វិបត្តិអ៊ុយក្រែន៖ទីក្រុងគៀវអំពាវនាវរកជំនួយយោធាពីអឺរ៉ុប រីឯសហគមន៍អន្តរជាតិព្រមានដាក់ទណ្ឌកម្មថ្មីលើរុស្ស៊ី
ចុះផ្សាយនៅថ្ងៃ៖
ស្តាប់ - ០៧:១១
សង្រ្គាមប៉ាកការវាងប្រទេសរុស្ស៊ី និងក្រុមប្រទេសលោកខាងលិចកំពុងបន្តមានយ៉ាងផុសផុលទាក់ទងនឹងវិបត្តិអ៊ុយក្រែន។ ក៏ប៉ុន្តែ ស្ថានការណ៍បានឡើងតានតឹងខ្លំាងមួយកម្រិតទៀតនារយៈពេលចុងក្រោយនេះ ដោយសារតែមានព័ត៌មានលេចឡើងជុំវិញវត្តមានទាហានរុស្ស៊ីចូលទៅជួយកម្លំាងបះបោរក្នុងទឹកដីអ៊ុយក្រែន។ នេះជាទង្វើមួយដែលបានធ្វើឲ្យសហគមន៍អន្តរជាតិបញ្ចេញប្រតិកម្មភ្លាមៗ។ បន្ទាប់ពីក្រុមប្រឹក្សាសន្តិសុខអង្គការសហប្រជាជាតិបានកោះប្រជុំជាបន្ទាន់នៅថ្ងៃទី២៨ សីហាមក នៅថ្ងៃនេះ អង្គការអូតង់ក៏បានបើកកិច្ចប្រជុំបន្ទាន់មួយដែរ។ ទន្ទឹមគ្នានេះ អាមេរិក និងសហភាពអឺរ៉ុបក៏បានប្រកាសព្រមានដាក់ទណ្ឌកម្មថ្មីបន្ថែមប្រឆំាងនឹងប្រទេសរុស្ស៊ី។
អ្វីៗលែងស្រពិចស្រពិលទៀតហើយទាក់ទងនឹងវត្តមានទាហានរុស្ស៊ីនៅក្នុងទឹកដីអ៊ុយក្រែនដើម្បីជួយច្បំាងខាងពួកឧទ្ទាមដែលកំពុងប្រឆំាងរដ្ឋាភិបាលអ៊ុយក្រែន។ ការហ៊ានអះអាងយ៉ាងដូចនេះ គឺដោយផ្អែកលើភស្តុតាង និងសក្ខីកម្មមួយចំនួនដែលផ្តល់ដំបូងដោយរដ្ឋាភិបាលអ៊ុយក្រែន និងដែលត្រូវបានបញ្ជាក់ដោយអង្គការអូតង់ ព្រមទំាងប្រភពចេញពីក្រសួងស៊ើបការសម្ងាត់អាមេរិក។ រឿងវត្តមានទាហានរុស្ស៊ីក្នុងទឹកដីអ៊ុយក្រែនប៉ែកខាងកើតត្រូវបានលោកប្រធានាធិបតីអ៊ុយក្រែនប៉េត្រូ ប៉ូរ៉ូឆេនកូប្រកាសឲ្យដឹងជាច្រើនដងមកហើយ ចំណែកសហគមន៍អន្តរជាតិក៏មានមន្ទិលសង្ស័យចំពោះរឿងនេះដែរ។
រូបភាពផ្កាយរណបរបស់អង្គការអូតង់បានបង្ហាញឲ្យឃើញនូវជើងតម្កល់បាញ់គ្រាប់រូកែត និងកម្លំាងទ័ពពិសេសរុស្ស៊ីដែលមានវត្តមានក្នុងទឹកដីអ៊ុយក្រែនប៉ែកខាងកើតតំាងពីប៉ុន្មានខែមកហើយ។ មួយវិញទៀត និងក្រោយពីការអះអាងរបស់រដ្ឋាភិបាលអ៊ុយក្រែនមក រូបភាពផ្កាយរណបក៏បានបង្ហាញពីក្បួនរថក្រោះជាង ១០០គ្រឿងកំពុងបរចូលក្នុងទឹកដីអ៊ុយក្រែន។ សូម្បីតែមេឧទ្ទាមក្នុងទីក្រុងដូនេតស្ក៍ឈ្មោះអាឡិចសង់ ហ្សាកាឆេនកូក៏បានប្រកាសទទួលស្គាល់ថា មានទាហានរុស្ស៊ីពី ៣ ០០០ ទៅ ៤ ០០០នាក់កំពុងជួយច្បំាងជាមួយទ័ពខ្លួន។ តែគេមិនអាចដឹងពីចំនួនទាហានរុស្ស៊ីពិតប្រាកដដែលកំពុងមានវត្តមានក្នុងទឹកដីអ៊ុយក្រែនទេ។
តាមតួលេខផ្តល់ដោយរដ្ឋាភិបាលអ៊ុយក្រែន និងដែលអង្គការអូតង់បានបញ្ជាក់ដូចគ្នានោះ គឺអាចមានជាង ១០ ០០០នាក់។ តែដូចជាសព្វមួយដង រុស្ស៊ីនៅតែបញ្ជាក់ថា គ្មានទ័ពរុស្ស៊ីណាម្នាក់បានដាក់ជើងជាន់ទឹកដីអ៊ុយក្រែននោះទេ និងបានឆ្លៀតវាយប្រហារប្រទេសលោកខាងលិចឲ្យឈប់និយាយបំផ្លើស និងបំប៉ោងការពិត។
សហគមន៍អន្តរជាតិស្វែងរកទណ្ឌកម្មថ្មីប្រឆំាងរុស្ស៊ី
ប្រឈមមុខនឹងឥទ្ធិពលរុស្ស៊ីនៅក្នុងវិបត្តិអ៊ុយក្រែន សហគមន៍អន្តរជាតិហាក់ដូចជាគ្មានជម្រើសអ្វី ក្រៅពីការបន្តស្វែងរកទណ្ឌកម្មថ្មីប្រឆំាងរុស្ស៊ី នោះបើទោះបីជាគេដឹងថា ទណ្ឌកម្មកន្លងមកមិនសូវមានប្រសិទ្ធិភាពក៏ដោយ។ ទណ្ឌកម្មមិនត្រឹមតែមិនបានធ្វើឲ្យរុស្ស៊ីខ្លាចញញើតប៉ុណ្ណោះទេ តែរុស្ស៊ីថែមទំាងឆ្លើយបកវិញ ដោយបញ្ឈប់ការទិញទំនិញពីអឺរ៉ុប និងពីអាមេរិក ដោយងាកទៅរកស៊ីជាមួយប្រទេសផ្សេងទៅវិញ។ ដូច្នេះឃើញថា រឿងវិបត្តិអ៊ុយក្រែនពិតជារឿងមួយសំាញំា ស្មុគស្មាញដែលគេមិនមែនអាចបញ្ចប់ត្រឹមការដាក់ទណ្ឌកម្មគ្នាទៅវិញ ទៅមកនោះទេ។ តំាងពីថ្ងៃផ្ទុះវិបត្តិអ៊ុយក្រែនមក អ្នកណាក៏ដឹងដែរថា រុស្ស៊ីបានលូកដៃយ៉ាងជ្រៅទៅកកូរកកាយកិច្ចការផ្ទៃក្នុងរបស់អ៊ុយក្រែន។ ករណីតំបន់គ្រីមេ គឺជារឿងមួយមិនអាចប្រកែកបានទេ។
ឥឡូវនេះ គឺវត្តមានទាហានរុស្ស៊ីក្នុងទឹកដីអ៊ុយក្រែនមិនអាចប្រកែកបានពេលនេះហើយដែលជម្រុញក្រុមប្រឹក្សាសន្តិសុខអង្គការសហប្រជាជាតិឲ្យកោះប្រជុំបន្ទាន់មួយនៅថ្ងៃទី២៨ សីហាដើម្បីបរិហារពីការចូលឈ្លានពានលើអធិបតេយ្យរបស់ប្រទេសជិតខាង។ នៅថ្ងៃនេះទៀត អង្គការអូតង់ក៏បានបើកកិច្ចប្រជុំបន្ទាន់មួយដើម្បីពិនិត្យសិក្សាលើសំណុំរឿងនោះ។ ដោយឡែក លោកប្រធានាធិបតីអាមេរិកអូបាម៉ាបានប្រកាសថា អាមេរិកនឹងមិនប្រើកម្លំាងដើម្បីអន្តរាគមន៍នៅអ៊ុយក្រែនទេ។ តែអាចនឹងបញ្ជូនកម្លំាងទ័ពទៅដាក់នៅក្នុងប្រទេសជិតខាងអ៊ុយក្រែនដែលជាសមាជិករបស់អូតង់។ សហរដ្ឋអាមេរិក និងសហភាពអឺរ៉ុបបានយល់ឃើញដូចគ្នាថា នឹងបន្តដាក់ទណ្ឌកម្មសេដ្ឋកិច្ចថ្មីទៀតប្រឆំាងរស្ស៊ី។
លោកប្រធានាធិបតីអំពាវនាវរកជំនួយយោធាពីអឺរ៉ុប និងអូតង់
លោកប្រធានាធិបតីអ៊ុយក្រែនប៉ូរ៉ូឆេនកូមិនបានលំអិតនៅក្នុងសេចក្តីអំពាវនាវរបស់ខ្លួនទេ តែការស្រែករកជំនួយយោធាពីអឺរ៉ុប និងអូតង់អាចជាជំនួយត្រឹមតែគ្រឿងសព្វាវុធប៉ុណ្ណោះ។ ការអំពាវនាវជំនួយយោធាមកពីប្រមុខរដ្ឋអ៊ុយក្រែនបារម្ភខ្លាចផ្ទុះសង្រ្គាមជាយថាហេតុរវាងអ៊ុយក្រែន និងរុស្ស៊ីនាពេលខាងមុខ។ មួយវិញទៀត គឺដោយសារតែវត្តមានរបស់ទាហានរុស្ស៊ី និងសព្វាវុធទំនើបៗរបស់រុស្ស៊ីសព្វថ្ងៃនេះហើយ ដែលបានធ្វើឲ្យកម្លំាងពួកឧទ្ទាមមានសន្ទុះកាន់តែខ្លំាងឡើងៗនាពេលសព្វថ្ងៃ។ ថ្មីៗនេះ ការដែលពួកឧទ្ទាមអាចវាយដណ្តើមយកបានទីក្រុងNovoazovsk ក៏ដោយសារតែមានការជួយគំាទ្រពីទាហានរុស្ស៊ីដែរ។ សម្រាប់ទីក្រុងគៀវ បើគ្រាន់តែប្រឆំាងទប់នឹងពួកឧទ្ទាម អ៊ុយក្រែនមិនត្រូវការជំនួយយោធាបន្ថែមទេ។
ដោយឡែក លោកប្រមុខរដ្ឋអ៊ុយក្រែនមិនបានសុំជំនួយយោធាពីអាមេរិកទេ តែក្រសួងការបរទេសអាមេរិកបានលើកឡើងថា ទីក្រុងវ៉ាស៊ីតោនមិនទាត់ចោលមធ្យោបាយណាមួយទេដើម្បីជួយអ៊ុយក្រែន ដោយរាប់បញ្ចូលទំាងការផ្តល់ជំនួយយោធាផង។ នៅពេលនេះ គេមិនទាន់បានទទួលចម្លើយយ៉ាងណាពីអឺរ៉ុប ឬអូតង់ទេ។ តែនៅក្នុងកិច្ចប្រជុំបន្ទាន់ថ្ងៃនេះ អូតង់បានបញ្ជាក់ថា ខ្លួនមិនបដិសេធការចូលជាសមាជិកអូតង់របស់ប្រទេសអ៊ុយក្រែនទេ។ ទន្ទឹមគ្នានេះ អូតង់ក៏បានអំពាវនាវឲ្យរុស្ស៊ីបញ្ឈប់ការជ្រៀតជ្រែកកិច្ចការផ្ទៃក្នុងរបស់អ៊ុយក្រែន។ តែនៅចំពោះមុខ សហគមន៍អន្តរជាតិហាក់ដូចជាគ្មានជម្រើសអ្វី ក្រៅពីការស្វែងរកទណ្ឌកម្មសេដ្ឋកិច្ចថ្មីប្រឆំាងរុស្ស៊ី។ សម្រាប់ក្រុមអ្នកវិភាគ ដំណោះស្រាយបញ្ហាអ៊ុយក្រែនមិនមែនស្ថិតលើការប្រើទណ្ឌកម្ម ឬមួយក៏ការប្រើពាក្យសម្តីវាយប្រហារដាក់គ្នាទេ តែគឺត្រូវអង្គុយជជែកគ្នារវាងភាគីពាក់ព័ន្ធ ពិសេសអ៊ុយក្រែន រុស្ស៊ី និងក្រុមប្រទេសលោកខាងលិច។ ចូរកុំភ្លេចថា រុស្ស៊ីគឺជាតួអង្គឯកនៅក្នុងវិបត្តិអ៊ុយក្រែនសព្វថ្ងៃដែលសហគមន៍អន្តរជាតិត្រូវតែហ៊ានជជែកតតំាងជាមួយលោកប្រធានាធិបតីពូទីន ដោយមិនគួរបន្តធ្វើព្រងើយកន្តើយដាក់គាត់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ