លោកស្រី មីកាអែល ហ្សង់ (Michaëlle Jean)ក្លាយជាអគ្គលេខាធិការថ្មីរបស់អង្គការប្រទេសនិយាយភាសាបារាំង
ជំនួបកំពូលលើកទី ១៥ នៃអង្គការអន្តរជាតិប្រទេសនិយាយភាសាបារាំងបានបិទបញ្ចប់កាលពីម្សិលមិញ នៅរដ្ឋធានី ដាកាប្រទេសសេណេហ្គាល់។ លោកស្រី មីកាអែល ហ្សង់ (Michaëlle Jean) ជនជាតិកាណាដា ត្រូវបានប្រមុខរដ្ឋ និងតំណាងប្រទេសសមាជិកទាំង ៥៧ ជ្រើសរើសជាឯកច្ឆ័នអោយដឹកនាំអង្គការប្រទេសនិយាយភាសាបារាំងមួយនេះ សំរាប់អាណ្ណត្តិរយៈពេល ៤ ឆ្នាំ។ មុនការតែងតាំងនេះលោកស្រី មីកាអែល ហ្សង់ បានដឹកនាំយុទ្ធនាការស្វែងរកសំលេងពីប្រទេសជាសមាជិក ដោយសន្យាផ្លាស់ប្តូរមុខមាត់ថ្មីរបស់អង្គការដ៏ធំមួយនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
នេះជាលើកទីមួយក្នុងប្រវត្តិសាស្រ្ត ដែលអង្គការអន្តរជាតិប្រទេសនិយាយភាសាបារាំង (Organisation internationale de la Francophonie) ដែលគេនិយមហៅថា La Francophonieមានប្រមុខដឹកនាំជាស្រ្តី គឺ លោកស្រី មីកាអែល ហ្សង់ (Michaëlle Jean) ជាជនជាតិកាណាដា ដើមកំណើតហៃទី។ មានអាយុ ៥៧ ឆ្នាំ លោកស្រីនឹងចូលកាន់តំណែងជាអគ្គលេខាធិការថ្មី របស់អង្គការនេះចាប់ពីខែមករា ឆ្នាំ២០១៥ ខាងមុខនេះ ដោយជំនួសលោក អាប់ឌុល ដីយូស (Abdou Diouf) ដែលបានដឹកនាំអង្គការ La Francophonie នេះអស់រយៈពេល ១២ ឆ្នាំមកហើយ។
តាមរយៈសេចក្តីប្រកាសមួយចេញផ្សាយដោយក្រុមការងារដឹកនាំយុទ្ធនាការរបស់គាត់ លោកស្រី មីកាអែល ហ្សង់ (Michaëlle Jean) បានមានប្រសាសន៍ថា លោកស្រីដឹងច្បាស់ពីទំហំការងារ និងភាពទទួលខុសត្រូវក្នុងតួនាទីថ្មីនេះ។ លោកស្រីទទូចចង់អោយមានការផ្លាស់ប្តូរបែបទំនើបនៃរបៀបដឹកនាំអង្គការកំពូលសំរាប់ប្រទេសនិយាយភាសាបារាំងមួយនេះ ដោយផ្តោតចក្ខុវិស័យលើអនាគាត។
នៅក្នុងនោះផងដែរ លោកស្រី មីកាអែល ហ្សង់ (Michaëlle Jean) ក៏បានបង្ហាញទស្សនៈដោយចង់អោយអង្គការនេះប្រឹងប្រែងធ្វើការលើផែ្នកសេដ្ឋកិច្ច ដោយជំរុញអោយមានកិច្ចសន្ទនាគ្នាកាន់តែស្វាហាប់ និងតម្លារភាពរវាងប្រទេសសមាជិក ដែលមានភាសាបារាំងជាយានប្រាស្រ័យទាក់ទង។ លោកស្រីក៏ចង់ឃើញផងដែរ អោយមានការកាត់បន្ថយគម្លាតគ្នារវាងប្រទេសក្រីក្រ និងប្រទេសអ្នកមាន ដែលជាសមាជិករបស់អង្គការ La Francophonie នេះ។
សូមបញ្ជាក់ថា ការជ្រើសតាំងលោកស្រី មីកាអែល ហ្សង់ (Michaëlle Jean) អោយក្លាយជាអគ្គលេខាធិការថ្មីនេះ ជាគោលដៅចម្បងរបស់រដ្ឋាភិបាលប្រទេសកាណាដា។ ប្រទេសនេះបានចំណាយថវិការក្នុងការជួយធ្វើយុទ្ធនាការអោយលោកស្រី មីកាអែល ហ្សង់ (Michaëlle Jean)ដើរស្វែងរកសំលេងគាំទ្របេក្ខភាពពីប្រទេសសមាជិក មានជាអាទិ៍ លោកស្រីបានធ្វើដំណើរមកប្រទេសកម្ពុជា ឡាវ និងវៀតណាម។ អង្គការ La Francophonie នេះមានថវិការដំណើរការ ១០០ លានដុល្លារក្នុងមួយឆ្នាំ។ ប្រទេសបារាំងជាប្រទេសមានដែលបានផ្គត់ផ្គង់ច្រើនជាងគេ ក្នុងទំហំទឹកប្រាក់ប្រមាណ ៦៥ %។ ប្រទេសកាណាដា ដែលជាប្រទេសមានបដិភាគធំទីពីរបន្ទាប់ពីប្រទេសបារាំង ចង់ឃើញបេក្ខភាពលោកស្រី មីកាអែល ហ្សង់ (Michaëlle Jean) ដឹកនាំអង្គការធំនេះ ព្រោះកាណាដាចង់បង្កើតដៃគូពាណិជ្ជកម្មរវាងប្រទេសសមាជិក ជាជាងយកចិត្តទុកដាក់តែលើភាសា និងវប្បធម៌។
លោកស្រី មីកាអែល ហ្សង់ (Michaëlle Jean) កើតនៅឆ្នាំ ១៩៥៧ នាទីក្រុងព័រតូប្រាំង ប្រទេសហៃទី។ នាឆ្នាំ១៩៦៨ ពេលមានអាយុ ១១ ឆ្នាំ លោកស្រី និងឪពុកម្តាយបានមកដល់ប្រទេសកាណាដា ដោយបានរត់ចេញពីរបបដឹកនាំរបស់ជនផ្តាច់ការ François Duval។ ដោយរស់នៅក្នុងខេត្តកេបិច លោកស្រីបានបញ្ចប់ការសិក្សាថ្នាក់បរិញ្ញាប័ត្រអក្សរសាស្រ្ត ជំនាញផែ្នកអក្សរសិល្ប៍ និងភាសាទំនើប (ភាសាអ៊ីតាលី និងអេស៉្បាញ) ពីសាកលវិទ្យាល័យម៉ុងរេអាល់ (Université de Montréal)។
នៅសាកលវិទ្យាល័យនោះ លោកស្រីបានបំរើការងារជាគ្រូបង្រៀនផែ្នកភាសាអ៊ីតាលីរហូតឆ្នាំ ១៩៨៨ មុននឹងចូលបំរើការងារជាអ្នកកាសែតអោយស្ថានីយ៍ទូរទស្សន៍ Radio Canada ។
នាឆ្នាំ ១៩៩៥ លោកស្រីបានក្លាយជាពិធីការនី ក្នុងកម្មវិធីព័ត៌មានអោយបណ្តាញព័ត៌មានជាភាសាបារាំង របស់ស្ថានីយ៍ទូរទស្សន៍ Radio Canada និងជាភាសាអង់គ្លេស របស់ស្ថានីយ៍ទូរទស្សន៍ CBC Newsworld។ ភាពស្វាហាប់ និងសកម្មភាពមនុស្សធម៌ ក្នុងការបង្កើតបណ្តាញផ្តល់ជម្រកដល់ស្ត្រីរងគ្រោះដោយសារអំពើរហឹង្សាក្នុងគ្រួសារ នៅក្នុងខេត្តកេបិច និងតាមបណ្តាខេត្តផ្សេងទៀតក្នុងប្រទេសកាណាដាបានធ្វើអោយលោកស្រី មីកាអែល ហ្សង់ (Michaëlle Jean) ទទួលបានមុខងារថ្មីជាអគ្គទេសាភិបាលកាណាដា តំណាងអោយម្ចាស់ក្សត្រីយ៍ អេលីហ្សាប៊ែត ទី ២។ លោកស្រីបានកាន់កាប់តំណែងកំពូល ក្នុងនាមជាប្រមុខរដ្ឋប្រទេសកាណាដានេះអស់រយៈពេល ៥ ឆ្នាំ ពោលគឺ ចាប់ពីឆ្នាំ ២០០៥ ដល់ឆ្នាំ ២០១០។
សូមបញ្ជាក់ថា ដោយសារកត្តាប្រវត្តិសាស្រ្តប្រទេសកាណាដាមានរបបដឹកនាំប្រជាធិបតេយ្យ ក្រោមទំរង់បែបរាជានិយមអាស្រ័យរដ្ឋធម្មញ្ញ ដោយស្ថិតមរតករាជានិយមរបស់ប្រទេសអង់គ្លេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ