ថៃផលិតកុនខ្មោចយកទៅលក់នៅផ្សារកុនក្នុងមហោស្រពភាពយន្តកាន
នៅក្នុង អំឡុងពេល១០ថ្ងៃ មហោស្រពភាពយន្តកាន ក្នុងប្រទេសបារាំងដែលគេត្រូវចំណាយអស់ប្រាក់ ២៧លានដុល្លារ មានលក្ខណៈសំបូរបែប ដោយសកម្មភាពចម្រុះគ្នា តាំងពីការចាក់បញ្ចាំង ប្រកួតប្រជែងយកកុនណាដែលល្អជាងគេ។ តារាភាពយន្ត ស្រីប្រុស បង្ហាញខ្លួន នៅលើ កម្រាល ព្រំពណ៌ក្រហម។ ចំណែកនៅក្នុងអគាររបស់មហោស្រពវិញ សកម្មភាពទិញដូរ ចរចាទិញ លក់កុន ក៏កំពុងប្រញឹកណាស់ដែរ។ មានកុនប្រមាណ ១៣៥០ ទាំងខ្នាតខ្លី ខ្នាតវែង កុនឯកសារ ដែលមិនបានចូលរួមប្រកួតប្រជែងដណ្តើមពានរង្វាន់ ត្រូវគេចាក់បញ្ចាំងនៅទីផ្សារលក់កុន។ គោលដៅគឺដើម្បីទាក់ទាញមនុស្សជាង៣ម៉ឺននាក់ ដែលបានចុះឈ្មោះក្នុងនាមជាអ្នកប្រកបអាជីពក្នុងផ្នែកភាពយន្ត។
ចុះផ្សាយនៅថ្ងៃ៖ កែប្រែថ្ងៃទី៖
តារាភាពយន្តស្រីចិន គឺកុង លីធ្លាប់បាននិយាយប្រាប់កាសែតបារាំងមួយថា នៅពេលលោកស្រីអស់ទឹកចិត្ត លែងចង់សំដែងកុនម្តងៗ លោកស្រីហាក់អស់សង្ឃឹមក្នុងជីវិត។ ប៉ុន្តែ ពេលធ្វើដំណើរមកចូលរួមនៅក្នុងមហោស្រពភាពយន្តកាន ទឹកចិត្តចង់ធ្វើការ ជាអ្នកសំដែងកុន ក៏មានឡើងវិញយ៉ាងប្លែក។ តាមលោកស្រី នោះគឺមកពីបរិយាកាសនៅក្នុងមហោស្រពភាពយន្តកាន ដែលសំបូរដោយការចូលរួមពីតារាមកពីគ្រប់ប្រទេស ហើយ តារាភាពយន្តក៏ត្រូវគេគោរព និងឲ្យតម្លៃយ៉ាងសម្បើម នៅក្នុងមហោស្រព។
ការពិត មហោស្រពភាពយន្តកាន អាចជាកន្លែងប្រមូលផ្តុំតារា ភាពយន្ត មក ពី គ្រប់ទិសទី ប៉ុន្តែ ជាមួយគ្នានោះ មហោស្រពនេះក៏ជាទីផ្សារ ទិញដូរ យ៉ាង ក្រាសក្រែលខ្សែភាពយន្ត នៅក្នុងពិភពលោក។ ចាប់តាំងពីថ្ងៃបើកសម្ពោធមហោស្រពកាន ក្រុមហ៊ុនផលិតកុនរាប់រយ និងទីភ្នាក់ងាររដ្ឋាភិបាលទទួលបន្ទុកខ្សែភាពយន្ត ឬទេសចរណ៍ មកពីអឺរ៉ុប អាស៊ី អាមេរិក និងអាហ្រ្វិក បានបោះទីតាំង នៅក្នុងបរិវេណមហោស្រពកាន។ នៅតំបន់អាស៊ីអាគ្នេយ៍ ជាទីដែលកម្ពុជា ជាសមាជិក គេឃើញមាន ស្តង់ក្រុមហ៊ុនផលិតកុន ឥណ្ឌូណេស៊ី វៀតណាម និងថៃ។ ថៃ ចេញមុខលេចធ្លោជាងគេ ជាមួយនឹងស្តង់ក្រុមហ៊ុនផលិតកុន ចំនួន ៨។
ក្រុមហ៊ុន five star production ដែលចូលរួមក្នុងមហោស្រពកាន អស់១១ឆ្នាំមកហើយ បាននាំកុនចំនួន ៥មកតាំងលក់រកអតិថិជន។ កញ្ញា ប៉ានីតា លីគិថាម៉ាសាន ទទួលបន្ទុកគណនេយ្យបាននិយាយ សឹងជារៀងរាល់ឆ្នាំ ក្រុមហ៊ុនរបស់នាងលក់ដាច់កុនច្រើន នៅក្នុងឱកាសមហោស្រពកាន។
“កុនមួយនេះទើបចេញថ្មី នឹងចេញនៅរោងកុនក្នុងប្រទេសថៃ នៅខែក្រោយ។ វាប្រភេទរឿងខ្មោច ដែលទទួលជោគជ័យច្រើននៅទីផ្សារលក់កុនរបស់មហោស្រពកាន។ ទីផ្សារកុននៅមហោស្រពកានសំខាន់ណាស់ ពីព្រោះថា មនុស្សមកពីគ្រប់ទិសទី ក្នុងពិភពលោករកមើលទិញកុនខ្មោច រឿងដែលធ្វើឲ្យគេព្រឺសំបុរ នៅក្នុងមហោស្រពនេះ។ មានអ្នកទិញជាច្រើនមកពីអាស៊ី ឬមកពីអាមេរិក ដើម្បីរកទិញរឿងខ្មោច។ នៅទីនេះ យើងអាចជួបអ្នកទិញជាច្រើន អីចឹងហើយ បានជាមកចូលរួម នៅក្នុងមហោស្រពកាននេះ ជារៀងរាល់ឆ្នាំ។ គឺយើងមិនអាចខកខានបានជាដាច់ខាត”។
គេមិនអាចខកខានព្រោះថា នៅក្នុងមហោស្រពកាន មានអ្នកទិញមកពីគ្រប់ទិសទី ជាពិសេស អ្នកទិញកុន មកពីអាស៊ី ដូចជាហុងកុង និងតៃវ៉ាន់ជាដើម។ អ្នកទិញទាំងនេះ គេចូលចិត្តទិញកុនខ្មោចពីក្រុមហ៊ុនថៃ ដើម្បីយកទៅលក់ចែកចាយបន្តក្នុងប្រទេសរបស់គេ។ គឺតម្រូវការនេះហើយដែលធ្វើស្តង់របស់ក្រុមហ៊ុន five star production មានចាក់បញ្ចាំងផ្សាយពាណិជ្ជកម្មតែពីកុនខ្មោច។
កញ្ញា ផានីតា និយាយថា “មូលហេតុដែលធ្វើឲ្យយើងផលិតកុនខ្មោច គឺមកពីទីផ្សារបច្ចុប្បន្នចង់បានរឿងប្រភេទនេះ។ ខ្ញុំគិតថា រឿងកុនខ្មោច គឺអាចយកទៅចាក់បញ្ចាំងបាននៅគ្រប់ទិសទីក្នុងពិភពលោក។ អ្នកដឹងទេ?មនុស្សគ្រប់គ្នាអាច ឆាប់យល់អត្ថន័យរឿងខ្មោច ច្រើនជាងស្នេហា រឿងសង្គម។ រឿងស្នេហាអាចលក់ដាច់តែនៅក្នុងស្រុក ប៉ុន្តែ រឿងខ្មោចកាចសាហាវ អាចយកទៅលក់បាននៅគ្រប់ប្រទេស។ នៅប្រទេសថៃ គេចូលមើលកុនខ្មោចច្រើន នៅរដូវបុណ្យហាឡូវីន ដូចជានៅខែតុលា។ ចំណែកនៅរដូវបុណ្យស្នេហា យុវជនមានស្នេហាចូលចិត្តនាំសង្សារមើលរឿងប្រភេទរ៉ូម៉ង់ទិក។ អីចឹងកុនដាច់ច្រើន ឬតិចគឺអាស្រ័យទៅលើរដូវកាល។ ប៉ុន្តែ ខ្ញុំគិតថា កុនខ្មោច នៅតែដាច់ មានគេមានច្រើន នៅគ្រប់រដូវតែម្តង នៅប្រទេសថៃ។ តាមខ្ញុំគិត គេចូលចិត្តមើលកុនខ្មោច មកពីគេចាប់អារម្មណ៍រឿងខ្មោចថៃ។ គេទៅមើលកុនខ្មោច មកពីចង់ដឹងថា តើវារំភើប រំជើបព្រឺព្រួច ប៉ុណ្ណា ”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ