កូរ៉េខាងជើង៖មនុស្សខ្លំាងលំដាប់ទី២បានលេចមុខជាថ្មី ក្រោយមានដំណឹងថា ត្រូវគេកំចាត់បាត់
នៅថ្ងៃសុក្រ ទី៧ មីនានេះ លោកចឺ យ៉ុងហេ (Choe Ryong Hae) អ្នកទទួលខុសត្រូវជាន់ខ្ពស់កូរ៉េខាងជើងម្នាក់ និងដែលត្រូវបានគេចាត់ទុកជាមនុស្សខ្លំាងលំដាប់ទី២ បន្ទាប់ពីអគ្គមគ្គុទេសន៍គីម ជុងអ៊ុន បានលេចមុខជាថ្មីតាមកញ្ចក់ទូរទស្សន៍រដ្ឋ។ ការលេចមុខជាថ្មីដែលបានធ្វើឲ្យគ្រប់គ្នាភ្ញាក់ផ្អើលរបស់លោកចឺ យ៉ុងហេពេលនេះបានកើតមានឡើង ក្រោយពីលេចឮពាក្យចចាមអារ៉ាមដែលថា លោកចឺ យ៉ុងហេត្រូវបានគេដកចេញពីតំណែងបាត់ទៅហើយ។
ចុះផ្សាយនៅថ្ងៃ៖
ស្តាប់ - ០១:៥៣
វាពិតជារឿងមួយមិនមែនចៃដន្យទេ ដែលទូរទស្សន៍រដ្ឋបានផ្សព្វផ្សាយរូបភាពរបស់លោកចឺ យ៉ុងហេ (Choe Ryong Hae) ដែលត្រូវបានគេស្គាល់ជាមនុស្សខ្លំាងលំដាប់ទី២ របស់របបកុម្មុយនិស្តក្រុងព្យុងយ៉ាង បន្ទាប់ពីអគ្គមគ្គុទេសន៍គីម ជុងអ៊ុននោះ។ មិនចៃដន្យ ព្រោះថា នារយៈពេលចុងក្រោយនេះ ពោលតំាងពីអគ្គមគ្គុទេសន៍គីម ជុងអ៊ុនបានសម្រេចដកតំណែងឱពុកមារបស់ខ្លួន គឺលោកចាង សុងថេក រួចសម្លាប់ចោលមក ក៏មានលេចឮពាក្យចចាមអារ៉ាមថា លោកចឺ យ៉ុងហេក៏បានទទួលរងគ្រោះថ្នាក់ដូចលោកចាង សុងថេកអ៊ីចឹងដែរ។
ដូច្នេះតាមរយៈរូបភាពផ្សព្វផ្សាយដោយទូរទស្សន៍រដ្ឋដែលបង្ហាញរូបលោកចឺ យ៉ុងហេពេលនេះ គឺជាភស្តុតាងមួយដើម្បីបញ្ជាក់ប្រាប់មជ្ឈដ្ឋានទូទៅថា លោកចឺ យ៉ុងហេមិនត្រូវបានគេដកចេញពីតំណែងទេ និងកំពុងបន្តរក្សាតួនាទីរបស់ខ្លួនដដែល។ នៅក្នុងរូបភាពផ្សព្វផ្សាយដោយទូរទស្សន៍រដ្ឋនោះ គេឃើញស្នាមញញឹម តែមានដំណើរខ្ចើចរបស់លោកចឺ យ៉ុងហេដើរនៅក្បែរលោកគីម ជុងអ៊ុនកាលពីខែមករា និងកុម្ភៈកន្លងទៅថ្មីៗនេះ។ បន្ទាប់មក គេក៏បានឃើញលោកចឺ យ៉ុងហេកំពុងកត់ត្រានាឱកាសដំណើរទៅកាន់កន្លែងផ្សេងៗជាមួយលោកគីម ជុងអ៊ុន ពិសេសវត្តមានរបស់លោកចឺ យ៉ុងហេនៅតាមឆ្នេរសមុទ្រក្នុងឱកាសធ្វើសមយុទ្ធបាញ់កំាភ្លើង។
បច្ចុប្បន្ននេះ លោកចឺ យ៉ុងហេ គឺជាប្រមុខសាខានយោបាយនៃកងទ័ព និងជាសមាជិកនៃគណៈកម្មាធិការអចិន្រ្តែយ៍របស់ការិយាល័យនយោបាយបក្សពលករ។ ទន្ទឹមគ្នានេះ លោកចឺ យ៉ុងហេក៏ជាអនុប្រធានម្នាក់នៃគណៈកម្មការយោធាមជ្ឈិមរបស់គណបក្សពលករដែរ។ នៅក្នុងឆ្នំា ២០១៤ នេះទៀត លោកចឺ យ៉ុងហេក៏ទើបបានទទួលឋានន្តរស័ក្តិជាអនុសេនាប្រមុខទៀត។ គឺរូបលោកចឺ យ៉ុងហេនេះឯងដែលត្រូវបានលោកគីម ជុនអ៊ុនជ្រើសរើសជាតំណាងពិសេសរបស់ខ្លួនដើម្បីទៅជួបនិយាយជាមួយលោកប្រធានាធិបតីចិនស៊ី ជីនពីងកាលពីខែមិថុនា បន្ទាប់ពីចិនបានសម្តែងការមិនសប្បាយចិត្តចំពោះការដែលក្រុងព្យុងយ៉ាងបានបាញ់សាកល្បងនុយក្លេអ៊ែរលើកទី៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ