ឡាវ និងចិនចាប់បញ្ជូនជនភៀសខ្លួនទៅកូរ៉េខាងជើង
ក្រុមអ្នកការពារសិទ្ធិមនុស្សកូរ៉េខាងត្បូង នៅថ្ងៃព្រហស្បតិ៍នេះ បានសំដែងការមិនពេញចិត្តដែលអាជ្ញាធរឡាវ និងចិនបានចាប់បង្ខំបញ្ជូនយុវជនកូរ៉េខាងជើង៩នាក់ឲ្យត្រលប់ចូលប្រទេសកំណើតវិញ។ ក្រុមអ្នកការពារសិទ្ធិមនុស្សទាំងនោះ បន្ទោសផងដែរមន្រ្តីស្ថានទូតកូរ៉េខាងត្បូង នៅវៀងចន្ទ ថា បានបណ្តែតបណ្តោយឲ្យអាជ្ញាធរឡាវចាប់បញ្ជូនជនភៀសខ្លួនកូរ៉េខាងជើងទៅឲ្យប្រទេសចិន ដែលជាសម្ព័ន្ធមិត្តរបស់ទីក្រុងព្យុងយ៉ាង។
ចុះផ្សាយនៅថ្ងៃ៖
ស្តាប់ - ០២:០៤
យុវជនភៀសខ្លួនកូរ៉េខាងជើងទាំង៩នាក់មានអាយុ ពី១៥ ទៅដល់២៣ឆ្នាំ។ ពួកគេត្រូវអាជ្ញាធរឡាវចាប់ឃុំខ្លួន អស់៣សប្តាហ៍មកហើយ មុននឹងត្រូវឡាវចាប់បញ្ជូនទៅឲ្យប្រទេសចិន ដែលជាអ្នកចាប់បញ្ជូនបន្តទៅឲ្យរដ្ឋាភិបាលកូរ៉េខាងជើង កាលពីថ្ងៃអង្គារម្សិលម្ង៉ៃ។
អង្គការការពារសិទ្ធិមនុស្សកូរ៉េខាងត្បូង បានរិះគន់អាជ្ញាធរចិន និងឡាវថា មិនបានខ្វល់ អើពើពីបញ្ហាគោរពសិទ្ធិមនុស្ស។ ហើយអ្វីដែលសំខាន់ ជាងនេះទៅទៀត គឺស្ថានទូតកូរ៉េខាងត្បូង នៅទីក្រុងវៀងចន្ទ បានដឹងពីរឿងចាប់ខ្លួនយុវជនកូរ៉េខាងជើងដែរ ប៉ុន្តែ មិនបានអន្តរាគម ជួយជនភៀសខ្លួនទាំងនោះ។ ដូច្នេះ សម្រាប់អ្នកការពារសិទ្ធិមនុស្ស មន្រ្តីស្ថានទូតកូរ៉េខាងត្បូងត្រូវទទួលខុសត្រូវមួយចំណែក ដែរ ក្នុងរឿងចាប់បញ្ជូនជនភៀសខ្លួនកូរ៉េខាងជើង។
ម្យ៉ាងទៀត តាមប្រភពមន្រ្តីស្ថានទូតកូរ៉េខាងត្បូង ដែលសុំមិនបញ្ចេញឈ្មោះ និងដកស្រង់ដោយកាសែត កូរ៉េខាងត្បូង ក្នុងចំណោមជនភៀសខ្លួន ទាំង៩នាក់ មានម្នាក់ ជាកូនប្រុសរបស់ស្រ្តីជប៉ុន ដែលកូរ៉េខាងជើងបានចាប់ជំរិត ទៅក្នុងទសវត្សរ៍ទី ៨០។
សូមបញ្ជាក់ថា ចាប់តាំងពីចប់សង្រ្គាមឧបទ្វីបកូរ៉េ មានប្រជាជនកូរ៉េខាងជើងប្រមាណ ២៥០០០នាក់បានរត់គេចចេញពីរបបកុម្មុយនិស្តព្យុងយ៉ាង ទៅរស់នៅកូរ៉េខាងត្បូង។ រលកជនភៀសខ្លួនពីកូរ៉េខាងជើង មានច្រើនជាង គេ នៅទសវត្សរ៍ឆ្នាំ ៩០ ជារយៈពេលដែលកូរ៉េខាងជើងជួបគ្រោះទុរភិក្សខ្លាំងជាងគេ។ ពួកគេភាគច្រើនបានលួចឆ្លងដែនចូលទៅប្រទេសចិន មុននឹងទៅដល់ប្រទេសទីបី ដូចជាឡាវ ដើម្បីឆ្លងបន្តចូលទៅកូរ៉េខាងត្បូង។ អាជ្ញាធរចិនតែងចាត់ទុក ជនភៀសខ្លួនកូរ៉េខាងជើងថា ជាអ្នករត់គេចពីប្រទេសដោយសារហេតុផលសេដ្ឋកិច្ច ប៉ុន្តែ មិនមែនជាជនភៀសខ្លួនផ្នែកនយោបាយទេ។ ដូច្នេះ ជារឿយៗ ចិនតែងតែចាប់បញ្ជូនជនភៀសខ្លួនកូរ៉េខាងជើង ទៅឲ្យទីក្រុងព្យុងយ៉ាង។
បើតាមអង្គការការពារសិទ្ធិមនុស្ស និងប្រជាជនកូរ៉េខាងជើងដែលធ្លាប់រត់គេចចេញពីប្រទេស ជនភៀសខ្លួនកូរ៉េខាងជើងដែលត្រូវគេបញ្ជូនឲ្យត្រលប់ទៅប្រទេសកំណើតវិញ ត្រូវទទួលរងការដាក់ទណ្ឌកម្មធ្ងន់ធ្ងរពីរបបកុម្មុយនិស្តព្យុងយ៉ាង។ ពួកគេអាចទទួលរងទារុណកម្មសួរចម្លើយ ឬចាប់បញ្ជូនទៅជំរំធ្វើការងារដោយបង្ខំ។
ចាប់តាំងពីឆ្នាំ ២០១២ ចំនួនជនភៀសខ្លួនកូរ៉េខាងជើងបានថយចុះជិតពាក់កណ្តាល បើប្រៀបធៀបនឹងឆ្នាំ ២០១១។ យោងតាមអង្គការAmnesty International ចំនួនប្រជាជនរត់គេចខ្លួនចេញពីកូរ៉េខាងជើងថយចុះច្រើន ដោយសារតែការដាក់គំនាប ពីអាជ្ញាធរមានកាន់តែច្រើន ហើយ លើសពីនោះ សកម្មភាពការពារព្រំដែនកូរ៉េខាងជើង ជាមួយចិនត្រូវបានរឹតបន្តឹងខ្លាំងជាងមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ