រដ្ឋាភិបាលក្រុងប៉េកំាងប្តេជ្ញាកាត់បន្ថយផ្សែងពុលនៅក្នុងបរិយាកាស
នៅប្រទេសចិន រដ្ឋាភិបាលទើបបានប្រកាសចេញនូវវិធានការមួយចំនួនដើម្បីកាត់បន្ថយអត្រាផ្សែងពុលនៅក្នុងបរិយាកាស។ វិធានការថ្មីរបស់រដ្ឋាភិបាលពេលនេះ ពិតជាចម្លើយឆ្លើយតបចំពោះក្តីបារម្ភរបស់ប្រទេស និងប្រជាជន។ ប៉ុន្តែក្រុមអ្នកឯកទេសបានយល់ឃើញថា យុទ្ធនាការនេះនឹងមានការពិបាក ព្រមទំាងត្រូវការពេលវេលាយូរអង្វែងទៀតផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
នៅក្នុងចំណោមវិធានការដែលបានចេញផ្សាយជាសាធារណៈកាលពីថ្ងៃសុក្រ ទី១៤ មិថុនាកន្លងទៅ រដ្ឋាភិបាលក្រុងប៉េកំាងអាចនឹងទម្លាក់ការទទួលខុសត្រូវស្តីពីគុណភាពខ្យល់ក្នុងបរិយាកាសទៅលើអ្នកដឹកនំាថ្នាក់ក្រោមរបស់ខ្លួន ពោលគឺថ្នាក់ដឹកនំានៅតាមខេត្ត ស្រុក និងភូមិដែលសម្បូរទៅដោយរោងចក្រ សហគ្រាសធំៗ។ មហិច្ឆតារបស់រដ្ឋាភិបាល គឺកាត់បន្ថយការចាក់ចោលឧស្ម័នពុលទៅក្នុងបរិយាកាសនៅតាមតំបន់ឧស្សាហកម្មសំខាន់ៗឲ្យបាន ៣០% ក្នុងរយៈពេល ៥ឆ្នំា។
« វិធានការដែលទើបអនុម័តដោយក្រុមប្រឹក្សាទទួលបន្ទុកកិច្ចការរដ្ឋរបស់រដ្ឋាភិបាលចិន គឺជាការបោះមួយជំហានទៅមុខគួរឲ្យកត់សម្គាល់នៅក្នុងយុទ្ធនាការប្រយុទ្ធប្រឆំាងនឹងផ្សែងពុលនៅក្នុងបរិយាកាស » នេះជាការបញ្ជាក់នៅក្នុងរបាយការណ៍មួយរបស់ Deutsche Bank។ របាយការណ៍របស់ Deutsche Bank ដដែលបានកត់សម្គាល់ឃើញថា កិច្ចខិតខំប្រឹងប្រែងរបស់រដ្ឋាភិបាលចិននឹងអាចមានរយៈពេលយ៉ាងតិច ១៨ឆ្នំា មុននឹងធ្វើឲ្យកម្រិតផ្សែងពុលនៅក្នុងបរិយាកាសត្រឡប់មករកកម្រិតធម្មតាឡើងវិញ។
បច្ចុប្បន្ននេះ នៅក្នុងទីក្រុងប៉េកំាង ក៏ដូចជានៅទីក្រុងធំៗជាច្រើនក្នុងទូទំាងប្រទេសចិន អត្រានៃអង្គធាតុតូចល្អិតឆ្មាកំពុងមានកម្រិតក្រាស់ឃ្មឹកនៅក្នុងបរិយាកាស ពោលគឺមានកម្រិត ៤០ដង លើសពីកម្រិតស្តង់ដារ។ អ្វីដែលជាក្តីបារម្ភខ្លំាងជាងគេនោះ គឺវិជ្ជមាត្រក្រាស់ឃ្មឹករបស់អង្គធាតុតូចល្អិតឆ្មាដែលអាចចូលទៅបំផ្លាញសួតរបស់មនុស្សយើងនៅពេលដកដង្ហើមចូល។
គួរជម្រាបជូនថា ក្នុងនាមជាប្រទេសមហាអំណាចសេដ្ឋកិច្ចទី២ និងជាទីផ្សាររថយន្តទីមួយក្នុងលោក ចិនបាននិងកំពុងសម្លឹងឃើញបរិស្ថានរបស់ខ្លួនទទួលការគំរាមកំហែងយ៉ាងខ្លំាង ពោលគឺគំរាមកំហែងដោយការចាក់ចោលឧស្ម័នពុលទៅក្នុងបរិយាកាសរបស់រោងចក្រ សហគ្រាស។ ក្នុងឆ្នំា ២០១០ ឧស្ម័នពុលក្នុងបរិយាកាសបានបណ្តាលឲ្យមានប្រជាពលរដ្ឋចិនស្លាប់មុនអាយុ ប្រមាណជា ១លាន ២សែននាក់ នេះបើយោងតាមរបាយការណ៍របស់វិទ្យាស្ថានអាមេរិកំាងមួយឈ្មោះ Health Effect៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ