សន្និសីទស្តីពីការប្រែប្រួលអាកាសធាតុបិទបញ្ចប់ ជាមួយលទ្ធផលស្តួចស្តើង
សន្និសីទស្តីពីការប្រែប្រួលអាកាសធាតុ បានបិទបញ្ចប់ហើយ កាលពីល្ងាចថ្ងៃសៅរ៍ទី ៨ធ្នូ។ ដូចជាការគិតទុកមុន សន្និសីទនេះមិនបានសម្រេចបាននូវការព្រមព្រៀងធំដុំណាមួយ។ ជាមួយការពន្យារពេលមួយថ្ងៃបន្ថែមទៀត គណៈប្រតិភូមកពី១៩៣ប្រទេស បានត្រឹមចេញកិច្ចព្រមព្រៀងមួយ នៅនាទីចុងក្រោយ ស្តីពីការអនុវត្តបន្តពិធីសារក្រុងក្យូតូ ទម្រាំដល់មានកិច្ចព្រមព្រៀងថ្មី នៅឆ្នាំ២០២០។ អ្នកការពារបរិស្ថានបានសំដែងការខកចិត្ត និងរិះគន់ប្រទេសមហាឧស្សាហកម្មដែលគ្មានឆន្ទះចង់ចូលរួមក្នុងការកាត់បន្ថយការឡើងកំដៅនៃភពផែនដី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៩
សន្និសីទស្តីពីការប្រែប្រួលអាកាសធាតុ បានបើកតាំងពីថ្ងៃទី ២៧វិច្ឆិកា និងបានបិទបញ្ចប់នៅថ្ងៃម្សិលមិញ។ បើនិយាយពីពេលវេលាប្រជុំ១២ថ្ងៃ គេសង្ឃឹមថា នឹងមានលទ្ធផលធំដុំណាមួយដើម្បីឆ្លើយតបនឹងការព្រួយបារម្ភរបស់អ្នកជំនាញ និងបណ្តាប្រទេសក្រីក្រដែលរងគ្រោះដោយការឡើងកំដៅនៃភពផែនដី។ នៅក្នុងសន្និសីទ របាយការណ៍ជាច្រើនត្រូវបានបោះពុម្ពផ្សាយ ដើម្បីដាស់ ទាញស្មារតីរបស់ប្រទេសអ្នកមាន ដែលឧស្សាហកម្មរបស់ពួកគេបានផលិតចេញកាន់តែច្រើននូវឧស្ម័នផ្ទះកញ្ចក់។ បើគ្មានចំណាត់ការជាក់ស្តែង ស្តីពីការកាត់បន្ថយឧស្ម័នផ្ទះកញ្ចក់ ដែលចេះតែកើនឡើងនោះ នោះ សីតុណ្ហភាពជាមធ្យមរបស់ភពផែនដី នឹងកើនឡើង ពី៣ ទៅ ៥អង្សារ។
អ្នកវិទ្យាសាស្រ្តធ្លាប់បានទាញសញ្ញាអាសន្នអំពីស្ថានភាពបន្ទាន់ នៃការប្រែប្រួលអាកាសធាតុ ដែលបណ្តាលមកពីការឡើងកំដៅខ្ពស់នៃផែនដី ដែលអាចជះផលវិបាកលើជីវិតមនុស្សទូទៅ។ បើទោះជាមានសញ្ញាអាសន្នពីអ្នកវិទ្យាសាស្រ្ត ការទាមទាររបស់ប្រទេសរងគ្រោះដោយគ្រោះធម្មជាតិ ដូចជាហ្វីលីពីន ឬ ក៏គ្រោះមហន្តរាយជាក់ស្តែងស្តីពីខ្យល់ព្យុះSandy នៅអាមេរិក និងគ្រោះរលកយក្សស៊ូណាមី នៅជប៉ុន ប្រទេសអ្នកមាន ឬប្រទេសទើបរីកលូតលាស់ថ្មី នៅមិនខ្ចីអើពើ។
សម្រាប់អ្នកជំនាញតាមដានអាកាសធាតុ សន្និសីទដែលបិទបញ្ចប់ នៅថ្ងៃម្សិលមិញ មានលក្ខណៈនិមិត្តរូប គឺមានតែលើក្រដាស និងគ្មានប្រសិទ្ធភាព ដើម្បីកាត់បន្ថយ ជាក់ស្តែងឧស្ម័នផ្ទះកញ្ចក់ទេ។ នៅក្នុងសន្និសីទ គេបានអនុម័តឲ្យ បន្ត អនុវត្តពិធីសារក្រុងក្យូតូ ដែលជាកិច្ចព្រមព្រៀងអន្តរជាតិតែមួយគត់ តម្រូវឲ្យប្រទេសអ្នកមានកាត់បន្ថយឧស្ម័នផ្ទះកញ្ចក់។ ប៉ុន្តែ អ្វីដែលជាបញ្ហា គឺមានតែបណ្តាប្រទេសអឺរ៉ុប និងប្រទេសជាង១០ផ្សេងទៀត ដូចជាអូស្ត្រាលី ជាដើម ត្រូវជាប់កាតព្វកិច្ច ក្នុងពេលដែលប្រទេសទាំងនេះ បញ្ចេញ ឧស្ម័នផ្ទះកញ្ចក់ ប្រមាណតែ១៥ភាគរយប៉ុណ្ណោះក្នុងពិភពលោក។ អាមេរិក ដែលប្រទេសផលិតឧស្ម័នផ្ទះកញ្ចក់ទីពីរក្នុងពិភពលោកមិនបានផ្តល់សច្ចាប័នលើពិធីសារក្រុងក្យូតូ ចំណែក ចិន ឥណ្ឌា ឬរុស្ស៊ីដែលជាប្រទេសទើបរីកលូតលាស់ថ្មី ក៏មិនបានចុះហត្ថលេខា ដើម្បីជាប់កាតព្វកិច្ចរបស់ពិធីសារក្រុងក្យូតូដែរ។
នៅក្នុងសន្និសីទលើកនេះ ប្រទេសខាងត្បូង ជាប់ជំពាក់ច្រើននឹង ពិធីសារក្រុងក្យូតូ។ ក្រៅតែពីការសន្យាកាត់បន្ថយឧស្ម័ន ប្រទេសប្រទេសក្រីក្រ ដែលរងប៉ះពាល់ខ្លាំងដោយសារការប្រែប្រួលអាកាសធាតុនៅសង្ឃឹមរង់ចាំថា ប្រទេសអ្នកមាននឹងផ្តល់ថវិកាប្រមាណ ៦០ពាន់លានដុល្លារ ពីពេលនេះ ដល់ឆ្នាំ ២០១៥។ ប៉ុន្តែ សហភាពអឺរ៉ុប និងអាមេរិកបានបដិសេធ។
គ្មានលទ្ធផលធំដុំ ចេញពីសន្និសីទលើកនេះ ប្រទេសសមាជិកអង្គការសហប្រជាជាតិបានសន្យាជាថ្មីទៀតនឹងធ្វើឲ្យចេញកិច្ចព្រមព្រៀងថ្មីមួយ នៅឆ្នាំ ២០១៥ ដែលគេរៀបចំកាលពីឆ្នាំមុន។ គេសង្ឃឹមនឹងអាចចាប់អនុវត្តកិច្ចព្រមព្រៀងថ្មីស្តីពីការកាត់បន្ថយឧស្ម័នផ្ទះកញ្ចក់ចាប់ពីឆ្នាំ ២០២០។ ប៉ុន្តែ ការសន្យា ដែលអាចនឹងផ្តល់លទ្ធផលជាអវិជ្ជមាន ដរាបណាប្រទេសមហាឧស្សាហកម្មដែលផលិតឧស្ម័នផ្ទះកញ្ចក់ មិនព្រម ចេញមុខ ទទួលខុសត្រូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ