុងពន្ធនាគារឯណោះវិញក៏បានធ្វើកូដកម្មបង្អត់អាហារខ្លួនឯងផងដែរ។គោលបំណងដូចគ្នា គឺដើម្បីទាមទាររកយុត្តិធម៌ និងការដោះលែងឲ្យមានសេរីភាពឡើងវិញ។
សូមបញ្ជាក់ថា អ្នកកំពុងឃុំក្នុងពន្ធនាគារព្រៃសដែលប្រជាពលរដ្ឋមានជម្លោះដីធ្លីកំពុងធ្វើតវ៉ាទាមទារឲ្យដោះលែងនៅពេលនេះមានចំនួន១៧នាក់ ដែលមានដូចជា សកម្មជនដីធ្លីតំបន់បឹងកក់ ព្រះសង្ឈ និងសកម្មជនគណបក្សសង្គ្រោះជាតិ។
ទោះបីមិនទាន់មានការឆ្លើយតប និងមិនដឹងថា ពេលណាអ្នកជាប់ឃុំទាំងនោះត្រូវដោះលែងឲ្យមានសេរីភាពឡើងវិញក៏ដោយ ក៏ប៉ុន្តែប្រជាពលរដ្ឋអ្នកតវ៉ាមិនបោះបង់ក្តីសង្ឃឹមរបស់ពួកគេនោះឡើយ។ អ្នកស្រី ប៉ូវ សោភា បានបញ្ជាក់ថា ប្រជាពលរដ្ឋនឹងមកប្រមូលផ្តុំគ្នាតវ៉ានៅមុខពន្ធនាគារព្រៃសរនេះ រហូតដរាបណាមានការដោះលែងអ្នកកំពុងជាប់ឃុំទាំងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ