ចិនកំពុងយកលុយកខ្វក់មកចាក់លាងនៅបារាំងឬ ?
ចុះផ្សាយនៅថ្ងៃ៖
ស្តាប់ - ០៤:០៨
នៅថ្ងៃពុធនេះស្ថាប័នសវនកម្មចិន បានបរិហារអំពីការប្រើប្រាស់ប្រាក់សាធារណៈចិន ជាប្រយោជន៍ឯកជន ពីសំណាក់សមាជិករដ្ឋាភិបាលតំបន់ និងក្រុមហ៊ុនរដ្ឋ។ កញ្ចប់ថវិការដ្ឋ ដែលមានទិសដៅសម្រាប់ទិញបច្ចេកវិទ្យាបរទេស បែរជាត្រូវប្រើដើម្បីទិញ ចម្ការទំពាំងបាយជូ ផលិតស្រាក្រហមនៅប្រទេសបារាំងទៅវិញ។ តើនេះមានន័យថា បារាំងដែលល្បីខាងមានវិធានការតឹងតែងផ្នែកតម្លាភាពលុយកាក់ និងប្រយ័ត្នប្រយែងខ្លាំងប្រឆាំងនឹងលុយបរទេស កំពុងប្រឈមនឹងគ្រោះទទួលលុយកខ្វក់ពីចិនឬ?
តាំងពីឆ្នាំ២០០៨មក ចម្ការទំពាំងបាយជូរ វិមានប្រាសាទដ៏ប្រណិតៗនិងល្បីៗ ខាងផលិតស្រាក្រហមរបស់បារាំង បានទាក់ទាញអ្នកវិនិយោគចិនយ៉ាងខ្លាំង។ ជាបន្តបន្ទាប់ម្ចាស់កសិដ្ឋាន បានលក់ទីតាំងចម្ការទំពាំងបាយជូរ ដែលខ្លះមានទំហំរាប់សិបហិចតារ និងកម្មសិទ្ធិផលិតស្រាទៅឱ្យ បរទេស ជាមហាសេដ្ឋី ជាអ្នកមានកប់ពពក និងភាគច្រើនជាជនជាតិចិន រហូតដល់បណ្តាជនទូទៅព្រួយបារម្ភ ថាស្រាក្រហមដ៏ល្បីល្បាញរបស់បារាំង បន្តិចទៀតក្លាយជាស្រាក្រហមចិនហើយ។
តម្លៃត្រឹមតែពីពីរលានទៅ ម្ភៃលានអឺរ៉ូ អចលនទ្រព្យប្រភេទនេះមិនថ្លៃឡើយសម្រាប់ក្រែភ្នែកចិន ពីព្រោះ ម្ចាស់ក្រុមហ៊ុន ម្ចាស់កសិដ្ឋាន ចិនទាំងនោះ អាចបញ្ចូលខ្លួនទៅក្នុងទីផ្សារសុរាប្រណិតចិន ជាន់ខ្ពស់ (ផ្សារថ្លៃ) បានយ៉ាងងាយនិងទាញយកចំណេញពី ផលិតផលស្រាក្រហម បានយ៉ាងកប់ពពក។ ព្រោះសូមបញ្ជាក់ថា ដោយមិននិយាយអំពី ស្រាថ្លៃ ស្រាល្បីប័រដូរបស់បារាំង សូម្បីតែស្រាក្រហម ដ៏សាមញ្ញ ដូចយ៉ាងប្រភេទស្រាក្រហមប័រដូ គ្មានឈ្មោះវិមាន គ្មានឈ្មោះប្រាសាទសោះ ដែលលក់ក្នុងតម្លៃបីអឺរ៉ូ មួយដប យ៉ាងពិបាកនៅ ស្រុកបារាំងនោះ តម្លៃអាចនឹងឡើងដល់ពី ១៥ទៅ ១០០អឺរ៉ូក្នុងមួយដបនៅស្រុកចិន។
ដីកសិដ្ឋាន ចម្ការទំពាំងបាយជូរដាច់កន្ទុយភ្នែក បូកនឹងឈ្មោះសហគ្រាសផលិតស្រា លំដាប់ធម្មតា មធ្យម លំដាប់កម្រល្អប្រណិតរបស់បារាំង នៅតំបន់ប័រដូ ឬតំបន់ល្បីៗផ្សេងទៀត ច្រើនឡើងៗមានម្ចាស់ជាជនជាតិចិន។ ចិនដែលបាននាំលុយទាំងលានៗមកចាក់ក្នុងវិស័យពាណិជ្ជកម្មដែលមានបង្កប់វប្បធម៌ដ៏យូរលង់របស់បារាំង ដើម្បីបានឈ្មោះ បានសំឡេង។
ប៉ុន្តែសួរថាតើអ្នកវិនិយោគទាំងនោះបានលុយមកពីណា ? ចុះ តើភាគី បារាំងដែលល្បីខាងមានតម្លាភាពថវិកា និងការរកស៊ី ការពារប្រយុទ្ធប្រឆាំងនឹងការរត់ពន្ធ នឹងការចាយលុយកខ្វក់ មានបានចោទសួរអំពីប្រភពលុយដែលក្រុមអ្នកមានចិនទាំងនោះនាំមកចូលបារាំងទេ ? ឬមួយក៏លុយច្រើនពេកបាំងភ្នែកមើលអ្វីលែងឃើញទៅហើយ ?!
បារាំងក៏បានគិតគូរដល់អំពី បញ្ហានេះដែរ។ កាលពីឆ្នាំទៅ ភ្នាក់ងារបារាំងប្រយុទ្ធប្រឆាំងនឹងការលាងលុយ បានចេញរបាយការណ៍មួយព្រមានប្រាប់អំពីគ្រោះថ្នាក់ដែលម្ចាស់កសិដ្ឋានបារាំងអាចជួយប្រទះនៅពេលលក់កម្មសិទ្ធិដីធ្លី និងសិទ្ធធ្វើស្រាទៅឱ្យអ្នកវិនិយោគបរទេស ដូចយ៉ាងរុស្ស៊ី និងចិន ពីព្រោះប្រាក់មូលធនដើម ច្រើនតែមានប្រភពមិនច្បាស់លាស់ និងជួលកាលរៀបចំតាក់តែងបន្តុំឡើងតាមច្បាប់ដ៏ស្មុគស្មាញ សម្រាប់តែបំភ័ន្តភ្នែកអាជ្ញាធរ។
ឥលូវពាក្យព្រមានបានក្លាយជាការពិត ! នេះបើយោងតាមរបាយការណ៍ប្រចាំឆ្នាំ របស់ស្ថាប័នអគ្គសវនកម្មចិនចេញផ្សាយជាសាធារណៈនៅថ្ងៃពុធទី ២៥មិថុនានេះ ដែលបានបរិហារ មន្ត្រីរដ្ឋាភិបាលនិងក្រុមហ៊ុនរដ្ឋ ថាបានបន្លំ ថវិការដ្ឋ ទៅទិញក្រុមហ៊ុនរកស៊ីឯកជន ឬយកចំណេញដើរលេងកំសាន្តនៅបារាំង នៅអឺរ៉ុប និងនៅសហរដ្ឋអាមេរិក ក្រោមរូបភាពបេសកកម្មផ្សេងៗ។
នៅក្នុងចំណោម៣១៤ករណីជាប់សង្ស័យ ពីបទរំលោភច្បាប់និងវិន័យ (ពោលគឺពុករលួយ លួចលុយរដ្ឋ) ដែលត្រូវធ្វើអង្កេតស៊ីជម្រៅ មានក្រុមហ៊ុនរដ្ឋពីរ ជាប់សង្ស័យថាបានយកលុយរដ្ឋសម្រាប់ទិញបច្ចេកវិទ្យាបរទេស ទៅទិញ ដីចម្ការទំពាំងបាយជូរផលិតស្រាបារាំងចំនួន ១៤កន្លែងកម្មសិទ្ធិឯកជន។ អគ្គសវនកម្មចិន បានដៅអត្តសញ្ញាណចំសហគ្រាសចិនមួយ ឈ្មោះ Haichang ដែលមានជំនួញវិនិយោគរកស៊ីផ្នែកដឹកជញ្ជូនផ្លូវទឹក អចលនទ្រព្យ បន្ទាប់មកផ្នែកថាមពលប្រេង បានក្លាយជាម្ចាស់កម្មសិទ្ធិចម្ការទំពាំងបាយជូរ វិមាននិងស្រា ដ៏ល្បីល្បាញរបស់បារាំងនៅប័រដូ គឺDomaine Chenu -Lafitte។
ភ្នាក់ងាររដ្ឋទទួលបន្ទុកផ្នែកមហាសមុទ្ទ បានរៀបចំដំណើរទស្សនកិច្ច ក្នុងទិសដៅសាងសង់ស្ថានីយ៍ចិនមួយតំបន់អង់តាទិច តែបែរយកចំណាយដើរកំសាន្តរីករាយនៅប្រទេសបារាំង ឬនៅឈីលី ទៅវិញ ! មិនមែនតែនៅប្រទេសបារាំងមួយទេ ដែលមានករណីបែបនេះ។ បើតាមរបាយការណ៍របស់អគ្គសវនកម្មចិន ដដែលមន្ត្រីចិនខ្លះទៀត បានចំណេញស្វែងរកបេសកកម្មសិក្សាស្រាវជ្រាវរកប្រភពថាមពលនៅកាដាណា តែតាមពិតយកលុយរដ្ឋទៅចាយដើរលេងនៅឡាវេហ្កាសសហរដ្ឋអាមេរិក ចូលកាស៊ីណូ ឬទិញរបស់ប្រណិតៗ។ល។ និង។ល។
ក្រុមហ៊ុនរដ្ឋចិនកំពុងតែច្របូលច្របល់ខ្លាំងរវាងអ្វីដែលកម្មសិទ្ធិរដ្ឋ និងអ្វីជាប្រយោជន៍បុគ្គល។ យកថវិការដ្ឋទិញចាយដល់ពេលប្រមូលផលជាការចំណេញផ្ទាល់ខ្លួន។ នេះហើយជាប្រយោជន៍នៃការរកស៊ីនៅជាមួយបរទេស ឬមួយក៏ជារបៀបចាក់លុយពុករលួយលាងហើយលាងឱ្យស្អាតជារបស់បុគ្គល ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ