ភាពស្មុគស្មាញនៃបេសកកម្មរបស់លោកចន ឃែរី នៅដើមបូព៌ា
ចុះផ្សាយនៅថ្ងៃ៖
ស្តាប់ - ០៦:២៣
លោកចន ឃែរី រដ្ឋមន្រ្តីក្រសួងការបរទេសអាមេរិក ទើបនឹងធ្វើដំណើរទៅដល់អ៊ីស្រាអែល នៅថ្ងៃពុធនេះ ដើម្បីព្យាយាមសម្របសម្រួល ស្វែងរកបទឈប់បាញ់ រវាងហាម៉ាស់ និងអ៊ីស្រាអែល។ ក៏ប៉ុន្តែ បើគេមើលទៅលើភាពចម្រូងចម្រាសក្នុងទំនាក់ទំនង អ៊ីស្រាអែល-អាមេរិក បេសកកម្មរបស់លោកចន ឃែរី នៅពេលនេះ ទំនងជានឹងមានភាពស្មុគស្មាញខ្លាំង។
ជាទូទៅ អាមេរិក គឺជាប្រទេសដែលមានឥទ្ធិពលខ្លាំងជាងគេ ទៅលើអ៊ីស្រាអែល ពីព្រោះថា អាមេរិក គឺជាខ្នងបង្អែកនដ៏ធំរបស់អ៊ីស្រាអែល ទាំងនៅក្នុងវិស័យការទូតអន្តរជាតិ និងវិស័យយោធា។
ក៏ប៉ុន្តែ គេសង្កេតឃើញថា ចាប់តាំងពីលោកអូបាម៉ាឡើងកាន់តំណែងជាប្រធានាធិបតីអាមេរិក ទំនាក់ទំនង រវាងអាមេរិក និងអ៊ីស្រាអែល កំពុងតែមានភាពរកាំរកូសគ្នាខ្លាំង ជាពិសេស ប្រមុខដឹកនាំប្រទេសទាំងពីរ គឺលោកអូបាម៉ា និងនេតាន់យ៉ាហ៊ូ មានជំហរខ្វែងគ្នា ទាំងទៅលើដំណើរការសន្តិភាព រវាងអ៊ីស្រាអែល និងប៉ាឡេស្ទីន ក៏ដូចជា ទៅលើសំណុំរឿងនុយក្លេអ៊ែរអ៊ីរ៉ង់។ លោកអូបាម៉ាធ្លាប់បានរិះគន់ត្រង់ៗ និងជាសាធារណៈចំពោះនយោបាយរបស់រដ្ឋាភិបាលលោកនេតាន់យ៉ាហ៊ូ ទាក់ទងនឹងការសាងសង់លំនៅដ្ឋានជ្វីហ្វ នៅលើទឹកដីប៉ាឡេស្ទីន។ ចំណែកលោកនេតាន់យ៉ាហ៊ូវិញក៏តែងតែបានរិះគន់រដ្ឋាភិបាលរបស់លោកអូបាម៉ាដែរថា មានជំហរទន់ជ្រាយ នៅក្នុងសំណុំរឿងនុយក្លេអ៊ែរអ៊ីរ៉ង់។
បរាជ័យនៃកិច្ចចរចាសន្តិភាព រវាងអ៊ីស្រាអែល និងប៉ាឡេស្ទីន ក្រោមកិច្ចសម្របសម្រួលរបស់លោក ចន ឃែរី កាលពីខែមេសាកន្លងទៅថ្មីៗនេះ រឹតតែធ្វើឲ្យទំនាក់ទំនង អ៊ីស្រាអែល-អាមេរិក កាន់តែធ្លាក់ចុះមួយកម្រិតថែមទៀត។
បញ្ហាស្មុគស្មាញមួយទៀត នៅក្នុងបេសកកម្មរបស់ចន ឃែរី នៅដើមបូព៌ា នៅពេលនេះ គឺនៅត្រង់ថា ដើម្បីសម្របសម្រួលឲ្យបានបទឈប់បាញ់ អ្នកសម្របសម្រួលត្រូវតែជជែកជាមួយភាគីជម្លោះទាំងសងខាង មានន័យថា លោកចន ឃែរី ត្រូវតែជួបជជែក ទាំងជាមួយអ៊ីស្រាអែល និងជាមួយប៉ាឡេស្ទីន។ ក៏ប៉ុន្តែ ភាគីប៉ាឡេស្ទីន ដែលកំពុងមានជម្លោះជាមួយអ៊ីស្រាអែលនៅពេលនេះ គឺក្រុមហាម៉ាស់ ដែលត្រូវបានអាមេរិក ក៏ដូចជាប្រទេសលោកខាងលិចផ្សេងទៀតចាត់ទុកជាក្រុមភេរវជន ហើយគោលការណ៍ជាមូលដ្ឋានក្នុងនយោបាយការបរទេសអាមេរិក គឺមិនជួបចរចាជាមួយភេរវជន។
ដើម្បីបញ្ចុះបញ្ចូលក្រុមហាម៉ាស់ លោកចន ឃែរី ដាក់ក្តីសង្ឃឹមច្រើនទៅលើអេហ្ស៊ីប។ ហេតុដូច្នេះហើយបានជា លោករដ្ឋមន្រ្តីការបរទេសអាមេរិកបានចំណាយពេលច្រើន នៅទីក្រុងគែរ ប្រទេសអេហ្ស៊ីប មុននឹងចេញដំណើរទៅអ៊ីស្រាអែល នៅថ្ងៃពុធនេះ។
គួរបញ្ជាក់ថា កាលពីពេលកន្លងមក គឺអេហ្ស៊ីបដែលជាអ្នកតែងតែបានចេញមុខជួយសម្របសម្រួលឲ្យមានបទឈប់បាញ់ រវាងអ៊ីស្រាអែល និងហាម៉ាស់ ដោយសារតែអេហ្ស៊ីប ជាប្រទេសមានទំនាក់ទំនងល្អជាមួយអ៊ីស្រាអែលផង និងមានឥទ្ធិពលទៅលើក្រុមហាម៉ាស់ផង។ ក៏ប៉ុន្តែ នោះគឺអេហ្ស៊ីបក្រោមការដឹកនាំរបស់លោកមូបារ៉ាក់។
នៅក្នុងពេលបច្ចុប្បន្ននេះ មេដឹកនាំអេហ្ស៊ីបហាក់ដូចជាមិនសូវមានឥទ្ធិពលទៅលើក្រុមហាម៉ាស់ដូចពីសម័យលោកមូបារ៉ាក់នោះទេ។ ជាក់ស្តែង កាលពីថ្ងៃអង្គារសប្តាហ៍មុន អេហ្ស៊ីបធ្លាប់បានស្នើឡើងនូវបទឈប់បាញ់ម្តងរួចមកហើយ។ សំណើបទឈប់បាញ់ ដែលរដ្ឋាភិបាលអ៊ីស្រាអែលទទួលយក ក៏ប៉ុន្តែ ត្រូវក្រុមហាម៉ាស់ច្រានចោល។
ប៉ាឡេស្ទីនចោទអ៊ីស្រាអែលពីបទឧក្រិដ្ឋកម្មប្រឆាំងមនុស្សជាតិ
នៅថ្ងៃពុធនេះ ក្រុមប្រឹក្សាសិទ្ធិមនុស្សរបស់អ.ស.ប បានបើកកិច្ចប្រជុំវិសាមញ្ញមួយ នៅទីស្នាក់ការក្នុងក្រុងហ្សឺណែវ ដើម្បីជជែកពីជម្លោះ នៅដើមបូព៌ានេះ។ កិច្ចប្រជុំវិសាមញ្ញនេះត្រូវបានធ្វើឡើង ទៅតាមសំណើរបស់ប្រទេស ៣ គឺអេហ្ស៊ីប ក្នុងនាមក្រុមប្រទេសអារ៉ាប់ ប៉ាគីស្ថាន ក្នុងនាមអង្គការសហប្រតិបត្តិការអ៊ីស្លាម (Organisation de la coopération islamique) និងប៉ាឡេស្ទីន ដែលជាសមាជិកសង្កេតការណ៍ និងជាភាគីជម្លោះជាមួយអ៊ីស្រាអែលបច្ចុប្បន្ន ។
នៅក្នុងកិច្ចប្រជុំវិសាមញ្ញនេះប៉ាឡេស្ទីនបានស្នើឡើងនូវសេចក្តីសម្រេចមួយ ដើម្បីថ្កោលទោស “ការរំលោភដោយកម្រោល និងជាប្រព័ន្ធ ទៅលើសិទ្ធិមនុស្ស និងសិទ្ធិសេរីភាពជាមូលដ្ឋាន បង្កឡើងដោយប្រតិបត្តិការយោធាអ៊ីស្រាអែល នៅក្នុងទឹកដីហ្កាហ្សា”។ នៅចំពោះមុខអ.ស.ប ប៉ាឡេស្ទីនបានលើកឡើងថា សកម្មភាពយោធារបស់អ៊ីស្រាអែលនៅក្នុងទឹកដីហ្កាហ្សាអាចត្រូវចាត់បញ្ចូលជាឧក្រិដ្ឋកម្មសង្រ្គាម ឬឧក្រិដ្ឋកម្មប្រឆាំងមនុស្សជាតិ ដែលអ.ស.បត្រូវបង្កើតគណៈកម្មការឯករាជ្យមួយ ដើម្បីបើកការស៊ើបអង្កេតជាបន្ទាន់។
ប៉ាឡេស្ទីនក៏បានទាមទារផងដែរឲ្យអ.ស.ប ដាក់ប៉ាឡេស្ទីនឲ្យស្ថិតនៅក្រោមកិច្ចការពារអន្តរជាតិជាបន្ទាន់ ដើម្បីបញ្ឈប់ការវាយប្រហារទៅលើជនស៊ីវិលនៅហ្កាហ្សា។
ក្រុមហ៊ុនអាកាសចរណ៍អឺរ៉ុបនិងអាមេរិកផ្អាកការហោះហើរទៅអ៊ីស្រាអែល
នៅក្នុងពេលដែលសកម្មភាពការទូតកំពុងតែផុសផុលខ្លាំង ដើម្បីស្វែងរកបទឈប់បាញ់ នៅលើដីជាក់ស្តែងឯណោះវិញ ការវាយប្រហារតបតគ្នា រវាងអ៊ីស្រាអែល និងប៉ាឡេស្ទីន នៅតែបន្ត ហើយនៅតែមានសភាពខ្លាំងក្លាដដែល។ គិតជាសរុប ការវាយប្រយុទ្ធគ្នា អស់រយៈពេល ១៦ថ្ងៃកន្លងទៅនេះ បានបណ្តាលឲ្យប្រជាជនប៉ាឡេស្ទីនប្រមាណ ៦៥០នាក់ និងទាហានអ៊ីស្រាអែល ២៩នាក់ ត្រូវបាត់បង់ជីវិត។
នៅថ្ងៃពុធនេះ ជនបរទេសម្នាក់ត្រូវបាត់បង់ជីវិត នៅប៉ែកខាងត្បូងអ៊ីស្រាអែល ដោយត្រូវគ្រាប់រ៉ុកកែតរបស់ក្រុមហាម៉ាស់។ នេះបើយោងតាមការអះអាងរបស់ប៉ូលិសអ៊ីស្រាអែល។
កាលពីថ្ងៃអង្គារម្សិលមិញ អ្នកដំណើរតាមយន្តហោះ នៅព្រលានយន្តហោះអន្តរជាតិក្រុង Tel Aviv ត្រូវបានគេជម្លៀសឲ្យរត់រកកន្លែងសុវត្ថិភាព ក្រោយពីរ៉ុកកែតមួយគ្រាប់បាញ់ចេញពីហ្កាហ្សា ហើយធ្លាក់នៅប្រមាណជាង ១គីឡូម៉ែត្រពីផ្លូវយន្តហោះ។ ហេតុការណ៍នេះបានជំរុញឲ្យទីភ្នាក់ងារអាកាសចរណ៍ស៊ីវិលអាមេរិក និងអឺរ៉ុប ចេញបញ្ជាឲ្យក្រុមហ៊ុនអាកាសចរណ៍របស់ពួកគេផ្អាកការហោះហើរទៅកាន់អ៊ីស្រាអែល ដោយមានការព្រួយបារម្ភអំពីសុវត្ថិភាពអ្នកដំណើរ ជាពិសេស ក្រោយពីគេទើបនឹងឃើញមានហេតុការណ៍ធ្លាក់យន្តហោះម៉ាឡេស៊ី នៅខាងកើតអ៊ុយក្រែន ដែលបណ្តាលឲ្យអ្នកដំណើរជិត ៣០០នាក់ត្រូវបាត់បង់ជីវិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ