សមត្ថភាពកងទ័ពចិននឹងអាចប្រជែងជាមួយអាមេរិកបាននៅក្នុងតំបន់អាស៊ី
ចុះផ្សាយនៅថ្ងៃ៖
ស្តាប់ - ០៤:០៥
របាយការណ៍របស់ក្រុមអ្នកស្រាវជ្រាវអាមេរិកមួយក្រុម ដែលចេញផ្សាយ នៅថ្ងៃសុក្រនេះ បានធ្វើសេចក្តីសន្និដ្ឋានថា កំណើនខាងផ្នែកសេដ្ឋកិច្ច និងឧស្សាហកម្មរបស់ចិនសព្វថ្ងៃនេះ អាចនឹងធ្វើឲ្យចិនបង្កើនអំណាចយោធារបស់ខ្លួន ដែលអាចមានសមត្ថភាព ក្នុងការប្រជែងជាមួយកងទ័ពអាមេរិកបាន នៅក្នុងតំបន់អាស៊ី។ ក៏ប៉ុន្តែ ក្រុមអ្នកស្រាវជ្រាវទាំងនេះក៏បានព្យាករផងដែរថា ចិនទំនងជានឹងមិនដើរតាមគន្លងអតីតសហភាពសូវៀត ដោយយកអាមេរិកធ្វើជាគូសត្រូវ ហើយប្រកួតប្រជែង ហែកហួរគ្នាតាមរបៀបសង្រ្គាមត្រជាក់កន្លងមកនោះទេ។
របាយការណ៍រៀបចំតាក់តែងឡើងដោយអ្នកសិក្សាស្រាវជ្រាវអាមេរិកចំនួន ៩រូប ហើយចុះផ្សាយដោយវិទ្យាស្ថានស្រាវជ្រាវអាមេរិក ឈ្មោះ Carnegie Endowment for Internaional Peace បានធ្វើការព្យាករថា នៅក្នុងរយៈពេល ២០ឆ្នាំខាងមុខនេះ ចិននឹងអាចមានបច្ចេកវិទ្យាយោធាទំនើបៗ ដែលអាចប្រកួតប្រជែងជាមួយអាមេរិកបាន ក្នុងនោះក៏រួមមានបច្ចេកវិទ្យា ក្នុងការសាងសង់នាវាផ្ទុកយន្តហោះ និងយន្តហោះចម្បាំងបំបាំងកាយផងដែរ។
ក៏ប៉ុន្តែ អំណាចយោធាចិននេះ អាចប្រកួតប្រជែងជាមួយអាមេរិកបាន តែក្នុងក្របខ័ណ្ឌតំបន់អាស៊ីតែប៉ុណ្ណោះ ដោយមិនអាចប្រជែងជាមួយអាមេរិក នៅក្នុងក្របខ័ណ្ឌពិភពលោកបាននោះទេ។ ក្នុងពេលជាមួយគ្នា ក្រុមអ្នកសិក្សាស្រាវជ្រាវទាំងនេះ ក៏បានព្យាករផងដែរថា ចិនក៏មិនមានយុទ្ធសាស្រ្ត ក្នុងការប្រកួតប្រជែងជាមួយអាមេរិក នៅគ្រប់កន្លែង នៅទូទាំងពិភពលោកនោះដែរ។ យុទ្ធសាស្រ្តយោធារបស់ចិន នឹងផ្តោតតែទៅលើតំបន់អាស៊ីមួយប៉ុណ្ណោះ ជាពិសេស នៅក្នុងតំបន់សមុទ្រចិនខាងត្បូង ច្រកសមុទ្រតៃវ៉ាន់ និងតំបន់សមុទ្រជាប់ព្រំដែនជាមួយកូរ៉េ និងជប៉ុន។
នៅក្នុងតំបន់អាស៊ីនេះទៀតសោត ចិនក៏មានយុទ្ធសាស្រ្តត្រឹមតែទប់ទល់នឹងអំណាចទ័ពអាមេរិកប៉ុណ្ណោះ ដោយមិនមានមហិច្ឆតាប្រើកម្លាំងទ័ពរុញច្រានអាមេរិក ចេញពីតំបន់នេះទាំងស្រុងនោះដែរ។ ទាំងនេះ គឺដោយសារតែចិនយកផលប្រយោជន៍សេដ្ឋកិច្ច និងពាណិជ្ជកម្មធ្វើជាអាទិភាពធំជាង ការប្រកួតប្រជែងខាងកម្លាំងទ័ព ហើយដើម្បីរក្សាផលប្រយោជន៍ខាងផ្នែកសេដ្ឋកិច្ច និងពាណិជ្ជកម្ម ចិនត្រូវការរក្សាទំនាក់ទំនងជាមួយសហរដ្ឋអាមេរិក ព្រមទាំងប្រទេសមួយចំនួនផ្សេងទៀត នៅក្នុងតំបន់អាស៊ី។
និយាយជារួមទៅ ក្រុមអ្នកសិក្សាស្រាវជ្រាវអាមេរិក ដែលជាអ្នកនិពន្ធរបាយការណ៍នេះ បានធ្វើការសន្និដ្ឋានថា អាមេរិកទំនងជាមិនចាំបាច់ត្រូវព្រួយបារម្ភខ្លាចចិនយកអាមេរិកធ្វើជាគូសត្រូវ ហើយប្រឈមមុខគ្នាតាមផ្លូវយោធា ដូចជាអតីតសហភាពសូវៀត កាលពីក្នុងសម័យសង្រ្គាមត្រជាក់នោះទេ។
ប្រទេស ដែលទំនងជានឹងត្រូវមានការបារម្ភជាងគេ ចំពោះការកើនឡើងនៃអំណាចយោធាចិន គឺជប៉ុន។ ជប៉ុន ដែលបច្ចុប្បន្ន កំពុងមានទំនាស់ជាមួយចិន គឺជាមហាអំណាចសេដ្ឋកិច្ចមួយនៅអាស៊ី ក៏ប៉ុន្តែ ខាងផ្នែកការពារជាតិ ជប៉ុនត្រូវពឹងផ្អែកលើសហរដ្ឋអាមេរិក ដែលជាសម្ព័ន្ធមិត្ត។
ទាក់ទងនឹងយុទ្ធសាស្រ្តរបស់ជប៉ុន ក្នុងការទប់ទល់នឹងការកើនឡើង នៃអំណាចយោធារបស់ចិននេះ របាយការណ៍របស់ក្រុមអ្នកសិក្សាស្រាវជ្រាវអាមេរិកបានធ្វើការប្រមើមើលពីសេណារីយ៉ូចំនួន ៣។
សេណារីយ៉ូទី១ ដែលគេគិតថាជាសេណារីយ៉ូ ដែលមានប្រូបាប៊ីលីតេខ្ពស់ជាងគេ គឺជប៉ុននឹងបង្កើនសម្ព័ន្ធភាពជាមួយអាមេរិកកាន់តែជិតស្និទ្ធ ដើម្បីយកអំណាចកងទ័ពអាមេរិកមកធ្វើជាខែលទប់ទល់នឹងចិន។ ការជ្រើសរើសយកផ្លូវនេះ គឺដោយសារតែជប៉ុនមានចំណងខាងរដ្ឋធម្មនុញ្ញផង ហើយកំពុងតែប្រឈមមុខនឹងវិបត្តិសេដ្ឋកិច្ចខ្លាំងផង ដែលអាចជាឧបសគ្គធំ រារាំងមិនឲ្យជប៉ុនបង្កើនកម្លាំងកងទ័ពរបស់ខ្លួន ដើម្បីប្រជែងជាមួយចិនបាន។
ក៏ប៉ុន្តែ នៅក្នុងសេណារីយ៉ូទី១នេះ វាអាចចោទជាបញ្ហាមួយ គឺអាមេរិកខ្លួនឯងក៏កំពុងតែឆ្លងកាត់បញ្ហាសេដ្ឋកិច្ច ដែលតម្រូវឲ្យមានការកាត់បន្ថយការចំណាយក្នុងវិស័យការពារជាតិយ៉ាងច្រើនដែរ។ ទាំងនេះអាចនឹងធ្វើឲ្យជប៉ុនបាត់បង់ទំនុកចិត្តលើសមត្ថភាពរបស់អាមេរិក ក្នុងការធានាសន្តិសុខរបស់ពួកគេ ក្នុងការទប់ទល់ជាមួយនឹងអំណាចយោធាចិន ហើយអាចរុញជប៉ុនឲ្យជ្រើសរើសយកជម្រើសយុទ្ធសាស្រ្តពីរផ្សេងទៀត គឺឬមួយ បង្វែរមកចាប់យកចិនធ្វើជាមិត្តវិញតែម្តង ដើម្បីចៀសវាងការប្រឈមមុខដាក់គ្នា ឬមួយ បន្តប្រឈមមុខជាមួយចិនតទៅទៀត ក៏ប៉ុន្តែ លែងពឹងផ្អែកលើអាមេរិក ហើយបង្កើនកម្លាំងយោធាផ្ទាល់ខ្លួនឯង ដោយរួមទាំងការផលិតអាវុធនុយក្លេអ៊ែរផង។
គួរបញ្ជាក់ថា គ្រប់អ្នកជំនាញទាំងអស់នៅលើពិភពលោកសុទ្ធតែយល់ថា នៅពេលបច្ចុប្បន្ននេះ ជប៉ុនមានសមត្ថភាពគ្រប់គ្រាន់ ក្នុងការផលិតអាវុធនុយក្លេអ៊ែរ ហើយអាចធ្វើនៅពេលណាក៏បានដែរ។ គ្រាន់តែថា ប្រជាជនជប៉ុន ដែលជាប្រជាជាតិតែមួយគត់ នៅលើពិភពលោក ដែលធ្លាប់រងគ្រោះដោយអាវុធនុយក្លេអ៊ែរ នៅតែមានការប្រឆាំងយ៉ាងខ្លាំងក្លាបំផុត មិនចង់ឃើញជប៉ុនផលិតអាវុធនុយក្លេអ៊ែរ។
ជាចុងក្រោយ ទាក់ទងនឹងផលវិបាកនៃការកើនឡើងនៃអំណាចយោធាចិន និងការប្រជែងគ្នាខាងផ្នែកយោធា នៅក្នុងតំបន់អាស៊ី ក្រុមអ្នកសិក្សាស្រាវជ្រាវអាមេរិកបានធ្វើការព្យាករថា ថ្វីដ្បិតតែ អាមេរិក និងចិនទំនងជាមិនចង់ប្រឈមមុខដាក់គ្នា បង្កទៅជាសង្រ្គាម ក៏ប៉ុន្តែ ហានិភ័យធំបំផុត សម្រាប់តំបន់អាស៊ី គឺអាចកើតចេញពីជម្លោះតូចតាច ដូចជា ជម្លោះនៅសមុទ្រចិនខាងត្បូង ឬជម្លោះដណ្តើមកោះរវាងចិន និងជប៉ុន ជាដើម ហើយកើតមានរឿងចៃដន្យ ឬការយល់ច្រលំគ្នាណាមួយ ដែលអាចរាលដាល បង្កឲ្យមានការប៉ះទង្គិចគ្នាដោយប្រដាប់អាវុធ ក្នុងទ្រង់ទ្រាយណាមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ