លីបង់បានទទួលការគំាទ្រផ្នែកនយោបាយ និងហិរញ្ញវត្ថុពីកិច្ចប្រជុំក្នុងប្រទេសបារំាង
នៅថ្ងៃពុធ ទី៥ មីនា ទីក្រុងប៉ារីស ប្រទេសបារំាងបានធ្វើជាម្ចាស់ផ្ទះរៀបចំកិច្ចប្រជុំនៃក្រុមប្រទេសអន្តរជាតិជួយគំាទ្រប្រទេសលីបង់។ ក្រុមប្រទេសអន្តរជាតិនេះបានបង្កើតឡើងកាលពីឆ្នំា ២០១៣ និងដែលមានអាមេរិក រុស្ស៊ី អង់គ្លេស និងប្រទេសបារំាងជាសមាជិក។ កម្មវត្ថុចម្បងនៃកិច្ចប្រជុំ គឺជួយជ្រោមជ្រែងប្រទេសលីបង់ដែលកំពុងក្រពុលមុខដោយសារតែការហូរចូលចំនួនជនភៀសខ្លួនពីប្រទេសស៊ីរី។ តែទន្ទឹមគ្នានេះ កិច្ចប្រជុំក៏មិនភ្លេចនិយាយទេអំពីវិបត្តិនៅក្នុងប្រទេសអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៨
កំណើន និងលំហូរចំនួនជនភៀសខ្លួនស៊ីរីបានបង្កឲ្យមានគ្រោះថ្នាក់យ៉ាងធំធេងដល់ប្រទេសលីបង់ នេះជាពាក្យពេចន៍ថ្លែងដោយលោកប្រធានាធិបតីលីបង់មីសែល ស្លេម៉ាន។ គួរជម្រាបជូនថា ក្នុងនាមជាប្រទេសដែលមានព្រំប្រទល់ដែនជាប់នឹងប្រទេសស៊ីរី លីបង់បាន និងកំពុងប្រឈមមុខនឹងលំហូរចំនួនជនភៀសខ្លួនស៊ីរីចូលក្នុងប្រទេសខ្លួនកាន់តែច្រើនឡើងៗ។ ជារៀងរាល់ខែ មានជនភៀសខ្លួនស៊ីរីប្រមាណជា ៥០ ០០០នាក់បានដើរឆ្លងព្រំដែនចូលក្នុងប្រទេសលីបង់ និងបើគិតមកដល់សព្វថ្ងៃ គឺមានជាង ១លាននាក់ហើយ។
ប្រឈមនឹងបញ្ហានេះ និងដើម្បីជួយគំាទ្រសេដ្ឋកិច្ចរបស់ប្រទេសលីបង់ មានប្រទេសជាច្រើនបានប្រកាសផ្តល់ជំនួយតាមរយៈកិច្ចប្រជុំក្នុងទីក្រុងប៉ារីសកាលពីថ្ងៃពុធ ទី៥ មីនា បារំាងបានប្រកាសផ្តល់ចំនួន ៧លានអឺរ៉ូ ន័រវែសចំនួន ៣លាន ៥សែនអឺរ៉ូ ឬមួយក៏ប្រទេសហ្វំាងឡង់បានផ្តល់ឲ្យចំនួន ២លានអឺរ៉ូ។ ចំនួនទឹកប្រាក់របស់ប្រទេសអឺរ៉ុបទំាងនេះនឹងចូលទៅជួយបំពេញបន្ថែមនៅក្នុងមូលនិធិរបស់ធនាគារពិភពលោក។ ក្រៅពីជំនួយគំាទ្រផ្នែកហិរញ្ញវត្ថុ និងមនុស្សធម៌ ជំនួយគំាទ្រផ្នែកសន្តិសុខក៏ត្រូវបានប្រកាសជួយដោយប្រទេសអារ៉ាប៊ីសាអូឌីតដែរ។ កាលពី៣ សប្តាហ៍មុន ទីក្រុងរីយ៉ាដបានទិញគ្រឿងសព្វាវុធបារំាងដើម្បីបំពាក់ឲ្យទ័ពលីបង់ក្នុងតម្លៃ ៣ ០០០លានដុល្លារ។
ទន្ទឹមគ្នានេះ កិច្ចប្រជុំក្នុងទីក្រុងប៉ារីសក៏បានប្រកាសគំាទ្រផ្នែកនយោបាយចំពោះរដ្ឋាភិបាលលីបង់ផងដែរ ពិសេសជួយរក្សាសន្តិសុខ និងស្ថិរភាពដែលបាន និងកំពុងទទួលការគំរាមកំហែងជាប់ជាប្រចំាពីវិបត្តិក្នុងប្រទេសស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ