អត្រាកំណើនសេដ្ឋកិច្ចចិនធ្លាក់ចុះ តែមានប្រភពកំណើនល្អជាងមុន
ចុះផ្សាយនៅថ្ងៃ៖
ស្តាប់ - ០៤:២៨
តួលេខចេញផ្សាយដោយរដ្ឋាភិបាលចិន កាលពីថ្ងៃព្រហស្បតិ៍ ម្សិលមិញនេះ បង្ហាញថា គិតមកត្រឹមត្រីមាសទី៣ ឆ្នាំ២០១២នេះ កំណើនសេដ្ឋកិច្ចចិន គិតជាអត្រាប្រចាំឆ្នាំ បានបន្តធ្លាក់ចុះមកនៅត្រឹមតែ ៧,៤% ប៉ុណ្ណោះ ធៀបនឹង ៧,៦% កាលពីត្រីមាសមុន។ អត្រាកំណើនសេដ្ឋកិច្ចប្រចាំឆ្នាំក្រោម ៨% គឺជាកំណើនទាបបំផុត ដែលចិនមិនធ្លាប់ឃើញ ចាប់តាំងពីឆ្នាំ១៩៩៩មក។ ក៏ប៉ុន្តែ សេដ្ឋកិច្ចចិនពេលនេះ មានអត្រាកំណើនទាបក៏ពិតមែន តែម៉ូដែលកំណើនសេដ្ឋកិច្ចមានលក្ខណៈប្រសើរជាងមុន ដែលអាចឲ្យសេដ្ឋកិច្ចចិនមានកំណើនប្រកបដោយចីរភាព ក្នុងរយៈពេលវែង។
ក្នុងរយៈពេលជាងមួយទសវត្សរ៍កន្លងទៅនេះ កំណើនសេដ្ឋកិច្ចចិនមានអត្រាកំណើនប្រចាំឆ្នាំ មិនដែលទាបជាង ៨%នោះទេ ហើយអត្រាកំណើនប្រចាំឆ្នាំ យ៉ាងតិច ៨% នេះ គឺជាគោលដៅចម្បងបំផុត ដែលថ្នាក់ដឹកនាំចិនតែងតែខិតខំព្យាយាម ជម្នះធ្វើឲ្យខាងតែបាន ដោយបារម្ភថា អត្រាកំណើនទាបជាងនេះនឹងនាំឲ្យមានបញ្ហាអ្នកអត់ការងារធ្វើគ្រប់គ្រងមិនជាប់ ដែលអាចបង្កជាវិបត្តិសង្គម ឬក៏អាចរាលដាលទៅជាវិបត្តិនយោបាយ នាំឲ្យរង្គោះរង្គើដល់អំណាចរបស់បក្សកុម្មុយនិស្ត។
នៅឆ្នាំ២០១២នេះ សេដ្ឋកិច្ចចិនទំនងជានឹងមានអត្រាកំណើនទាបជាង ៨% ជាលើកដំបូងបង្អស់ ចាប់តាំងពីឆ្នាំ១៩៩៩មក ក៏ប៉ុន្តែ មេដឹកនាំចិនហាក់ដូចជាមិនភ័យស្លន់ស្លោ ដូចការរំពឹងទុកនោះទេ។ ទាំងនេះគឺដោយសារតែហេតុផលច្រើនយ៉ាង។
ទីមួយ គឺទាក់ទងនឹងបញ្ហាអត់ការងារធ្វើដែលជាចំណុចដែលថ្នាក់ដឹកនាំចិនតែងតែបារម្ភខ្លាំងជាងគេ នាពេលកន្លងមក។ រហូតមកទល់ពេលនេះ នៅចិន គេមិនឃើញមានការបញ្ឈប់បុគ្គលិកក្នុងទ្រង់ទ្រាយធំ ដែលគួរឲ្យព្រួយបារម្ភនោះទេ។ ម្យ៉ាងទៀត តួលេខដែលចេញផ្សាយដោយរដ្ឋាភិបាលចិន កាលពីម្សិលមិញ បង្ហាញថា អត្រាកំណើនសេដ្ឋកិច្ចប្រចាំឆ្នាំរបស់ចិនមានត្រឹមតែ ៧,៤% ក៏ពិតមែន ក៏ប៉ុន្តែ ក្នុងពេលជាមួយគ្នា សេដ្ឋកិច្ចចិនក៏បានបង្កើតការងារថ្មី សម្រាប់ប្រជាជនចិនរហូតដល់ទៅជាង ១០លាននាក់ដែរ នៅក្នុងរយៈពេល ៩ខែចុងក្រោយនេះ។ នៅពេលនេះ អត្រាកំណើននៃកម្លាំងពលកម្មចិន មានកម្រិតទាបជាងពីពេលមុនៗ ដូច្នេះ អត្រាកំណើនសេដ្ឋកិច្ចទាបជាងមុន ក៏អាចគ្រប់គ្រាន់ ឲ្យចិនស្រូបយកកម្លាំងពលកម្មទាំងនេះ ចូលក្នុងទីផ្សារការងារបានដែរ។
ហេតុផលដ៏សំខាន់មួយទៀត គឺរបាយការណ៍សេដ្ឋកិច្ចចិនបង្ហាញថា អត្រាកំណើនសេដ្ឋកិច្ចចិន ដែលចេះតែធ្លាក់ចុះជាបន្តបន្ទាប់ តាំងពីដើមឆ្នាំ២០១២នេះ នៅពេលនេះ ទំនងជានឹងមិនធ្លាក់ចុះខ្លាំងជាងនេះទៀតទេ គឺចូលដល់ដំណាក់កាលមួយថេរ ហើយអាចនឹងងើបឡើងវិញបន្តិច នៅចុងឆ្នាំនេះ។ លើសពីនេះទៅទៀត កំណើនសេដ្ឋកិច្ចចិន នៅពេលនេះ កំពុងតែងាកទៅរកម៉ូដែលថ្មីមួយ ដែលអាចឲ្យសេដ្ឋកិច្ចចិនមានកំណើនប្រកបដោយចីរភាព ក្នុងរយៈពេលវែងទៅមុខ។
យើងដឹងស្រាប់ហើយថា កន្លងទៅនេះ កំណើនសេដ្ឋកិច្ចចិន មានអត្រាខ្ពស់ ក៏ប៉ុន្តែ ពឹងផ្អែកខ្លាំងទៅលើការនាំចេញ និងការវិនិយោគពីបរទេស។ ម៉ូដែលកំណើនសេដ្ឋកិច្ចនេះ មិនអាចធានាឲ្យចិនបន្តមានកំណើនសេដ្ឋកិច្ចជាប់លាប់ ក្នុងរយៈពេលវែងបានទេ ពីព្រោះថា ម្យ៉ាង វាជាកំណើនសេដ្ឋកិច្ច ដែលពឹងផ្អែកលើទីផ្សារក្រៅប្រទេស និងស្ថានភាពសេដ្ឋកិច្ចពិភពលោក ដែលចិនមិនអាចគ្រប់គ្រងបាន និងមិនអាចកំណត់ទិសដៅតម្រូវទៅតាមសេចក្តីត្រូវការនៃសេដ្ឋកិច្ចរបស់ខ្លួនបាន។ ការធ្លាក់ចុះក្នុងវិស័យនាំចេញ និងការវិនិយោគបរទេសនៅចិន ដោយសារតែវិបត្តិសេដ្ឋកិច្ចពិភពលោក នៅពេលនេះ គឺជាភស្តុតាងមួយស្រាប់។
ម្យ៉ាងទៀត ម៉ូដែលនៃកំណើនសេដ្ឋកិច្ចចិន នាពេលកន្លងទៅនេះ ពឹងផ្អែកទៅលើកត្តាដ៏ចម្បងមួយទៀត គឺតម្លៃពលកម្មទាប ងាយស្រួលក្នុងការប្រកួតប្រជែង ទាក់ទាញក្រុមហ៊ុនបរទេសឲ្យមកបោះទុនវិនិយោគ បង្កើតរោងចក្រផលិត នៅក្នុងប្រទេសចិន ដើម្បីនាំទំនិញចេញទៅលក់នៅលើទីផ្សារអន្តរជាតិ ក្នុងតម្លៃទាប។ ម៉ូដែលនៃកំណើនសេដ្ឋកិច្ចបែបនេះ វាធ្វើឲ្យសេដ្ឋកិច្ចចិនមានអត្រាកំណើនខ្ពស់ បង្កើតការងារ និងបង្កើនប្រាក់ចំណូលរបស់ប្រជាជន ក៏ប៉ុន្តែ វាក៏ធ្វើឲ្យតម្លៃពលកម្មកើនឡើងដែរ ពីព្រោះថា នៅពេលដែលកម្រិតជីវភាពកើនឡើង ប្រជាជនចិនក៏នឹងចាប់ផ្តើមទាមទារប្រាក់ខែកាន់តែច្រើនទៅតាមនេះដែរ។
នៅពេលនេះ ចិនកំពុងតែបង្វែរម៉ូដែលនៃកំណើនសេដ្ឋកិច្ច ទៅរកទិសដៅថ្មីមួយ គឺកំណើនសេដ្ឋកិច្ច ដែលផ្អែកទៅលើការបង្កើនតម្រូវការទីផ្សារក្នុងស្រុក តាមរយៈការបង្កើនការចំណាយរបស់ប្រជាជន និងការវិនិយោគក្នុងស្រុក។
គេសង្កេតឃើញថា នៅក្នុងរយៈពេល ៩ខែកន្លងទៅនេះ វិស័យនាំចេញរបស់ចិនក៏ធ្លាក់ចុះ ហើយការវិនិយោគពីក្រៅប្រទេសក៏ធ្លាក់ចុះ។ ផ្ទុយទៅវិញ ការចំណាយក្នុងស្រុកក៏មានការកើនឡើង ហើយការវិនិយោគក្នុងស្រុកក៏កើនឡើង ជាពិសេស រដ្ឋាភិបាលចិនបានបង្កើនការវិនិយោគកាន់តែខ្លាំង ទៅលើហេដ្ឋារចនាសម្ព័ន្ធ។
តួលេខរបស់ការិយាល័យស្ថិតិចិនបង្ហាញថា នៅក្នុងខែកញ្ញាកន្លងទៅនេះ បង្ហាញថា ការវិនិយោគលើវិស័យដឹកជញ្ជូនតាមផ្លូវដែកកើនឡើង ៧៨% ហើយការវិនិយោគលើវិស័យដឹកជញ្ជូនតាមផ្លូវថ្នល់កើនឡើង ៣៨%។ ចំណែកឯការលក់ដូរទំនិញនៅក្នុងទីផ្សារក្នុងស្រុកចិន (ដែលជាសូចនាករណ៍ចម្បងបង្ហាញពីការវិវឌ្ឍនៃការចំណាយក្នុងស្រុក) មានការកើនឡើងរហូតដល់ទៅជាង ១៤% ធៀបនឹងខែកញ្ញាឆ្នាំមុន។ គិតជារួម គេសង្កេតឃើញថា ក្នុងរយៈពេល ៩ខែកន្លងទៅនេះ ការចំណាយក្នុងស្រុក គឺជាម៉ូទ័រដ៏ចម្បងបំផុត នៃកំណើនសេដ្ឋកិច្ច ពោលគឺ ៥៥% នៃកំណើនផលិតផលក្នុងស្រុកសរុបរបស់ចិន បានមកពីការចំណាយក្នុងស្រុក ដែលជារឿងកម្រនឹងឃើញមាន ក្នុងរយៈពេលជាងមួយទសវត្សរ៍កន្លងទៅនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ