លោក សម រង្ស៊ី លោក ហ៊ុន សែន ព្រះអង្គម្ចាស់ក្សត្រី អារុណរស្មី ជាបេក្ខជននាយករដ្ឋមន្រ្តី
សម្រាប់ការបោះឆ្នោតតំណាងរាស្ត្រខែកក្កដាឆ្នាំ២០១៣ខាងមុខនេះ គណបក្សសង្រ្គោះជាតិនឹងតែងតាំងលោក សម រង្ស៊ី ជាបេក្ខជននាយករដ្ឋមន្ត្រី។ គណបក្សហ៊្វុនស៊ិនប៉ិចអាចតែងតាំងព្រះអង្គម្ចាស់ក្សត្រីនរោត្តមអារុណរស្មី ជាបេក្ខនារីនាយករដ្ឋមន្រ្តី។ រីឯគណបក្សប្រជាជនកម្ពុជានឹងតែងតាំងលោក ហ៊ុន សែន ជាបេក្ខជននាយករដ្ឋមន្ត្រីបន្តទៀត។
ចុះផ្សាយនៅថ្ងៃ៖
ស្តាប់ - ០២:៤០
លោក ប៉ុល ហំម អ្នកនាំពាក្យគណបក្សសង្រ្គោះជាតិបានបញ្ជាក់ប្រាប់នៅថ្ងៃសៅរ៍នេះថា គណបក្សនឹងតែងតាំងលោក សម រង្ស៊ី ដែលបច្ចុប្បន្នជាប្រធានគណបក្សអោយឈរឈ្មោះជាបេក្ខជននាយករដ្ឋមន្រ្តីតំណាងអោយគណបក្សសង្រ្គោះជាតិសម្រាប់ការបោះឆ្នោតជាតិខែកក្កដាឆ្នាំ២០១៣ខាងមុខនេះ។ ការសម្រេចនេះនឹងធ្វើឡើងជាផ្លូវការម្តងទៀត នៅក្រោយសមាជគណបក្សសង្គ្រោះជាតិនៅថ្ងៃទី៧ ខែមេសាឆ្នាំ២០១៣ខាងមុខនេះ។ សមាជលើកទី១របស់គណបក្សសង្គ្រោះជាតិមានទិសដៅប្រកាសជាផ្លូវការនូវតួនាទីប្រធានគណបក្ស អនុប្រធានគណបក្ស និងថ្នាក់ដឹកនាំដទៃមួយចំនួនផ្សេងទៀត។
លោក ប៉ុល ហំម អ្នកនាំពាក្យគណបក្សសង្គ្រោះជាតិបានបន្តទៀតថា ប្រសិនបើគណបក្សសង្គ្រោះជាតិឈ្នះឆ្នោត លោក សម រង្ស៊ីនឹងក្លាយទៅជានាយករដ្ឋមន្ត្រីនៃប្រទេសកម្ពុជា លោក កឹម សុខា អនុប្រធានគណបក្សសង្រ្គោះជាតិនឹងក្លាយទៅជាប្រធានរដ្ឋសភាជាតិ។ សម្រាប់បេក្ខភាពរបស់ លោក កឹម សុខា វាគ្មានបញ្ហាទេ។ ប៉ុន្តែសម្រាប់លោក សម រង្ស៊ី មានសំណួរជាច្រើនបានលើកឡើងថា តើលោកអាចក្លាយខ្លួនទៅជានាយករដ្ឋមន្រ្តីម្តេចនឹងកើត បើរូបលោកត្រូវបានហាមឃាត់មិនអោយចូលរួមបោះឆ្នោតដោយសារតែជាប់ទោសរឿងព្រំដែននោះ?។
សម្រាប់គណបក្សហ៊្វុនស៊ិនប៉ិច លោក ញឹក ប៊ុនឆៃ ប្រធានប្រតិបត្តិនៃគណបក្សបានបញ្ជាក់ប្រាប់អោយដឹងនៅថ្ងៃសៅរ៍នេះថា គណបក្សមិនទាន់បានសម្រេចជាផ្លូវការថា នណាជាបេក្ខជននាយករដ្ឋមន្រ្តីនៅឡើយទេ។ ប៉ុន្តែជាគោលការណ៍ ប្រធានគណបក្សនឹងក្លាយទៅជាបេក្ខជននាយករដ្ឋមន្ត្រី។ ត្រង់ចំណុចនេះ សូមបញ្ជាក់ថា នៅថ្ងៃទី២៣ ខែមិនាខាងមុខនេះ គណបក្សនឹងរៀបចំសមាជជ្រើសតាំងព្រះអង្គម្ចាស់ក្សត្រីនរោត្តមអារុណរស្មី ជាប្រធានគណបក្សហ្វ៊ុនស៊ិនប៉ិច។ ដូច្នេះ បើផ្អែកលើគោលការណ៍របស់បក្ស ព្រះអង្គម្ចាស់ក្សត្រីនឹងក្លាយទៅជាបេក្ខនារីនាយករដ្ឋមន្រ្តីតំណាងអោយគណបក្សរាជានិយមហ្វ៊ុនស៊ិនប៉ិចសម្រាប់ការបោះឆ្នោតឆ្នាំ២០១៣នេះ។ កាលពីអាណត្តិឆ្នាំ២០០៨កន្លងមក ព្រះអង្គម្ចាសក្សត្រីធ្លាប់ឈរឈ្មោះក្នុងតំណែងនាយករដ្ឋមន្ត្រីម្តងរួចមកហើយ។ ប៉ុន្តែមិនទទួលបានជ័យជំនះទេ។
ងាកមកនិយាយពីគណបក្សប្រជាជនកម្ពុជាវិញ គណបក្សបានសម្រេចនឹងបញ្ជាក់ឡើងវិញជាបន្តបន្ទាប់ថា លោក ហ៊ុន សែន អនុប្រធានគណបក្សប្រជាជនកម្ពុជា គឺជាបេក្ខជននាយករដ្ឋមន្ត្រី ហើយនឹងក្លាយទៅជានាយករដ្ឋមន្ត្រីបន្តទៀត ប្រសិនបើគណបក្សប្រជាជនកម្ពុជាជាប់ឆ្នោតដដែលនោះ។
គួរកត់សម្គាល់ថា សម្រាប់ការបោះឆ្នោតតំណាងរាស្រ្តឆ្នាំ២០១៣នេះ ព្រះអង្គម្ចាស់នរោត្តម រណឫទ្ធិដែលធ្លាប់ជាគូប្រជែងនយោបាយដ៏សំខាន់មួយព្រះអង្គដែរនោះ មិនបានឈរឈ្មោះក្នុងនាមជាអ្នកនយោបាយទៀតឡើយ ពីព្រោះព្រះអង្គបានសម្រេចព្រះទ័យចូលនិវត្តក្នុងឆាកនយោបាយខ្មែរមួយរយៈសិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ