បោះឆ្នោតសភាកូរ៉េខាងជើង៖ ក្នុងមណ្ឌលបោះឆ្នោតមួយ មានបេក្ខជនឈរឈ្មោះតែម្នាក់គត់
នៅថ្ងៃអាទិត្យនេះ ប្រជាជនកូរ៉េខាងជើងនាំគ្នាទៅបោះឆ្នោត ដើម្បីជ្រើសរើសអ្នកតំណាងរាស្ត្រនៅមណ្ឌលបោះឆ្នោត៦៨៧កន្លែង នៅទូទាំងប្រទេស។ ប៉ុន្តែ អ្នកបោះឆ្នោតគ្មានជម្រើសនោះទេ ព្រោះថានៅតាមមណ្ឌលបោះឆ្នោតមួយ មានបេក្ខជនតែម្នាក់គត់។ នេះជាការបោះឆ្នោតសភាលើកទី១ហើយ នៅថ្ងៃអាទិត្យនេះ នៅកូរ៉េខាងជើង គិតចាប់ពីពេលលោក គឹម ជុងអ៊ុន ឡើងកាន់អំណាច ក្រោយពេលលោកគឹម ជុងអ៊ីល ជាឳពុករបស់លោក បានទទួលមរណភាព ក្នុងខែធ្នូ ឆ្នាំ២០១១មក។ គិតដល់ត្រឹមដើមរសៀល ថ្ងៃអាទិត្យនេះ អត្រាអ្នកចូលរួមបោះឆ្នោត មាន៩១ភាគរយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ការបោះឆ្នោតជាតិ នៅកូរ៉េខាងជើង ថ្ងៃអាទិត្យនេះ ឃ្លាតឆ្ងាយពីបែបផែនប្រជាធិបតេយ្យសេរីពហុបក្សណាស់ ព្រោះថានៅតាមមណ្ឌលបោះឆ្នោតមួយ មានបេក្ខជនឈរឈ្មោះតែម្នាក់គត់។ ដូច្នេះ អ្នកបោះឆ្នោតកូរ៉េខាងជើងគ្មានជម្រើសនោះទេ។ ពួកគេត្រូវសម្រេចថា តើជ្រើសអោយបេក្ខជននោះ ជាប់ធ្វើជាតំណាងរាស្ត្ររឺក៏អត់។ បើពួកគេសម្រេចថា មិនជ្រើសទេនោះ រដ្ឋាភិបាលអាចសង្ស័យថា ពួកគេមិនពេញចិត្តនឹងការដឹកនាំរបស់រដ្ឋាភិបាល។ ទោះជាមានវត្តមានបក្សច្រើនផ្សេងទៀត ដើម្បីបង្ហាញថា កូរ៉េខាងជើងសំបូរ បក្សនយោបាយក៏ដោយចុះ បេក្ខជនដែលឈរឈ្មោះជាតំណាងរាស្ត្រទាំង៦៨៧រូប នៅថ្ងៃនេះ គឺសុទ្ធតែត្រូវជ្រើសរើសអោយឈរឈ្មោះ ដោយគណបក្សការងារ ដែលជាបក្សចំបងក្នុងប្រទេស។
អត្រាអ្នកទៅបោះឆ្នោតមាន៩១ភាគរយ គិតត្រឹមរសៀលថ្ងៃអាទិត្យនេះ។ កាលពីឆ្នាំ២០០៩ អត្រាអ្នកបោះឆ្នោតមានដល់ទៅ៩៩,៩៨ភាគរយឯណោះ ហើយអ្នកបោះឆ្នោត១០០ភាគរយ បានបោះឆ្នោតគាំទ្រអោយបេក្ខជនឈរឈ្មោះ បានជាប់ឆ្នោតជាតំណាងរាស្ត្រ។ ក្នុងការបោះឆ្នោតសភានៅថ្ងៃអាទិត្យនេះ ប្រមុខដឹកនាំ គឹម ជុងអ៊ុន ក៏មានវត្តមានជាបេក្ខជនផងដែរ។ លោកគឹម ជុងអ៊ុន ឈរឈ្មោះនៅមណ្ឌលបោះឆ្នោតលេខ១១១ នៅភ្នំបេកទូ Mont Paektu ស្ថិតនៅភាគខាងជើងប្រទេស ជិតព្រំដែនចិន។ ប្រជាជនកូរ៉េខាងជើងចាត់ទុកភ្នំនេះ ដូចជាទីសក្ការៈបូជា ព្រោះថា ជីតារបស់មេដឹកនាំគឹម ជុងអ៊ុន ធ្លាប់បានធ្វើជំរំមួយកន្លែង នៅទីនោះ ដើម្បីធ្វើចលនាប្រឆាំងការឈ្លានពានរបស់ជប៉ុន កាលពីពេលដែលកូរ៉េស្ថិតក្រោមអាណានិគមជប៉ុន។
កូរ៉េខាងជើងរៀបចំការបោះឆ្នោតសភារៀងរាល់៥ឆ្នាំម្តង។ សភាកូរ៉េខាងជើងបើកអង្គប្រជុំ ម្តងរឺក៏ពីរដងប៉ុណ្ណោះ ក្នុងមួយឆ្នាំ ដើម្បីបោះឆ្នោតលើថវិកា និងអនុម័តសេចក្តីសម្រេចរបស់គណបក្សការងារ។ ការបោះឆ្នោតជាតិនៅថ្ងៃអាទិត្យនេះ អាចជួយអោយរដ្ឋាភិបាលវាស់មើលពីកម្រិតប្រជាប្រិយភាពខ្លួនផងដែរ ព្រោះថា មន្ត្រីរដ្ឋាភិបាលទទួលបន្ទុករៀបចំការបោះឆ្នោត ត្រូវចុះទៅតាមផ្ទះគ្រួសារកូរ៉េនីមួយៗ ដើម្បីផ្ទៀងផ្ទាត់វត្តមានអ្នកដែលបានទៅបោះឆ្នោត។
យោងតាមវេបសៃត៍ឈ្មោះថា New Focus International ជាវេបសៃត៍របស់ប្រជាជនកូរ៉េខាងជើងដែលភៀសខ្លួនទៅកូរ៉េខាងត្បូង ការបោះឆ្នោតជាតិនៅកូរ៉េខាងជើង អនុញ្ញាតអោយរដ្ឋាភិបាលក្រុងព្យុងយ៉ាងផ្ទៀងផ្ទាត់ចំនួនប្រជាជនក្នុងស្រុកឡើងវិញ ដើម្បីអាចដឹងពីចំនួនអ្នកលួចរត់ភៀសខ្លួនទៅចិន រឺកូរ៉េខាងត្បូង ដែលនៅជិតខាងក្បែរនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ