The Search កុនដែលនិយាយពីការសម្លាប់រង្គាលរបស់ទ័ពរុស្ស៊ី នៅឆេឆេនី
មហោស្រពភាពយន្តកានធ្លាប់តែល្បីឈ្មោះខាងឲ្យតម្លៃទៅលើសិល្បៈ និងសោភ័ណភាពកុន ប៉ុន្តែ នៅប៉ុន្មានឆ្នាំចុងក្រោយនេះ គណៈកម្មការរបស់មហោស្រពកានមាននិន្នាការថ្មី គឺឧស្សាហ៍ជ្រើសរើសកុនដែលមានទាក់ទងទៅនឹងព្រឹត្តិការណ៍បច្ចុប្បន្នភាព សង្រ្គាម និងអំពើហិង្សាដែលកំពុងកើតឡើងនៅក្នុងពិភពលោក។ នៅឆ្នាំនេះ នៅក្នុងមហោស្រពកាន លើកទី៦៧ កុនប្រឌិត ឬភាពយន្តឯកសារដែលមាននិយាយពីចលនាប្រឆាំងនៅទីលានម៉ៃដាន ក្នុងប្រទេសអ៊ុយក្រែន សង្រ្គាមនៅស៊ីរី អ៊ីរ៉ាក់ ឬបូស្នី ត្រូវបានជ្រើសរើសយកមកចាក់បញ្ចាំង នៅក្រៅក្របខ័ណ្ឌការប្រកួត នៅក្នុងមហោស្រពភាពយន្តកាន។ ចំណែកកុននិយាយពីសង្រ្គាម ចំនួន៣បានចូលរួមប្រកួតប្រជែងយកតាល់ប័ត្រមាស La Palme d’or។ ខ្សែភាពយន្ត The Search ដឹកនាំដោយលោកMichel Hazanaviciusដែលនិយាយពីសង្រ្គាមរបស់ទ័ពរុស្ស៊ី នៅឆេឆេនីត្រូវបានចាក់បញ្ចាំងនៅក្នុងការប្រកួត កាលពីថ្ងៃពុធម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥១
The Search មានលក្ខណៈរស់រវើក រន្ធត់ និងកំសត់។ កុននេះនិយាយពីការនិរាសព្រាត់ប្រាស់គ្នារបស់បងប្អូន ដោយសារការលុកលុយរបស់ទ័ពរុស្ស៊ី នៅឆេឆេនី ក្នុងទសវត្សរ៍ឆ្នាំ ១៩៩៩។ ទ័ពរុស្ស៊ីដែលបើកប្រតិបត្តិការបាញ់សម្លាប់ប្រជាជនកាន់សាសនាអ៊ីស្លាម ឆេឆេនី ក្រោមលេសបោសសម្អាតភេរវជន។ កុមារហាជី អាយុ៩ឆ្នាំ បន្ទាប់ពីបានឃើញទាហានរុស្ស៊ីបាញ់សម្លាប់ឪពុកម្តាយរបស់ខ្លួន បានលួចបីប្អូនជាកូនង៉ាចាកចេញពីភូមិ។ ហាជីបានយកប្អូនទៅទុកនៅផ្ទះអ្នកភូមិ ដោយគិតថា ខ្លួនមិនអាចមើលថែប្អូនបានដោយសារតែខ្លួនក្មេងពេក ហើយនៅគ្រប់កន្លែងសុទ្ធត្រូវឆ្លងកាត់ដោយរថក្រោះទាហានរុស្ស៊ី។
ហាជីបានធ្វើដំណើរទៅជំរំភៀសខ្លួន នៅជិតព្រំដែនរុស្ស៊ី ជាទីស្រ្តីបារាំងឈ្មោះ ការ៉ូល មន្រ្តីគណៈកម្មការការពារសិទ្ធិមនុស្សអឺរ៉ុបកំពុងធ្វើការ។ ការ៉ូលបានចាប់អារម្មណ៍ជួយហាជី ដែលរស់នៅតែលតោលនៅតាមផ្លូវ។ រឿងThe Search បង្ហាញពីការពើបប្រទះគ្នានូវខ្សែជីវិតចំនួនបួន នោះ គឺមន្រ្តីសិទ្ធិមនុស្ស កុមាររងគ្រោះដោយសារសង្រ្គាម បងស្រីរបស់ហាជី និងយុវជននីកូឡៃជនជាតិរុស្ស៊ី ដែលត្រូវគេចាប់បង្ខំឲ្យធ្វើទាហាននៅឆេឆេនី។
នៅក្នុងសាច់រឿង The Search តួឯកស្រីការ៉ូលលើកនិយាយជាច្រើនដងពីអសមត្ថភាពរបស់ស្ថាប័នការពារសិទ្ធិមនុស្សអន្តរជាតិ ដែលមិនអន្តរាគម និងបណ្តោយឲ្យប្រទេសរុស្ស៊ី នៅក្រោមការគ្រប់គ្រងរបស់នាយករដ្ឋមន្រ្តីពូទីន ចូលឈ្លានពាន បាញ់សម្លាប់ប្រជាជនឆេឆេនី។
នៅក្នុងសន្និសីទកាសែត កាលពីថ្ងៃម្សិលមិញ សមិទ្ធិករ Michel Hazanaviciusទទួលស្គាល់ថា រឿងនេះមានលក្ខណៈនយោបាយ និងអាចឆ្លើយតបនឹងបរិបទបច្ចុប្បន្ន គឺរុស្ស៊ី និងវិបត្តិនៅអ៊ុយក្រែន។ ទោះបីជាអ្នកដឹកនាំរឿងព្យាយាមបញ្ជាក់ថា ខ្លួនចង់ផលិតកុនដែលឆ្លុះបញ្ចាំងពីតថភាពមនុស្សធម៌ និងមិនកាន់ជើងខាងភាគីណាទំាងអស់ គឺមិនទម្លាក់កំហុសទៅទាហានរុស្ស៊ីនោះ ប៉ុន្តែ ចង់មិនចង់ ខ្សែភាពយន្ត The Search គឺប្រៀបបាននឹងការរំលឹកឲ្យគេដឹងឡើងវិញពីនយោបាយ ចរិកធ្វើឈ្លានពានរបស់ទីក្រុងម៉ូស្គូ។ ខ្លឹមសាររបស់ខ្សែរឿងប្រៀបបាននឹងការដាស់តឿន សហគមន៍អន្តរជាតិ មិនឲ្យភ្លេចការសម្លាប់រង្គាលរបស់ទាហានរុស្ស៊ី ទៅលើប្រជាជនស្លូតត្រង់នៅឆេឆេនី និងគេត្រូវតែតាមដានជានិច្ចសកម្មភាពទ័ពរុស្ស៊ី ដើម្បីជៀសវាងកុំឲ្យមានការឈ្លានពានបែបនេះជាថ្មីរបស់ទាហានរុស្ស៊ី នៅអ៊ុយក្រែន៕
កុន The Search ជាកុនទី៦របស់លោក Michel Hazanavicius សមិទ្ធិករបារាំង ដែលធ្លាប់បានប្រមូលពានរង្វាន់អូស្ការសម្រាប់រឿងArtist កាលពីឆ្នាំ ២០១២។ តើ The Searchនឹងអាចដណ្តើមរង្វាន់តាល់ប័ត្រមាស នៅមហោស្រពកាននៅឆ្នាំនេះដែរឬទេ។ គេនឹងរង់ចាំស្តាប់លទ្ធផល នៅថ្ងៃអាទិត្យ ចុងសប្តាហ៍នេះ នៅពេលដែលកុននេះនឹងចេញជាផ្លូវការនៅតាមរោងកុន នៅខែវិច្ឆិកាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ