ទឹកដោះគោបារាំង “Made in France” ចំណុចដៅថ្មីរបស់ចិន
ចុះផ្សាយនៅថ្ងៃ៖
ស្តាប់ - ០៤:០៣
បន្ទាប់ពីស្រា និងវាំងចំការទំពាំងបាយជូ ពេលនេះដល់វេនឧស្សាហកម្មចំណីអាហារបារាំងម្តងដែលចិនកំពុងចង់ក្រសោបយក។ កាលពីខែឧសភា ក្រុមហ៊ុនផលិតសាច់ឆ្អិនដ៏ល្បីៗចំនួនពីរ Cochenou និង Justin Bridou ដែលគ្រប់គ្នាយល់ថាជារបស់បារាំង១០០%នោះ បានក្លាយជារបស់ចិនហើយ។ មិនយូរមិនឆាប់ ផលិតផលទឹកដោះគោរបស់បារាំង “Made in France” ក៏នឹងអាចក្លាយទៅជា “ចិន” ដែរ។
ប្រសិនបើផលិតផល កាបូប ស្បែកជើង សម្លៀកបំពាក់ និងវត្ថុប្រើប្រាស់ផ្សេងៗ ជាច្រើនសន្ធឹកសន្ធាប់ របស់ក្រុមហ៊ុនអឺរ៉ុប បារាំង ល្បីខ្លាំង ល្បីល្មម ត្រូវបានលើកយកទៅផលិតនៅក្នុងស្រុកចិន និងមានវាយត្រា Made in China កំពុងរីកសុសសាយពេញពិភពលោក កាន់តែច្រើនឡើងៗ ដែលអាចចាត់ទុកថាជាមោទនភាពចិន និងជាការចូលរួមចំណែកឱ្យសេដ្ឋកិច្ចដើរទៅលឿនស្លេវ ក្នុងផ្នែកចំណីអាហារវិញ ចិនស្វែងរកការនាំចូលពីបរទេស ឬម៉ាកមកពីបរទេស។
ហេតុអ្វី ?!
បន្ទាប់ពីស្រាទំពាំងបាយជូរដ៏ល្បីល្បាញ ពេលនេះចិនចាប់អារម្មណ៍យ៉ាងខ្លាំងនឹងទឹកដោះគោបារាំង។ គ្មានអ្វីគួរភ្ញាក់ផ្អើលទេក្នុងរឿងនេះ ពីព្រោះថាតម្លៃទឹកដោះគោនាំចូលពីបរទេសដាក់លក់ក្នុងទីផ្សារប៉េកាំង មានតម្លៃខ្ពស់កប់ពពក មិនថាជាទឹកដោះគោនាំចូលពីបារាំង ឬពីប្រទេសផ្សេងនៅអឺរ៉ុប អាមេរិក ឬនូវែលហ្សេឡង់ឡើយ។ ម្យ៉ាងវិញទៀត ចិនធ្លាប់បានជួបរឿងអាស្រូវ កក្រើកពិភពលោកម្តងជាពីរដងទាក់ទងនឹងសុវត្ថិភាពចំណីអាហារ និងទឹកដោះគោ។ សុវត្ថិភាពចំណីអាហារដែលបណ្តាជនចិនជាទូទៅ បានបាត់ទំនុកចិត្ត តាំងពីឆ្នាំ២០០៨ ឆ្នាំដែលមានផ្ទុះរឿងអាស្រូវទឹកដោះគោកូនក្មេងពុល មានសារធាតុមេឡានីន។ កាលណោះទឹកដោះគោនោះ បានបង្កឱ្យទារកជាង៣០០០០០ រងគ្រោះ ក្នុងនោះ៦នាក់ស្លាប់។ រឿងអាស្រូវនេះ បន្តដក់ជាប់ក្នុងអារម្មណ៍បណ្តាជនចិន អ្នកមានលទ្ធភាពងាកទៅទិញទឹកដោះនាំចូលពីបរទេស លែងទុកចិត្តផលិតផលក្នុងស្រុក។
ចិនចង់ផលិតទឹកដោះគោដោយខ្លួនឯងនៅបរទេស
ពីមុនមកគេនាំគ្នានិយាយថាចិនមិនចូលចិត្តទឹកដោះគោទេ ព្រោះបណ្តាជនចិនមានអាឡែហ្ស៊ីនឹងជាតិឡាក់តូស ក៏ប៉ុន្តែពេលនេះពិភពលោកប្តូរផ្លាស់ ចិនក៏វិវឌ្ឍ តម្រូវការផ្នែកទឹកដោះគោកាន់តែកើនឡើងជាលំដាប់ ! សន្ទុះនៃការនាំចូលមានល្បឿនដូចទឹកបាក់ទំនប់ ព្រោះចិនគ្មានលទ្ធភាពផលិតទឹកដោះគោសម្រាប់ឆ្លើយតបទៅនឹងសេចក្តីត្រូវការក្នុងស្រុកបានទេ។ ដូច្នេះដើម្បីធានាសុវត្ថិភាពក្នុងការផ្គត់ផ្គង់ទឹកដោះគោ ចិនត្រូវតែស្វែងរកការនាំចូល និងពិសេសគឺការផលិតដោយខ្លួនឯងនៅបរទេស ដូចអ្វីដែលចិនធ្លាប់ចង់ធ្វើក្នុងវិស័យផលិតស្រាទំពាំងបាយជូ។
ការនាំចូលម្សៅទឹកដោះ ក៏ដូចជាទឹកដោះគោប្រអប់ ឬដប បានស្ទុះឡើង យ៉ាងខ្លាំង ៖ ២២០០តោនលក់ដាច់អស់កាលពីឆ្នាំ២០១១ ទល់នឹងជាង៧២០០តោន នៅឆ្នាំ២០១២។ ចិនកាន់តែមាន កាន់តែចង់ភ្លក្សរសជាតិប្លែកៗមកពីគ្រប់ជ្រុងនៃផែនដី។ កាលពីថ្មីៗនេះ ចិនបានទិញក្រុមហ៊ុនផលិតសាច់ក្រកដ៏ល្បីល្បាញរបស់អាមេរិកនិងអឺរ៉ុប។ ប៉ុន្តែចំពោះទឹកដោះគោវិញ ក្រៅពីផលប្រយោជន៍ហិរញ្ញវត្ថុ អ្នកជំនួញចិនក្នុងវិស័យនេះ ចង់បានបង្កើនចំណេះដឹងដោយរៀនពីបរទេសផង និងកែលម្អរូបភាពសុវត្ថិភាពចំណីអាហារចិនផង។ ចិនសង្ឃឹមលើ ការបញ្ចប់កូតតានាំចេញផលិតផលទឹកដោះគោ នៅឆ្នាំ២០១៥ ដើម្បីពង្រីកឥទ្ធិពលរបស់ខ្លួន។ ហេតុដូច្នេះហើយបានជា សហករបារាំងបានសម្តែងការមិនទុកចិត្តយ៉ាងខ្លាំងចំពោះចិន ដោយក្រែងចិនបកមកវាយប្រហារទីផ្សារ និងទម្លាក់ថ្លៃទឹកដោះគោឱ្យកាន់តែទាប។
អ្នកវិនិយោគស្ងាត់ៗក្នុងវិស័យទឹកដោះគោ
តាមការពិតក្រុមហ៊ុនទឹកដោះគោចិន ដែលមានឯកទេសទឹកគោទារក បានចំណាយប្រាក់វិនិយោគជាង២០លានអឺរ៉ូ ដើម្បីសហករបារាំងមួយនៅNormandie ឱ្យសាងសង់រោងចក្រ។ ការចូលមកវិនិយោគនេះមានលក្ខណៈស្ងាត់ៗបំផុត ស្ងាត់ជាងការវិនិយោគស្រាទៅទៀត ពីព្រោះដំបូងឡើយចិនមិនចង់ឱ្យដៃគូក្នុងស្រុក(បារាំង)ភ័យខ្លាចខូចរូបភាព ព្រោះត្រូវធ្វើការជាមួយនឹងក្រុមហ៊ុនចិន។ ករណីរឿងអាស្រូវទឹកដោះគោផលិតនៅនូវែលហ្សេឡង់ កាលពីពេលថ្មីៗកន្លងទៅនេះ ជាឧទាហរណ៍ស្រាប់។
គ្មានយន្តការត្រួតពិនិត្យសុវត្ថិភាពចំណីអាហារហ្មត់ចត់ លក់ទឹកដោះគោ ដោយវាយម៉ាកចិន អាចជាគ្រោះថ្នាក់មួយសម្រាប់គុណភាពទឹកគោបារាំងដែលពិភពលោកទទួលស្គាល់ ប្រសិនបើមានរឿងអាស្រូវផ្ទុះឡើង។ ចំណុចចុងក្រោយគឺដើម្បីកុំឱ្យអតិថិជនចិន បាត់ទំនុកចិត្ត ព្រោះជាធម្មតាចិនទុកចិត្តតែផលិតផល ផលិតនៅបរទេសតែប៉ុណ្ណោះ។
ប៉ុន្តែបើតាមអ្នកវិភាគ ប្រតិបត្តិការទៅផលិតនៅបរទេសដើម្បីបានម៉ាក មិនប្រាកដថាបានដំណើរការបានល្អទេ ព្រោះបណ្តាជនកាន់តែច្រើនឡើងៗចាប់ដឹងពីល្បិចនេះ ហើយស្វែងរកតែផលិតផល១០០%បរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ