ភេរវកម្មផ្ទួនៗនៅរុស្ស៊ីក្នុងពេលដែលការប្រកួតកីឡាអូឡាំពិចរដូវរងាជិតឈានចូលមកដល់
ចុះផ្សាយនៅថ្ងៃ៖
ស្តាប់ - ០៦:០២
ក្នុងរយៈពេលមិនដល់ ២៤ម៉ោងផង រុស្ស៊ីបានរងនូវការវាយប្រហារភេរវកម្មដល់ទៅពីរលើក ដែលបណ្តាលឲ្យបាត់បង់ជីវិតមនុស្សសរុបប្រមាណជា ៣០នាក់។ ការវាយប្រហារភេរវកម្មផ្ទួនៗគ្នានេះបាននាំឲ្យមានការព្រួយបារម្ភអំពីបញ្ហាសន្តិសុខជុំវិញការប្រកួតកីឡាអូឡាំពិចរដូវរងារ ដែលនឹងត្រូវបើកធ្វើ នៅទីក្រុង Sotchi ប្រទេសរុស្ស៊ី នៅខែកុម្ភៈខាងមុខនេះ។
មនុស្សយ៉ាងតិច ១៤នាក់បាត់បង់ជីវិត និង២៨នាក់ផ្សេងទៀតរងរបួស នៅក្នុងការវាយប្រហារភេរវកម្មទៅលើរថយន្តដឹកអ្នកដំណើរមួយគ្រឿង នៅក្នុងទីក្រុង Volgograd (ស្ថិតនៅប៉ែកនិរតីនៃប្រទេសរុស្ស៊ី) នៅព្រឹកថ្ងៃចន្ទ។ ការវាយប្រហារនេះកើតឡើងតែមួយថ្ងៃប៉ុណ្ណោះ ក្រោយពីមានការវាយប្រហារភេរវកម្មទៅលើស្ថានីយ៍រថភ្លើង កាលពីថ្ងៃអាទិត្យម្សិលមិញ ដែលបណ្តាលឲ្យមនុស្សយ៉ាងតិច ១៧នាក់បាត់បង់ជីវិត។
រហូតមកទល់នឹងថ្ងៃចន្ទនេះ គេនៅមិនទាន់ឃើញមានក្រុមណាចេញមុខទទួលខុសត្រូវ ចំពោះការវាយប្រហារទាំងនេះនៅឡើយទេ។ ក៏ប៉ុន្តែ អាជ្ញាធររុស្ស៊ីបានអះអាងថា ការវាយប្រហារលើរថយន្តដឹកអ្នកដំណើរនៅថ្ងៃចន្ទនេះ មានជាប់ទាក់ទងនឹងការវាយប្រហារទៅលើស្ថានីយ៍រថភ្លើង កាលពីថ្ងៃអាទិត្យ ហើយថា ការវាយប្រហារទាំងពីរនេះ សុទ្ធតែជាការវាយប្រហារភេរវកម្មអត្តឃាត។
យោងតាមលទ្ធផលនៃការស៊ើបអង្កេតបឋម ដែលចុះផ្សាយដោយបណ្តាញព័ត៌មានរុស្ស៊ី ភេរវជនដែលធ្វើការវាយប្រហារអត្តឃាតទៅលើស្ថានីយ៍រថភ្លើង កាលពីថ្ងៃអាទិត្យ គឺជាស្រ្តីមកពីតំបន់ភ្នំកូកាស (Caucase) ដែលកំពុងប្រឈមមុខនឹងចលនាទាមទារផ្តាច់ទឹកដី។ គេនៅចាំបានថា កាលពីខែតុលាកន្លងទៅនេះ ទីក្រុង Volgograd ធ្លាប់ទទួលរងនូវការវាយប្រហារអត្តឃាត ដោយភេរវជនជាស្រ្តីរួចមកហើយ។
នៅពេលនេះ អាជ្ញាធររុស្ស៊ីកំពុងតែរឹតបន្តឹងសន្តិសុខ ជាពិសេស នៅតាមស្ថានីយ៍រថភ្លើង និងព្រលានយន្តហោះ។ រដ្ឋាភិបាលក្រុងម៉ូស្គូកំពុងមានការព្រួយបារម្ភខ្លាចក្រុមភេរវជនបង្កើនការវាយប្រហារ ដើម្បីព្យាយាមរំខានដល់ការប្រកួតកីឡាអូឡាំពិចរដូវរងា ដែលចាប់បើកធ្វើនៅខែកុម្ភៈខាងមុខ ហើយដែលរុស្ស៊ី គឺជាម្ចាស់ផ្ទះ។ ការប្រកួតកីឡាអូឡាំពិចរដូវរងានេះនឹងត្រូវធ្វើ នៅក្នុងទីក្រុង Sotchi ដែលស្ថិតនៅមិនឆ្ងាយប៉ុន្មាន ពីតំបន់ភ្នំកូកាស។
មេដឹកនាំក្រុមឧទ្ទាមផ្តាច់ទឹកដី នៅតំបន់ភ្នំកូកាស ធ្លាប់បានចេញមុខប្រកាស កាលពីខែកក្កដាថា ពួកគេនឹងប្រើគ្រប់មធ្យោបាយទាំងអស់ ដើម្បីរារាំងការប្រកួតកីឡាអូឡាំពិច នៅ Sotchi នេះ។
ក៏ប៉ុន្តែ អ្នកនាំពាក្យគណៈកម្មការអូឡាំពិចអន្តរជាតិបានប្រាប់ទីភ្នាក់ងារព័ត៌មានរ៉យទ័រថា គណៈកម្មការអូឡាំពិចជឿជាក់ថា អាជ្ញាធររុស្ស៊ីមានសមត្ថភាពពេញលេញ ក្នុងការរក្សាសន្តិសុខ សម្រាប់ការប្រកួតកីឡាអូឡាំពិចរដូវរងារឆ្នាំ២០១៤នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ