ចិនចង់បិទបញ្ចប់រឿងអាស្រូវ Bo Xilai ឲ្យបានមុនសមាជផ្លាស់ប្តូរមេដឹកនាំ
ចុះផ្សាយនៅថ្ងៃ៖
ស្តាប់ - ០៣:៣៥
កាលពីថ្ងៃព្រហស្បតិ៍ម្សិលមិញ ទីភ្នាក់ងារសារព័ត៌មានចិន ស៊ីនហួ បានចុះផ្សាយថា ភរិយារបស់អតីតមន្រ្តីជាន់ខ្ពស់នៃបក្សកុម្មុយនិស្តចិន គឺលោក Bo Xilai ត្រូវបានតុលាការចិនធ្វើការចោទប្រកាន់ជាផ្លូវការពីបទមនុស្សឃាត ជុំវិញការដាក់ថ្នាំបំពុលសម្លាប់អ្នកជំនួញជនជាតិអង់គ្លេស កាលពីខែវិច្ឆិកាកន្លងទៅ។ តាមរយៈការកាត់ទោសនេះ មេដឹកនាំចិនទំនងជាកំពុងព្យាយាមបិទបញ្ចប់រឿងអាស្រូវជុំវិញលោក Bo Xilai ឲ្យបានមុនការផ្លាស់ប្តូរមេដឹកនាំជាន់ខ្ពស់ ក្នុងសមាជបក្ស នៅខែចុងឆ្នាំនេះ។
លោកស្រី Gu Kailai ដែលត្រូវជាភរិយារបស់លោក Bo Xilai ត្រូវបានតុលាការចោទប្រកាន់ថាបានដាក់ថ្នាំបំពុលសម្លាប់អ្នកជំនួញជនជាតិអង់គ្លេសម្នាក់ ឈ្មោះ Neil Heywood កាលពីខែវិច្ឆិកា ឆ្នាំ២០១១កន្លងទៅ។ អាជ្ញាធរចិនមិនបានបញ្ជាក់ច្បាស់លាស់ អំពីកាលបរិច្ឆេទនៃការកាត់ទោសលោកស្រី Gu Kailai ទេ ក៏ប៉ុន្តែ អ្នកជំនាញ ដែលស្គាល់ពីទំនៀមទម្លាប់តុលាការចិន យល់ថា ការកាត់ទោសនេះនឹងមិនត្រូវការចំណាយពេលយូរទេ។
គួរបញ្ជាក់ថា លោក Neil Heywood បានស្លាប់នៅក្នុងបន្ទប់សណ្ឋាគារមួយ នៅក្នុងខេត្ត Chongqing ដែលពេលនោះ ជាខេត្តស្ថិតក្រោមអំណាចរបស់លោក Bo Xialai មន្រ្តីជាន់ខ្ពស់ និងដ៏មានឥទ្ធិពលម្នាក់ នៃបក្សកុម្មុយនិស្តចិន ដែលពីមុនធ្លាប់ត្រូវបានគេមើលឃើញថាអាចជាអ្នកឡើងស្នងតំណែងពីលោកហ៊ូ ជិនតាវ ក៏ប៉ុន្តែ ត្រូវបក្សដកតំណែង កាលពីខែមេសា ក្រោយពីមន្រ្តីជំនិតរបស់គាត់ម្នាក់ បានរត់ទៅសុំជ្រកកោនក្នុងស្ថានកុងស៊ុលអាមេរិក។ បក្សកុម្មុយនិស្តចិនបានចោទលោក Bo Xilai ថាបាន “ធ្វើខុសនឹងវិន័យរបស់បក្ស” (ជាភាសាដែលបក្សកុម្មុយនិស្តចិនតែងតែប្រើជាទូទៅ សំដៅលើការប្រព្រឹត្តអំពើពុករលួយ)។
រឿងអាស្រូវជុំវិញលោក Bo Xilai បានធ្វើកក្រើករញ្ជួយដល់បក្សកុម្មុយនិស្តចិន នៅក្នុងពេលដែលគេកំពុងរៀបចំផ្លាស់ប្តូរមេដឹកនាំកំពូលៗ ដែលចិនតែងតែធ្វើនៅរៀងរាល់១០ឆ្នាំម្តង។ រឿងអាស្រូវនេះបានធ្វើឲ្យប៉ះពាល់ដល់រូបភាពនៃការរួបរួមគ្នារវាងមេដឹកនាំចិន ដែលចិនតែងតែយកមកធ្វើជាសសរទ្រូងសំខាន់បំផុត នៃរបបដឹកនាំបែបឯកបក្ស។
រឿងអាស្រូវជុំវិញលោក Bo Xilai បានធ្វើឲ្យថ្នាក់ដឹកនាំចិនត្រូវប្រឈមមុខនឹងការមិនសប្បាយចិត្ត ទាំងពីសំណាក់អ្នកគាំទ្រលោក Bo Xilai (ដែលមានចំនួនច្រើន ជាពិសេស អ្នកខេត្ត Chongqing) និងអ្នកដែលមិនគាំទ្រលោក Bo Xialai។
អ្នកគាំទ្រលោក Bo Xilai យល់ថា គាត់ គឺជាជនរងគ្រោះ នៃការប្រជែងដណ្តើមអំណាចនៅក្នុងបក្សកុម្មុយនិស្ត ចំណែកឯរាល់ការចោទប្រកាន់ទាំងប៉ុន្មាន ដែលគេទម្លាក់ទៅលើលោក Bo Xilai និងទៅលើភរិយារបស់គាត់ គឺគ្រាន់តែជាលេស ដើម្បីកម្ចាត់គាត់ចេញពីជួរថ្នាក់ដឹកនាំបក្សកុម្មុយនិស្តចិនប៉ុណ្ណោះ។
ចំណែកអ្នកដែលមិនគាំទ្រលោក Bo Xilai វិញ គេអាចនឹងជឿថា រឿងអាស្រូវរបស់លោក Bo Xilai ប្រហែលជាកើតចេញពីការឈ្លោះដណ្តើមអំណាចគ្នាមែន ក៏ប៉ុន្តែ លោក Bo Xilai និងភរិយាក៏មិនមែនជាមនុស្សគ្មានកំហុសនោះដែរ។ លោក Bo Xilai និងភរិយាពិតជាបានប្រព្រឹត្តអំពើពុករលួយ និងបានយកអំណាចមកបម្រើផលប្រយោជន៍ផ្ទាល់ខ្លួន និងប្រយោជន៍របស់បក្សពួក ក្រុមគ្រួសារពិតមែន ក៏ប៉ុន្តែ ក្នុងចំណោមមេដឹកនាំចិន មិនមែនមានតែលោក Bo Xilai មួយទេ ដែលប្រព្រឹត្តអំពើបែបនេះ។
ដូច្នេះ មេដឹកនាំចិនទំនងជាកំពុងបារម្ភថា រឿងអាស្រូវរបស់លោក Bo Xilai អាចនឹងធ្វើឲ្យប្រជាជនកាន់តែមានការសង្ស័យ ជុំវិញអំពើពុករលួយ ប្រព្រឹត្តិដោយមន្រ្តីអ្នកមានអំណាចកំពូលៗ។
ការប្រកាសចោទប្រកាន់ជាផ្លូវការទៅលើភរិយារបស់លោក Bo Xilai ជុំវិញរឿងសម្លាប់អ្នកជំនួញអង់គ្លេស ទំនងជាសញ្ញាមួយបង្ហាញថា មេដឹកនាំចិនកំពុងតែព្យាយាមបិទបញ្ចប់រឿងអាស្រូវនេះឲ្យបានឆាប់ ដើម្បីស្តារនូវរូបភាពនៃការរួបរួមគ្នាឡើងវិញ ជាពិសេស ឲ្យបានមុនពេលបើកសមាជបក្ស នៅចុងឆ្នាំ ដែលនឹងត្រូវមានការផ្លាស់ប្តូរមេដឹកនាំកំពូលៗ ជាពិសេស គឺអ្នកដែលត្រូវស្នងតំណែងជាប្រធានាធិបតី និងនាយករដ្ឋមន្រ្តី។
ចំណុចដែលគួរឲ្យកត់សម្គាល់មួយទៀត គឺនៅត្រង់ថា ការប្រកាសអំពីការចោទប្រកាន់លើភរិយារបស់លោក Bo Xilai កាលពីម្សិលមិញនេះ គឺធ្វើឡើងតែមួយថ្ងៃប៉ុណ្ណោះ នៅមុនពេលចាប់បើកការប្រកួតកីឡាអូឡាំពិក នៅអង់គ្លេស។ នេះអាចជាយុទ្ធសាស្រ្តរបស់អាជ្ញាធរចិន ដើម្បីបង្ហាញថា រដ្ឋាភិបាលមានតម្លាភាព ក្នុងការដោះស្រាយរឿងអាស្រូវរបស់មន្រ្តីកំពូលដូចជាលោក Bo Xilai ក៏ប៉ុន្តែ ក្នុងពេលជាមួយគ្នា ចង់ឲ្យសាធារណជនទូទៅបំភ្លេចរឿងនេះតែត្រឹមនេះ ដោយនាំគ្នាងាកទៅចាប់អារម្មណ៍នឹងការប្រកួតកីឡាអូឡាំពិក ដែលជាព្រឹត្តិការណ៍ដ៏ពេញនិយមមួយ សម្រាប់ប្រជាជនចិន។ ម្យ៉ាងទៀត អង់គ្លេស ដែលជាប្រទេសកំណើតរបស់លោក Neil Heywood ហើយជាម្ចាស់ផ្ទះរៀបចំការប្រកួតកីឡាអូឡាំពិកនេះ ក៏ប្រាកដជាវីវក់ងប់ងល់នឹងព្រឹត្តិការណ៍នេះខ្លាំងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ