ញត្តិប្តឹងរដ្ឋាភិបាលបារាំង មិនដោះស្រាយរឿងបរិស្ថាន មានអ្នកចូលរួម១លាន៥សែននាក់
គិតត្រឹមព្រឹកថ្ងៃអាទិត្យ ទី២៣ធ្នូនេះ ញតិ្តទាមទារឲ្យប្តឹងរដ្ឋាភិបាលបារាំង បានទទួលបានការចុះហត្ថលេខាគាំទ្រ ដល់ទៅ ១លាន ៥សែននាក់។ ញត្តិប្តឹងនេះគឺស្តីពីការយឺតយ៉ាវ ចំពោះកិច្ចការពារបរិស្ថានធម្មជាតិ។ ចំនួនអ្នកចូលរួមក្នុងញត្តិដ៏ច្រើនដូច្នេះ គឺពុំធ្លាប់មានទេ ក្នុងប្រវត្តិសាស្ត្របារាំង។
ចុះផ្សាយនៅថ្ងៃ៖ កែប្រែថ្ងៃទី៖
ញត្តិទាមទារប្តឹងរដ្ឋាភិបាលបារាំង ចំពោះការយឺតយ៉ាវចាត់វិធានការគាំពារបរិស្ថានធម្មជាតិ គឺផ្តួចផ្តើមដោយអង្គការអន្តរជាតិចំនួនបួន គឺអង្គការ Greenpeace, Oxfam, Notre Affaire និង មូលនិធិដើម្បីធម្មជាតិនិងមនុស្ស។ ញត្តិនេះ ត្រូវគេបង្ហោះតាមគេហទំព័រអ៊ីនធឺនែត ឈ្មោះថា laffairedusiecle.net ។ នាយិកាអង្គការ Oxfam នៅបារាំង លើកឡើងថា ការចូលរួមចុះឈ្មោះក្នុងញត្តិប្តឹងរដ្ឋាភិបាលនេះ មានចំនួនច្រើនលើសពីការរំពឹងទុក ហើយកើនឡើងយ៉ាងឆាប់រហ័ស។ ចំណែកប្រធានអង្គការ Notre Affaire សង្កត់ធ្ងន់ថា ការប្រែប្រួលអាកាសធាតុនិងជីវៈចម្រុះ គឺជាក្តីបារម្ភខ្លាំងរបស់ពលរដ្ឋ។
បើតាមអង្គការទាំងបួនខាងលើ នៅថ្ងៃច័ន្ទស្អែកនេះ ពួកគេនឹងដាក់របាយការណ៍អង្កេតលម្អិតមួយជូនរដ្ឋាភិបាលបារាំង ស្តីពីរឿងបរិស្ថានធម្មជាតិនេះ ហើយទុកពេលចំនួន២ខែ ឲ្យរដ្ឋាភិបាលរកចម្លើយដោះស្រាយបញ្ហា។ ចំពោះពួកគេ គេមិនចង់ស្តាប់ការជជែកដោះសាតទៀតនោះទេ គឺគេចង់ឃើញសកម្មភាពការងារជាក់ស្តែង។ ជាបន្តទៀត នៅខែមីនា ឆ្នាំ២០១៩ ពួកគេនឹងដាក់ពាក្យប្តឹងទៅតុលាការរដ្ឋបាលបារាំងតែម្តង។
គួរជ្រាបថា ការប្តឹងរដ្ឋាភិបាលចំពោះការមិនយកចិត្តទុកដាក់រឿងបរិស្ថាន ឬប្តឹងចំពោះការចាត់វិធានការយឺតយ៉ាវចំពោះកិច្ចគាំពារធម្មជាតិ គឺធ្លាប់មានប្រវត្តិឈ្នះក្តីម្តងរួចហើយ នៅប្រទេសហូឡង់។ អង្គការមួយឈ្មោះ Urgenda ដែលចូលរួមដោយពលរដ្ឋប្រមាណ៩០០នាក់ បានប្តឹងរដ្ឋាភិបាលហូឡង់ ហើយទីបំផុត តុលាការហូឡង់ បានសម្រេចឲ្យរដ្ឋាភិបាល ចាត់វិធានការកាត់បន្ថយ ការបំពុលបរិកាសដោយឧស្ម័នផ្ទះកញ្ចក់ ឲ្យបាន២៥ភាគរយ នៅឆ្នាំត្រឹមឆ្នាំ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ