ភាពចម្រូងចម្រាសចំណោមអ្នកនយោបាយកាណាដាលើការបញ្ជូនទ័ពទៅអ៊ឺរ៉ាក់
ចុះផ្សាយនៅថ្ងៃ៖
ស្តាប់ - ០៤:៣៤
អស់រយៈពេលច្រើនថ្ងៃមកហើយដែលរដ្ឋាភិបាលកាណាដារបស់លោកស្ទីវិន ហាភ័រ និងគណបក្សប្រឆាំងធំៗពីរមិនចុះសម្រុងគ្នាលើទំរង់និងទំហំនៃការចូលររួមរបស់កាណាដាក្នុងការបញ្ជូនទ័ពទៅអ៊ឺរ៉ាក់តបតាមការអំពាវនាវរបស់សហរដ្ឋអាមេរិចដែលជាអ្នកដឹកនាំនិងសម្របសម្រួលក្នុងក្របខណ្ឌនៃក្រុមរដ្ឋសម្ព័ន្ធមិត្តដើម្បីប្រយុទ្ធប្រឆាំងនឹងក្រុមភេវរនិយមរដ្ឋអ៊ីស្លាម។ តាមការគ្រោង នៅថ្ងៃច័ន្ទនេះរដ្ឋសភា និងជជែកដេញដោលនិងបោះឆ្នោតគាំទ្រ លើសំណើរបស់រដ្ឋាភិបាល ដែលក្នុងនោះ កាណាដា នឹងផ្តល់នូវធនធានយោធាទៅប្រទេសអ៊ឺរ៉ាក់ រួមបញ្ចូលទាំងការវាយប្រហារតាមផ្លូវអាកាស សំរាប់រយៈពេលប្រាំមួយខែ តែនឹងមិនមានការវាយប្រហារតាមផ្លូវគោកនោះទេ។ ក្នុងស្ថានភាពនេះ សំឡេងឯកច្ឆន្ទគាំទ្រលើសំណើ នឹងអាចកើតមាននោះទេ ហើយលោកហាភ័រអាចជាអ្នកទទួលខុសត្រូវតែម្នាក់ឯងលើបញ្ហានេះ។
"ក្នុងគោលដៅរក្សាសន្តិសុខតំបន់សន្តិសុខអន្តរជាតិនិងប្រាកដណាស់គឺដើម្បីសន្តិសុខពលរដ្ឋកាណាដាទាំងអស់ការធ្វើអន្តរាគមន៍នេះគឺជារឿងចាំបាច់" នេះគឺសំដីរបស់លោក ស្ទីវិន ហាភ័រ នាយករដ្ឋមន្រ្តីនៃប្រទេសកាណាដា កាលពីថ្ងៃសុក្រសប្តាហ៍កន្លងទៅ នៅពេលដែលគាត់បានសម្រេចចិត្តដាក់សំណើ ទៅកាន់រដ្ឋសភា ដើម្បីជជែកដេញដោល និងបោះឆ្នោតគាំទ្រនៅថ្ងៃច័ន្ទសប្តាហ៍នេះ។
សំណើមកកាន់រដ្ឋសភានេះធ្វើឡើង បន្ទាប់ពីមានការដាក់សម្ពាធពីគណបក្សប្រឆាំងឲ្យរដ្ឋាភិបាលបង្ហាញពីគោលជំហរជាក់លាក់ លើបញ្ហានៃការចូលរួមរបស់កាណាដា ក្នុងបេសកកម្មប្រយុទ្ធប្រឆាំងនឹងអង្គការរដ្ឋអ៊ីស្លាមនេះ ពីព្រោះចាប់តាំងពីនាយករដ្ឋមន្រ្តី ស្ទីវិន ហាភ័រ បានបង្ហើបពីលទ្ធភាពដែលថា កាណាដាអាចនឹងបញ្ចូនទ័ពអាកាសទៅអ៊ឺរ៉ាក់ តបតាមការស្នើសុំរបស់សហរដ្ឋអាមេរិកកាលពីពីរសប្តាហ៍មុននេះ មានប្រតិកម្មអវិជ្ជមានជាបន្តបន្ទាប់ពីគណបក្សប្រឆាំងសំខាន់ពីរ ពោលគឺ គណបក្សNPD (គណបក្សប្រជាធិបតេយ្យថ្មី) និងគណបក្សសេរីនិយម។
លោក Thomas Mulcair ប្រធានគណបក្ស NPD បានប្រឆាំងទៅនឹងគំនិតអន្តរាគមន៍យោធារបស់ប្រទេសកាណាដានៅក្នុងប្រទេសអ៊ីរ៉ាក់ហើយថា អន្តរាគមន៍ទ័ពអាកាសកាណាដា នៅអ៊ីរ៉ាក់ គឺជាវិធានការតក់ក្រហល់ក្នុងកាលៈទេសៈនេះ។ លោកបានលើកឡើងថា កាណាដាគួរជំរុញការបញ្ជូនជំនួយមនុស្សធម៌ទៅឲ្យជនភៀសខ្លួននិងប្រជាជនដែលកំពុងរងផលប៉ះពាល់ ដោយសង្រ្គាម។ លោក Thomas Mulcair ក៏ធ្លាប់បានទាមទារឱ្យមានការជជែកពិភាក្សាគ្នាពីទំរង់និងទំហំ នៃការចូលរួមរបស់ប្រទេសកាណាដាក្នុងបេសកកម្មនេះ ហើយជារឿយៗលោកបានរិះគន់រដ្ឋាភិបាល ក្នុងការធ្វើសកម្មភាពជាសម្ងាត់និងក្នុងការមិនយកចិត្តទុកដាក់ពីគំនិតរបស់រដ្ឋសភាលើបញ្ហាដ៏មានសារៈសំខាន់នេះ។
រីឯគណបក្សសេរីនិយមដឹកនាំដោយ Justin Trudeau ក៏បានធ្លាប់បញ្ចាក់ពីគោលជំហររបស់ខ្លួនថាគណបក្សសេរីនិយមគាំទ្រដល់ការបញ្ជូនទីប្រឹក្សាយោធាកាណាដា តែប្រឆាំងចំពោះប្រតិបត្តិការតាមផ្លូវអាកាស។ ដូចលោក Thomas Mulcair ដែរ លោកJustin Trudeau ជឿជាក់ថាប្រទេសកាណាដាអាចមានប្រយោជន៍ក្នុងរឿងនេះ តាមរយៈការផ្តល់ជំនួយដល់ជនភៀសខ្លួនរាប់រយរាប់ពាន់នាក់ដែលភៀសខ្លួនចេញពីការប៉ះទង្គិចគ្នានេះ ដូចជាជនភៀសខ្លួនទៅកាន់ប្រទេសតួកគីជាដើម។
ដូច្នេះតាមរយៈការបង្ហាញគោលជំហរបែបនេះ គឺប្រាកដណាស់ថា ការបោះឆ្នោតគាំទ្រពីរដ្ឋសភានៅថ្ងៃច័ន្ទនេះ រដ្ឋាភិបាលនឹងមិនអាចទទួលបានការគាំទ្រពីគណបក្សប្រឆាំងទាំងពីរនោះទេ។ តែទោះជាយ៉ាងណាគេរំពឹងទុកថា សំណើចាត់វិធានការរបស់រដ្ឋាភិបាលនឹងត្រូវអនុម័តដោយរដ្ឋសភា ដោយសារថា រដ្ឋាភិបាលបច្ចុប្បន្នមានសំលេងភាគច្រើនដាច់ខាតនៅរដ្ឋសភាពោលគឺ១៦២ លើ ៣០៨សំលេង។
អ្នកវិភាគនយោបាយក្នុងស្រុកមួយចំនួនបានប្រមើលឃើញថា ការដែលលោកស្ទីវិន ហាភ័រ កន្លងមក ព្រងើយកន្តើយមិនខ្វល់ពីការស្វែងរកការគាំទ្រពីគណបក្សប្រឆាំង ដើម្បីទទួលបានសំឡេងឯកច្ឆន្ទនៅរដ្ឋសភានេះអាចជាយុទ្ធសាស្រ្តរបស់លោកសំរាប់ការបោះឆ្នោតនៅឆ្នាំ២០១៥ខាងមុខនេះ ដោយការបង្ហាញដល់ប្រជាជនកាណាដាថា ខ្លួនជាបុគ្គលនាយករដ្ឋមន្រ្តីដែលអង់អាច និងដែលចេះសម្រេចចិត្តចំពោះស្ថានភាពលំបាកៗ សក្តិសមជា នាយករដ្ឋមន្រ្តីកាណាដាបន្តទៅមុខទៀត។ យ៉ាងណាមិញ តាមការស្ទង់មតិរបស់ GLOBAL NOTE ៦៤ភាគរយនៃពលរដ្ឋកាណាដាគាំទ្រការវាយប្រហារដោយយោធានៅអ៊ឺរ៉ាក់នេះ។
តែសំនួរអាចចោទឡើងនៅពេល ភ្នក់ភ្លើងសង្រ្គាមនេះមិនរលត់ ក្នុងរយៈពេលប្រាំមួយខែតាមការរំពឹងទុក ព្រោះតាមពិតទៅលោកអូបាម៉ាក៏ដូចជាលោកនាយករដ្ឋមន្រ្តីអង់គ្លេស ដាវីដ ខេមរ៉ន់ ក៏ធ្លាប់បានលោកឡើងដែរថាសង្រ្គាមនេះប្រើពេលយូរមិនកំរិតត្រឹមខែទេ តែអាចជាឆ្នាំ។ ពេលនោះសួរថា តើតួអង្គនាយករដ្ឋមន្រ្តី ស្ទីវិន ហាភ័រ នឹងត្រូវសំរេចចិត្តបែបណាទៅទៀត? ថាតើកាណាដានឹងនៅតែរក្សាការចូលរួមវាយប្រហារតាមផ្លូវអាកាសបន្ត ឬក៏ត្រូវដកថយ? ហើយប្រសិនបើសង្រ្គាមនេះបន្តរ៉ាំរ៉ៃរាប់ឆ្នាំដូចជាអ្វីដែលកើតមាននៅអាហ្កានីស្ថានដែលកាណាដាចំណាយទឹកប្រាក់ដល់ទៅជាង៣ម៉ឺនលានដុល្លា លោកហាភ័រ អាចនឹងប្រឈមនឹងការទទួលខុសត្រូវចំពោះមុខពលរដ្ឋកាណាដា ក្នុងការដាក់ប្រទេសកាណាដាក្នុងភ្នក់ភ្លើងសង្រ្គាម ដោយមិនមានសំឡេងគាំទ្រឯកច្ឆន្ទពីរដ្ឋសភា។ ទាំងនេះជាចំណោទបញ្ហាដែលអាចកើតមានចំពោះលោកហាភ័រ ក្នុងពេលអនាគតដ៏ខ្លីខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ