អាស៊ីកណ្តាលបញ្ជូនថាមពលអគ្គិសនីទៅអាស៊ីខាងត្បូង
ចុះផ្សាយនៅថ្ងៃ៖
ស្តាប់ - ០៦:២៣
ក្នុងខែឧសភាកន្លងទៅ នៅសាធារណរដ្ឋតាហ្ស៊ីគីស្ថាន តំបន់អាស៊ីកណ្តាល មានប្រព្រឹត្តទៅយ៉ាងឧឡារឹក ពិធីចាប់ផ្តើមសមិទ្ធិគម្រោង ក្រោមឈ្មោះថា CASA-1000 ជាពាក្យបំព្រួញនៃឈ្មោះពេញដែលថា The Central Asia – South Asia 1000 Megawatt។ បានអញ្ជើញចូលរួម ក្នុងពិធីនេះ គឺ ប្រធានាធិបតីតាហ្ស៊ីគីស្ថាន នាយករដ្ឋមន្ត្រីកៀហ្ស៊ីស៊ីស្ថាន នាយករដ្ឋមន្ត្រីប៉ាគីស្ថាន ប្រមុខរដ្ឋាភិបាលអាហ្វហ្កានីស្ថាន អនុរដ្ឋមន្ត្រីការបរទេសស.រ.អា.។
ពិធីសម្ពោធជាផ្លូវការ គម្រោងខាងបញ្ជូនថាមពលអគ្គិសនី ពីតំបន់អាស៊ីកណ្តាលទៅអាស៊ីខាងត្បូង ក្នុងបរិមាណចាប់ពី ១.០០០ Megawatt ឡើងទៅក្នុង១ឆ្នាំៗ បានប្រព្រឹត្តទៅ នៅក្រុង Tursunzadé ចម្ងាយ៦០គ.ម. ពីក្រុង Douchanbé រដ្ឋធានីតាហ្ស៊ីគីស្ថាន។ ស្របនឹងគម្រោងនេះ តាហ្ស៊ីគីស្ថាន និង កៀហ្ស៊ីស៊ីស្ថាន អាចបញ្ជូនថាមពលអគ្គិសនី ទៅអាហ្វហ្កានីស្ថាន និងប៉ាគីស្ថាន ក្នុង១ឆ្នាំៗ រហូតដល់ ៥.០០០លាន គីឡូវ៉ាត់-ម៉ោង ចាប់ពីឆ្នាំ ២០១៨ទៅ។
គម្រោង CASA-1000 គាំទ្រដោយ ធនាគារពិភពលោក ធនាគារអ៊ីស្លាមខាងអភិវឌ្ឍន៍ ទីភ្នាក់ងារអភិវឌ្ឍន៍អន្តរជាតិរបស់ស.រ.អា. USAID ក្រសួងការបរទេសអាមេរិកាំង ក្រសួងសហប្រតិបត្តិការអន្តរជាតិ នៃរាជាណាចក្រអង់គ្លេស ទីភ្នាក់ងារអភិវឌ្ឍន៍អន្តរជាតិអូស្ត្រាលី។
ការងាររួមគ្នាជុំវិញគម្រោង CASA-1000 ដែលតម្រូវឲ្យចំណាយដល់ ជាង១.០០០លានដុល្លារ បន្តទៅ១០ឆ្នាំមកហើយ ហើយប្រមើលសង់ឡើងជា ប្រព័ន្ធនៃបង្គោលខ្សែកាបនាំចរន្តអគ្គិសនី ប្រវែងសរុបគឺ១.៣០០គ.ម. សម្រាប់បង្ហូរចរន្តនេះ ចេញពីស្ថានីយវារីអគ្គិសនី នៅតាហ្ស៊ីគីស្ថាន និងកៀហ្ស៊ីស៊ីស្ថាន ទៅកាន់ប្រទេសអាហ្វហ្កានីស្ថាន និងប៉ាគីស្ថាន។ ក្នុង ១.៣០០គ.ម.នោះ ៤៤៧គ.ម. គឺកាត់តាមដែនដី តាហ្ស៊ីគីស្ថាន និងកៀហ្ស៊ីស៊ីស្ថាន និង៧៥០គ.ម.កាត់តាមដែនដី អាហ្វហ្កានីស្ថាន និងប៉ាគីស្ថាន។
ពួកអ្នកតំណាងនៃ៤ប្រទេសនេះ រមែងថ្លែងថា គម្រោង CASA-1000 គឺបើកចំហ សម្រាប់ គ្រប់ តែសាមីភាគីណា ដែលប្រាថ្នារួមចំណែកដែរ ឧទាហរណ៍ សាធារណរដ្ឋអ៊ូសបេគីស្ថាន ដែលតែងដើរតួ ជាប្រទេសលក់ផលិតផលអគ្គិសនីរបស់ខ្លួននៅតំបន់។
គម្រោង CASA-1000 មិនគ្រាន់តែអនុញ្ញាតដល់រដ្ឋដែលក្រីក្រជាងគេនៃអតីតសហភាពសូវៀត បែបយ៉ាង តាហ្ស៊ីគីស្ថាន និងកៀហ្ស៊ីស៊ីស្ថាន ឲ្យលក់អគ្គិសនីខ្លួនដែលនៅសល់ប្រើមិនអស់ ក្នុងរដូវក្តៅ ប៉ុន្តែថែមទាំងជួយគេ ឲ្យដោះស្រាយបញ្ហាផ្គត់ផ្គង់ភ្លើង នៅតាមប្រទេសទាំងនេះ ដែលនៅរដូវធ្លាក់ទឹកកក ជារដូវរងា គឺតែងខ្វះភ្លើងប្រើប្រាស់ជានិច្ច។ ជាក់ស្តែង នៅតាហ្ស៊ីគីស្ថាន ក្នុង៥ឆ្នាំចុងក្រោយ អ្នកស្រុកតែងរងគ្រោះនឹងកង្វះភ្លើង។ លើកលែងតែក្រុងធំៗ និងរដ្ឋធានី ដែលភ្លើងមិនចេះដាច់ទេ នៅតាមជនបទវិញ គឺដាច់ភ្លើងក្នុង១ថ្ងៃ១យប់ ដល់ទៅ ១២-១៦ម៉ោង ហើយដាច់ដល់ទៅ ៧-៨ខែ ក្នុង១ឆ្នាំ។
ប៉ុន្តែ ថ្លែងក្នុងពិធីចាប់ផ្តើមសមិទ្ធិគម្រោង CASA-1000 លោកប្រធានាធិបតីតាហ្ស៊ីគីស្ថាន Emomali Rakhmon លើកឡើងថា ស្ថានីយវារីអគ្គិសនីប្រទេសគាត់ ផលិតភ្លើងក្នុង១ឆ្នាំៗ បានដល់ជាង ៥២៧.០០០លានគីឡូវ៉ាត់-ម៉ោង ដែលពីក្នុងនោះ នៅរដូវក្តៅ ប្រទេសគាត់ប្រើអស់តែ ៥%ប៉ុណ្ណោះ ដូច្នេះ ប្រទេសគាត់អាចលក់ភ្លើងទៅក្រៅ ៥.០០០លានគីឡូវ៉ាត់-ម៉ោង ក្នុង១ឆ្នាំៗ។ មិនតែប៉ុណ្ណោះ គម្រោង CASA-1000 ជួយតាហ្ស៊ីគីស្ថានឲ្យសម្រេចបាន នូវឯករាជ្យថាមពល។
ចំណែកលោកនាយករដ្ឋមន្ត្រី កៀហ្ស៊ីស៊ីស្ថាន Sooronbai Zheenbekov ថ្លែងថា ប៉ាគីស្ថាន និង អាហ្វហ្កានីស្ថាន នឹងទទួលបានអគ្គិសនីស្អាតបរិសុទ្ធផ្នែកបរិស្ថាន ដែលផលិតដោយ ស្ថានីយ វារីអគ្គិសនីនៅកៀហ្ស៊ីស៊ីស្ថាន និងតាហ្ស៊ីគីស្ថាន។ គម្រោង CASA-1000 បង្ហាញឲ្យឃើញពីឆន្ទៈសហការគ្នា រវាងប្រទេសនៅតំបន់។
ថ្លែងក្នុងពិធីនោះ លោកប្រមុខរដ្ឋាភិបាលអាហ្វហ្កានីស្ថាន Abdullah Abdullah មានប្រសាសន៍៖ តំបន់យើងកំពុងប៉ះទង្គិចនឹងការគម្រាមធំៗនៅក្នុងលោក បែបយ៉ាង ភេរវនិយមអន្តរជាតិ។ ទោះយ៉ាងណាក្តី ក៏អ្នកស្រុកតំបន់ មានបណ្តាជនអាហ្វហ្កានីស្ថានជាដើម ដោយប្រយុទ្ធទល់នឹងអកុសលនេះ សំដែងនូវឆន្ទៈនិងបំណងខ្លួន កសាងអនាគតភ្លឺស្វាងតែម្តង។
លោកអនុរដ្ឋមន្ត្រីការបរទេសស.រ.អា. Daniel Rozenblum ដែលប្រកាសថា ក្រុងវ៉ាស៊ីតោន រួមវិភាគទានខ្លួន ១៥លានដុល្លារទៅក្នុងគម្រោង CASA-1000 សង្កេតឃើញថា បណ្តាប្រទេសនៅតំបន់ អាចមូលមតិគ្នា មិនមែនគ្រាន់តែជុំវិញ បញ្ហាបច្ចេកទេសប៉ុណ្ណោះទេ តែក៏ទាំងជុំវិញបញ្ហានយោបាយទៅផង។
គួរនិយាយថា សមិទ្ធិកម្មគម្រោង CASA-1000 ដែលចាប់ផ្តើមជាផ្លូវការក្នុងខែឧសភាកន្លងទៅ គឺយោងទៅលើកិច្ចព្រមព្រៀង ចុះកាលពីថ្ងៃ២៤វិច្ឆិកាឆ្នាំទៅមិញ នៅឯប្រទេសតួកគី ដោយ រដ្ឋមន្ត្រីក្រសួងថាមពល ៤ប្រទេសពាក់ព័ន្ធនោះ គឺតាហ្ស៊ីគីស្ថាន កៀហ្ស៊ីស៊ីស្ថាន ប៉ាគីស្ថាន និងអាហ្វហ្កានីស្ថាន។
ពេលបំពេញទស្សនកិច្ចថ្នាក់រដ្ឋនៅប៉ាគីស្ថាន ក្នុងខែវិច្ឆិកាឆ្នាំ២០១៥ ប្រមុខរដ្ឋតាហ្ស៊ីគីស្ថាន លោក Emomali Rakhmon បានថ្លែងថា ការសាងសង់ប្រព័ន្ធបង្គោលខ្សែកាប នាំចរន្តអគ្គិសនី ពីអាស៊ីកណ្តាល ទៅអាស៊ីខាងត្បូង នឹងចប់ជាស្រចបាច់ នៅដំណាច់ឆ្នាំ២០១៧។
ស្របនឹងកិច្ចព្រមព្រៀងនេះ គឺក្នុងឆ្នាំ២០១៨ ដែលប៉ាគីស្ថានចាប់ផ្តើមទទួលអគ្គិសនី ពីតាហ្ស៊ីគីស្ថាននិង កៀហ្ស៊ីស៊ីស្ថាន ក្នុង១ឆ្នាំៗ ១.០០០ Megawatt ហើយ អាហ្វហ្កានីស្ថាននឹងទទួលបាន ៣០០ Megawatt រួចប្រសិនបើអាហ្វហ្កានីស្ថានគ្មានសមត្ថភាព ប្រើថាមពលនេះទេ នោះ ប៉ាគីស្ថាននឹងរ៉ាប់រងប្រើវាទាំងអស់។ ដូច្នេះ តាហ្ស៊ីគីស្ថាន និងកៀហ្ស៊ីស៊ីស្ថាន ក្នុងរដូវក្តៅអាចនាំចេញ ទៅប៉ាគីស្ថាន និង អាហ្វហ្កានីស្ថាន គឺអគ្គិសនី ដែលខ្លួនប្រើមិនអស់ក្នុង១ឆ្នាំៗដល់ទៅ ១.៣០០ Megawatt។
តម្លៃសរុបនៃគម្រោង CASA-1000 គឺតម្រូវឲ្យចំណាយជាង ១.០០០លានដុល្លារ ដែលពីក្នុងនោះ ធ្លាក់ទៅលើតាហ្ស៊ីគីស្ថាន គឺ ៣១៤លានដុល្លារ ធ្លាក់ទៅលើកៀហ្ស៊ីស៊ីស្ថាន គឺ២០៩លាន ដុល្លារ ធ្លាក់ទៅលើ អាហ្វហ្កានីស្ថាន គឺ៣៥៤លានដុល្លារ ធ្លាក់ទៅលើប៉ាគីស្ថាន គឺ ២០៩លានដុល្លារ។
គោលដៅនៃគម្រោង CASA-1000 គឺបង្កើតឡើងជា ទីផ្សារថាមពលអគ្គិសនីប្រចាំតំបន់ អាស៊ីកណ្តាលនិងអាស៊ីខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ