ចិនសម្រេចដកគ្រឿងចក្របូមប្រេងពីបាតសមុទ្រ ក្បែរកោះជម្លោះជាមួយវៀតណាម
ចិននឹងដកគ្រឿងចក្រខួងបូមប្រេងចេញពីបាតសមុទ្រ ក្បែរដែនទឹកជម្លោះជាមួយវៀតណាម នៅសមុទ្រចិនខាងត្បូង។ នេះបើយោងតាមសារព័ត៌មានរដ្ឋចិន ចុះផ្សាយនៅថ្ងៃពុធនេះ។ យោងតាមសារព័ត៌មានចិន ចិននឹងដកគ្រឿងចក្របូមប្រេងទាំងនេះ យកទៅដាក់នៅជិតឆ្នេរសមុទ្រចិនវិញ។ គួររំលឹកថា ដោយសារតែការបោះទីតាំងគ្រឿងចក្របូមប្រេងនៅបាតសមុទ្រ ក្បែរប្រជុំកោះជម្លោះជាមួយវៀតណាម ទំនាក់ទំនងរវាងវៀតណាមនិងចិនបានឈានទៅដល់ភាពតានតឹងដល់កំពូល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៧
យោងតាមការចុះផ្សាយរបស់សារព័ត៌មានរដ្ឋចិន ចិននឹងដកគ្រឿងចក្រខួងបូមប្រេងចេញពីបាតសមុទ្រ ក្បែរកោះជម្លោះជាមួយវៀតណាម នៅសមុទ្រចិនខាងត្បូង។ គ្រឿងចក្រទាំងនេះ នឹងត្រូវបញ្ជូនទៅដាក់នៅជិតឆ្នេរសមុទ្រចិនវិញ។
គួររំលឹកថា ចិនបានបោះគ្រឿងចក្រនេះ នៅបាតសមុទ្រ កាលពីដើមខែឧសភា ដើម្បីជីកយកវត្ថុធាតុ ក្នុងបាតសមុទ្រ យកមកសិក្សាមើលថា តើនៅសមុទ្រនោះ មានធនធានធម្មជាតិដូចជាប្រេង រឺក៏ឧស្ម័នដែររឺក៏យ៉ាងណា។ ក្រុមហ៊ុនប្រេងជាតិចិន នឹងសិក្សាពីវត្ថុធាតុដែលបានបូមយកពីបាតសមុទ្រមក។ បន្ទាប់មកទៀត ចិននឹងសម្រេចថា តើត្រូវធ្វើប្រតិបត្តិការអ្វីបន្តទៀត។
គួរបញ្ជាក់ដែរថា ដោយសារតែចិនបានបោះគ្រឿងចក្រ កាលពីដើមខែឧសភា នៅក្បែរប្រជុំកោះប៉ារ៉ាសែល ជាកោះជាប់ជម្លោះបូរណភាពជាមួយវៀតណាម សកម្មជនជាតិនិយមវៀតណាមបានធ្វើបាតុកម្មខ្លាំងក្លា វាយប្រហាររោងចក្រចិនក្នុងទឹកដីវៀតណាម។ បាតុកម្មហិង្សាបានសម្លាប់មនុស្សច្រើននាក់ ក្នុងនោះក៏មានជនជាតិចិនផងដែរ។
ទំនាក់ទំនងរវាងចិននិងវៀតណាមក៏កាន់តែធ្លាក់ដុនដាប ធ្វើអោយវៀតណាមគំរាមប្តឹងចិនទៅតុលាការអន្តរជាតិទៀតផង។ នៅក្រុងហាណូយ នាយករដ្ឋមន្ត្រីវៀតណាម ង្វៀន តាន់ជុង និងរដ្ឋមន្ត្រីការបរទេសវៀតណាម បានទទាក់ទទួលលោក យ៉ាំង ជឺឈី ជាអ្នកទទួលខុសត្រូវនយោបាយចិនជាន់ខ្ពស់ ដើម្បីរកដំណោះស្រាយដល់បញ្ហាបង្កឡើងដោយសកម្មភាពខួងប្រេងចិន។ ប៉ុន្តែ ទាំងចិន ទាំងវៀតណាមចចេសរៀងៗខ្លួន ធ្វើអោយជំនួបនេះត្រូវបរាជ័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ