បារាំង៖ សិទ្ធិទទួលសញ្ជាតិតាមទឹកដីកំណើតដ៏ចម្រូងចម្រាស
ចុះផ្សាយនៅថ្ងៃ៖
ស្តាប់ - ០៣:៥២
នៅក្នុងរយៈពេលប៉ុន្មានសប្តាហ៍ចុងក្រោយនេះ រឿងអាស្រូវ ជុំវិញការបណ្តេញគ្រួសារជនអន្តោប្រវេសន៍ខុសច្បាប់ឲ្យទៅស្រុកវិញ កំពុងតែក្លាយជាប្រធានរឿងដ៏ចម្រូងចម្រាសមួយ នៅក្នុងប្រទេសបារាំង។ បូករួមជាមួយនឹងបញ្ហាជនភៀសខ្លួន ដែលហូរចូលឥតឈប់ពីអាហ្វ្រិកមកអឺរ៉ុប កាត់តាមអ៊ីតាលី ធ្វើឲ្យបញ្ហាអន្តោប្រវេសន៍ក្លាយទៅជាប្រធានរឿងដ៏ក្តៅគគុកមួយ ហើយមេដឹកនាំបក្សប្រឆាំងបារាំងក៏បានឆ្លៀតក្នុងឱកាសនេះ ទាមទារឲ្យកែប្រែច្បាប់ ស្តីពីសិទ្ធិទទួលបានសញ្ជាតិបារាំងតាមរយៈការកើតនៅលើទឹកដីបារាំង (Droit du sol)។ បើគេពិនិត្យមើលឲ្យមែនទែនទៅ នៅបារាំង សិទ្ធិទទួលបានសញ្ជាតិតាមទឹកដីកំណើតនេះ ធ្លាប់ជាបញ្ហាចម្រូងចម្រាសជាច្រើនដងមកហើយ ក្នុងរយៈពេលប៉ុន្មានឆ្នាំកន្លងទៅនេះ។
តាមច្បាប់បារាំងបច្ចុប្បន្ន សិទ្ធិទទួលសញ្ជាតិបារាំងពីកំណើតត្រូវអនុវត្តទៅតាមគោលការណ៍ពីរ។ ទីមួយ សិទ្ធិទទួលសញ្ជាតិតាមខ្សែលោហិត ពោលគឺ ត្រូវទទួលបានសញ្ជាតិបារាំងដោយស្វ័យប្រវត្តិ កូនដែលកើតពីឪពុក ឬម្តាយ ដែលមានសញ្ជាតិបារាំង បើទោះបីជាកូននោះកើតនៅទីណាក៏ដោយ។ ទីពីរ សិទ្ធិទទួលសញ្ជាតិតាមទឹកដីកំណើត ពោលគឺ ត្រូវទទួលបានសញ្ជាតិបារាំងដោយស្វ័យប្រវត្តិ កូនដែលកើតនៅក្នុងទឹកដីបារាំង បើទោះបីជាឪពុកម្តាយជាជនបរទេសក៏ដោយ ហើយទោះបីជាឪពុកម្តាយជាជនបរទេសនោះ ចូលមកក្នុងប្រទេសបារាំងដោយខុសច្បាប់ក៏ដោយ។
គឺសិទ្ធិទទួលសញ្ជាតិតាមទឹកដីកំណើតនេះហើយ ដែលកាលពីថ្ងៃចន្ទ ២១តុលាកន្លងទៅនេះ ប្រមុខដឹកនាំបក្សប្រឆាំងបារាំង គឺលោកហ្សង់ហ្វ្រង់ស័រ កូប៉េ (Jean-François Copé) ប្រកាសចង់ធ្វើការកែប្រែ។ ប្រមុខដឹកនាំបក្សប្រឆាំងរូបនេះបានប្រកាសថា តំណាងរាស្រ្តគណបក្សរបស់លោកនឹងធ្វើសេចក្តីស្នើច្បាប់មួយ នៅមុនដំណាច់ឆ្នាំនេះ ដើម្បីលុបចោលសិទ្ធិទទួលបានសញ្ជាតិដោយស្វ័យប្រវត្តិ ចំពោះកូនដែលកើតនៅលើទឹកដីបារាំង ប៉ុន្តែ កើតពីឪពុកម្តាយជាជនបរទេស។
លោកហ្សង់ហ្វ្រង់ស័រ កូប៉េ ប្រាកដជាដឹងច្បាស់ថា ច្បាប់នេះនឹងមិនអាចកើតចេញរួចទេ ដោយសារតែគណបក្សរបស់លោកមានសំឡេងភាគតិចនៅក្នុងរដ្ឋសភា ក៏ប៉ុន្តែ ការប្រកាសពីចេតនាចង់លុបចោលសិទ្ធិទទួលសញ្ជាតិតាមទឹកដីកំណើត វាគឺជាយុទ្ធសាស្រ្តនយោបាយមួយ នៅក្នុងពេលដែលបញ្ហាជនភៀសខ្លួន និងជនអន្តោប្រវេសន៍ខុសច្បាប់ កំពុងតែចោទឡើង នៅក្នុងប្រទេសបារាំង ក៏ដូចជា នៅក្នុងតំបន់អឺរ៉ុបទាំងមូល ហើយគណបក្សស្តាំនិយមជ្រុលបារាំង ដែលមាននយោបាយប្រឆាំងនឹងជនអន្តោប្រវេសន៍កំពុងតែមានកម្លាំងកើនឡើងឥតឈប់ឈរ ពីមួយថ្ងៃទៅមួយថ្ងៃ ហើយការបោះឆ្នោតក្រុមប្រឹក្សាក្រុងក៏កាន់តែខិតជិតចូលមកដល់ នៅឆ្នាំ២០១៤ខាងមុខនេះ។ កង្វល់របស់មេដឹកនាំគណបក្ស UMP គឺខ្លាចអ្នកគាំទ្ររបស់ខ្លួន ងាកទៅបោះឆ្នោតឲ្យគណបក្សស្តាំនិយមជ្រុល។
បើគេក្រឡេកទៅមើលអតីតកាល គេឃើញថា អ្នកយោបាយស្តាំនិយមបារាំងធ្លាប់បានព្យាយាមជាច្រើនលើកមកហើយ ក្នុងការលុបចោល ឬរឹតបន្តឹងសិទ្ធិទទួលបានសញ្ជាតិបារាំងតាមទឹកដីកំណើត។ កាលពីឆ្នាំ១៩៩១ លោក វ៉ាឡេរី ហ្សីស្ការ ដេស្តាំង (Valéry Giscard d’Estaing) អតីតប្រធានាធិបតីបារាំង ធ្លាប់បានលើកឡើងថា សិទ្ធិទទួលបានសញ្ជាតិបារាំងគួរតែផ្តល់ឲ្យសម្រាប់តែកូនដែលកើតពីឪពុក ឬម្តាយដែលមានសញ្ជាតិបារាំងប៉ុណ្ណោះ។
ពីរឆ្នាំក្រោយមកទៀត រដ្ឋមន្រ្តីក្រសួងមហាផ្ទៃបារាំង មកពីគណបក្សស្តាំនិយម គឺលោក Charles Pasqua បានលុបចោលសិទ្ធិទទួលសញ្ជាតិជាស្វ័យប្រវត្តិ ដោយបានតម្រូវឲ្យកូនដែលកើតនៅលើទឹកដីបារាំង ពីឪពុកម្តាយបរទេស ត្រូវដាក់ពាក្យសុំចូលសញ្ជាតិបារាំង នៅពេលដែលកូននេះគ្រប់អាយុ ១៨ឆ្នាំ ក្លាយជានីតិជន។ ក៏ប៉ុន្តែ លក្ខខណ្ឌនេះត្រូវបានលុបចោលទៅវិញ នៅឆ្នាំ១៩៩៨ នៅពេលដែលគណបក្សសង្គមនិយមឡើងកាន់អំណាច។
នៅក្នុងពេលបច្ចុប្បន្ននេះ កូនបរទេសដែលកើតនៅលើទឹកដីបារាំងត្រូវទទួលបានសញ្ជាតិបារាំងដោយស្វ័យប្រវត្តិ ក៏ប៉ុន្តែ ក៏មិនមែនគ្មានលក្ខខណ្ឌអ្វីសោះ ដូចជា នៅសហរដ្ឋអាមេរិក ឬប្រទេស Anglosaxon មួយចំនួននោះដែរ។ តាមច្បាប់បារាំងបច្ចុប្បន្ន កូនបរទេស ដែលកើតនៅលើទឹកដីបារាំងអាចទទួលសញ្ជាតិបារាំងដោយស្វ័យប្រវត្តិ ប៉ុន្តែ សញ្ជាតិនេះត្រូវទទួលបាននៅពេលដែលកូននេះក្លាយជានីតិជន (អាយុ ១៨ឆ្នាំ) ហើយត្រូវរស់នៅក្នុងទឹកដីបារាំងយ៉ាងតិច ៥ឆ្នាំ ចាប់តាំងពីអាយុ ១១ឆ្នាំមក។
សិទ្ធិទទួលសញ្ជាតិតាមទឹកដីកំណើតត្រូវបានគេអនុវត្តនៅក្នុងប្រទេសបារាំង រាប់សតវត្សរ៍មកហើយ ពោលគឺ ចាប់តាំងពីក្រោយបដិវត្តន៍ឆ្នាំ១៧៨៩មក។ ហេតុដូច្នេះហើយបានជាមានអ្នកខ្លះ រិះគន់ប្រធានគណបក្ស UMP គឺលោកហ្សង់ហ្វ្រង់ស័រ កូប៉េ ថា បានបង្ហាញនូវនយោបាយបញ្ច្រាស់ទិសគ្នា ដោយម្ខាង ប្រកាសចង់ការពារអត្តសញ្ញាណជាតិបារាំង ក៏ប៉ុន្តែ ក្នុងពេលជាមួយគ្នា បែរជាចង់លុបបំបាត់សិទ្ធិដែលជាប្រពៃណីរាប់សតវត្សរ៍របស់បារាំងទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ